ຜູ້ສະໝັກຮັບເລືອກຕັ້ງສະມາຊິກສະພາປະຊາຊົນຂັ້ນແຂວງໄຊຍະບູລີ ເຂດເລືອກ ຕັ້ງເມືອງພຽງ ສືບຕໍ່ລົງໂຄສະນາຫາສຽງຢູ່ ໂຮງຮຽນ ມສ ເມືອງພຽງ ຫວ່າງບໍ່ດົນມານີ້ ໂດຍການຕ້ອນຮັບຂອງທ່ານ ສົມຫວັງ ສີສົມພອນ ກຳມະການປະຈຳພັກເມືອງ ຫົວໜ້າຫ້ອງການແຜນການ ແລະ ການລົງທຶນເມືອງ ຫົວໜ້າຄະນະຊີ້ນຳ ເຂດເມືອງພຽງ, ມີບັນດາພະນັກງານຮັບຜິດຊອບເຂດເມືອງພຽງ, ຄະນະພັກອຳນາດການປົກຄອງບ້ານ ພ້ອມດ້ວຍປະຊາຊົນບັນດາເຜົ່າຜູ້ມີສິດປ່ອນບັດເລືອກຕັ້ງພາຍໃນ 7 ບ້ານເຂດເມືອງພຽງຄື: ບ້ານ ແສງຈະເລີນ, ບ້ານໜອງງົວ, ບ້ານດົງເງິນ, ບ້ານດົງຫຼວງ, ບ້ານກາງ, ບ້ານນາກອກ ແລະ ໂພນສະຫວ່າງ ຕ້ອນຮັບຢ່າງພ້ອມພຽງ.

ການລົງມາໃນເທື່ອນີ້ທ່ານ ສົມຫວັງ ສີສົມພອນ ໄດ້ໃຫ້ຮູ້ເຖິງຈຸດປະສົງຄາດໝາຍໃນການ ລົງມາຫາສຽງກໍຄືການສະເໜີຕົວ ຂອງຜູ້ສະໝັກຮັບເລືອກຕັ້ງສະມາຊິກສະພາປະຊາຊົນຂັ້ນແຂວງ ເຂດເລືອກຕັ້ງເມືອງພຽງໃນຄັ້ງນີ້ ຈາກນັ້ນບັນດາຜູ້ສະໝັກຮັບເລືອກຕັ້ງຈຳນວນ 5 ທ່ານໄດ້ຂຶ້ນສະເໜີຕົວພ້ອມ ທັງ ຜ່ານປະຫວັດຫຍໍ້ກ່ຽວກັບວຽກງານການເຄື່ອນໄຫວຂອງຕົນໃນໄລຍະຜ່ານມາ ແລະ ວິໄສທັດ ໃນການພັດທະນາໃນຕໍ່ໜ້າ ພ້ອມທັງຜ່ານປະຫວັດຂອງຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດ ເຂດເລືອກທີ 7 ແຂວງໄຊຍະບູລີ ແລະ ຮຽກຮ້ອງມາຍັງປະຊາຊົນບັນດາເຜົ່າກໍຄືຜູ້ທີ່ມີສິດປ່ອນບັດເລືອກຕັ້ງໃຫ້ຄົ້ນຄວ້າພິຈາລະນາໃຊ້ສິດປະຊາທິປະໄຕຂອງຕົນຄັດເລືອກເອົາຜູ້ມີມາດຖານເງື່ອນໄຂຄົບຖ້ວນເຂົ້າໃນສະພາ ເພື່ອເປັນຄວາມຫວັງອັນສູງສົ່ງໃນການປົກປັກຮັກສາ ແລະ ສ້າງສາພັດທະນາ ເທດຊາດໃນໄລຍະໃໝ່.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)