ໃນວັນທີ 12 ກຸມພາ 2021 ຜູ້ສະໝັກຮັບເລືອກຕັ້ງສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ປະຈໍາເຂດເລືອກຕັ້ງ #ເມືອງທ່າແຕງ #ແຂວງເຊກອງ ໄດ້ລົງເຄື່ອນໄຫວໂຄສະນາຫາສຽງນໍາປະຊາຊົນຢູ່ໜ່ວຍປ່ອນບັດທີ 10 ບ້ານກໍາກອກ ໂດຍການນໍາພາຂອງທ່ານ ລົດແກ້ວ ເພັງພູນສະຫວັດ ຮອງເລຂາພັກເມືອງ, ປະທານແນວລາວສ້າງຊາດເມືອງທ່າແຕງ.

ໃນການລົງພົບປະໂຄສະນາຫາສຽງຄັ້ງນີ້ ບັນດາຜູ້ສະໝັກຮັບເລືອກຕັ້ງ ສສຂ ໄດ້ຜັດປ່ຽນກັນຂຶ້ນສະເໜີຕົວລະດັບການສຶກສາ, ປະຫວັດການເຄື່ອນໄຫວໂດຍຫຍໍ້ ແລະໜ້າທີ່ຮັບຜິດຊອບຂອງຕົນໃນໄລຍະຜ່ານມາ ກໍຄືປະຈຸບັນ ເພື່ອໃຫ້ພໍ່ແມ່ປະຊາຊົນໄດ້ຮັບຊາບ ເພື່ອເປັນຂໍ້ມູນໃຫ້ປະຊາຊົນໄດ້ຕັດສິນໃຈທີ່ຈະເລືອກເອົາ ເພື່ອເປັນຕົວແທນຂອງຕົນເຂົ້າປະຕິບັດໜ້າທີ່ໃນສະພາປະຊາຊົນແຂວງ. ພ້ອມນີ້, ຍັງໄດ້ເປີດໂອກາດໃຫ້ບັນດາຜູ້ເຂົ້າຮ່ວມປະກອບຄໍາຄິດເຫັນໃຫ້ບັນຍາກາດຂອງການລົງພົບປະມີຄວາມເປັນກັນເອງຄຶກຄື້ນ ແລະບັນລຸຕາມລະດັບຄາດໝາຍ.

ເຂດຈຸດສຸມພັດທະນາທີ 3 ໜ່ວຍເລືອກຕັ້ງທີ X ປະກອບດ້ວຍ ບ້ານກໍາກອກ+ອາລິງ ມີ 366 ຫຼັງຄາເຮືອນ 459 ຄອບຄົວ, ມີພົນລະເມືອງທັງໝົດ 2.245 ຄົນ, ຍິງ 1.117 ຄົນ ໃນນີ້ຈໍານວນຜູ້ມີສິດປ່ອນບັດເລືອກຕັ້ງໃນເກນອາຍຸ 18 ປີຂຶ້ນໄປ 1.375 ຄົນ, ຍິງ 651 ຄົນ. ໂດຍເມືອງທ່າແຕງມີຜູ້ລົງສະໝັກຮັບເລືອກຕັ້ງ ສສຂ ຊຸດທີ II ຈໍານວນ 7 ທ່ານ,ຍິງ 2 ທ່ານ ໃນນີ້ຜູ້ສະໝັກຈາກແຂວງ 3 ທ່ານ,ຍິງ 1 ທ່ານ ແລະຜູ້ສະໝັກຈາກເມືອງ 4 ທ່ານ,ຍິງ 1 ທ່ານ.