ຜູ້ສະໝັກເລືອກຕັ້ງສະມະຊິກສະພາແຫ່ງຊາດຊຸດທີ IX ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ຈໍານວນ 25 ທ່ານ ເຊິ່ງນຳໂດຍ ທ່ານ ປອ ນາງ ສູນທອນ ໄຊຍະຈັກ ເລຂາທິການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ ໄດ້ສືບຕໍ່ເຄື່ອນໄຫວພົບປະ ແລະ ແນະນຳຕົວຢູ່ທີ່ເມືອງເຊໂປນ ແຂວງສະຫວັນນະເຂດ ໃນຕອນບ່າຍວັນທີ 12 ກຸມພາ 2021 ນີ້ ໂດຍມີທ່ານ ວົງສະຫວັນ ວຽງມະນີ ກຳມະການພັກແຂວງ ເລຂາພັກເມືອງ ເຈົ້າເມືອງເຊໂປນ ພ້ອມດ້ວຍຫົວໜ້າຫ້ອງການ,ຫົວໜ້າຈຸດສຸມ,ນາຍບ້ານ ຕະຫຼອດຮອດຜູ້ມີສິດເລືອກພາຍໃນເມືອງເຂົ້າຮ່ວມ.

ທ່ານ ວົງສະຫວັນ ວຽງມະນີ ເຈົ້າເມືອງເຊໂປນໄດ້ລາຍງານໃຫ້ຮູ້ວ່າ: ເມືອງເຊໂປນມີ 64 ໜ່ວຍປ່ອນບັດເລືອກຕັ້ງ,ພົນລະເມືອງ 63.722 ຄົນ,ຍິງ 31.345 ຄົນ,ໃນນີ້ພົນລະເມືອງຜູ້ມີສິດເລືອກຕັ້ງທີ່ມີອາຍຸກະສຽນແຕ່ 18 ປີຂຶ້ນໄປ ມີຈຳນວນ 33.121 ຄົນ ຍິງ 16.472 ຄົນ , ໄປສືກສາຮ່ຳຮຽນຢູ່ທ້ອງຖິ່ນອື່ນ ພາຍໃນປະເທດມີ 194 ຄົນ ຍິງ 68 ຄົນ , ໄປສືກສາຮ່ຳຮຽນຕ່າງປະເທດມີ 60 ຄົນ ຍິງ 40 ຄົນ , ຜູ້ທີ່ໄປອອກແຮງງານຢູ່ໃນທ້ອງຖິ່ນອື່ນພາຍໃນປະເທດ 680 ຄົນ ຍິງ 281 ຄົນ , ໄປອອກແຮງງານຢູ່ຕ່າງປະເທດມີ 115 ຄົນ , ຍິງ 74 ຄົນ , ຜູ້ທີ່ຢູ່ທ້ອງຖິ່ນອື່ນມາພັກເຊົາພາຍໃນບ້ານມີ 535 ຄົນ ຍິງ 135 ຄົນ , ສານຕັດສິນປົດສິດເລືອກຕັ້ງມີ 69 ຄົນ ຍິງ 2 ຄົນ , ເປັນບ້າເສຍຈິດມີ 122ຄົນ ຍິງ 41 ຄົນ , ຈຳນວນຜູ້ມີສິດເລືອກຕັ້ງທີ່ມີໜ້າຕົວຈິງຈຳນວນ 32.416 ຄົນ , ຍິງ 16.101 ຄົນ ຜ່ານການຫ້າງຫາກະກຽມຕະຫຼອດໄລຍະຜ່ານມາເຫັນວ່າເມືອງເຊໂປນມີຄວາມພ້ອມໃຫ້ແກ່ບັ້ນເລືອກຕັ້ງ 100% ແລ້ວ.

ໃນໂອກາດພົບປະໂຄສະນາຫາສຽງກັບຜູ້ມີສິດເລືອກຕັ້ງທີ່ເມືອງເຊໂປນ ທ່ານ ທອງໃສ ອິນທິແສງ ຜູ້ສະໝັກເລືອກຕັ້ງສະມາຊິກສະພາແຫ່ງຊາດນ້ຳເບີ 9 ກໍ່ໄດ້ຕາງໜ້າໃຫ້ກັບຜູ້ສະໝັກເລືອກຕັ້ງທັງ 25 ທ່ານ ມີຄຳເຫັນວ່າ: ການເລືອກຕັ້ງສະມະຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນແຂວງຊຸດທີ II ກໍ່ເປັນເຫດການໆເມືອງທີ່ສຳຄັນໃນການເສີມຂະຫຍາຍສິດປະຊາທິປະໄຕ,ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນ ເຂົ້າໃນການເລືອກເອົາຜູ້ແທນຂອງຕົນເຂົ້າຢູ່ໃນສະພາ ໃນຄັ້ງວັນທີ 21 ກຸມພາ 2021 ທີ່ຈະມາເຖິງໃນມໍ່ໆນີ້ ແລະ ຖືເອົາການເລືອກຕັ້ງຄັ້ງນີ້ ເປັນພາກສ່ວນໜຶ່ງໃນການບູລະນະລັດປະຊາທິປະໄຕ ປະຊາຊົນ ໃຫ້ມີຄວາມເຂັ້ມແຂງໜັກແໜ້ນ,ປະຕິບັດໜ້າທີ່ການເມືອງໃນໄລຍະໃໝ່ຢ່າງມີປະສິດທິພາບ ແລະ ປະສິດທິຜົນ.

ສະພາແຫ່ງຊາດເປັນອົງການຕົວແທນແຫ່ງສິດ ແລະຜົນປະໂຫຍດຂອງປະຊາຊົນລາວບັນດາເຜົ່າ,ເປັນອົງການຈັດຕັ້ງສູງສຸດແຫ່ງອຳນາດລັດ,ເປັນອົງການນິຕິບັນຍັດ ມີພາລະບົດບາດໃນການຮັບຮອງເອົາລັດຖະທຳມະນູນ ແລະ ກົດໝາຍ,ເປັນຜູ້ຕົກລົງບັນຫາສຳຄັນພື້ນຖານຂອງຊາດ
ຄຳວ່າ: ອົງການຕົວແທນ ໝາຍເຖິງອົງການທີ່ໄດ້ຮັບມອບໝາຍສິດຈາກອຳນາດຂອງປະຊາຊົນ ໂດຍຜ່ານການເລືອກຕັ້ງຈາກປະຊາຊົນ. ສະນັ້ນຈີ່ງຮຽກຮ້ອງໃຫ້ຜູ້ມີສິດເລືອກຕັ້ງຈົ່ງພິຈາລະນາເລືອກເອົາຜູ້ທີ່ມີຄວາມຮູ້ຄວາມສາມາດທີ່ສຸດ ເພື່ອໃຫ້ໄດ້ຜູ້ທີ່ເປັນຕົວແທນຮັບໃຊ້ປະຊາຊົນຢ່າງແທ້ຈິງ