ໃນຕອນເຊົ້າວັນທີ 15 ກຸມພາ 2021, ຜູ້ສະໝັກຮັບເລືອກຕັ້ງ ສະມາຊິກສະພາແຫ່ງຊາດ (ສສຊ) ຊຸດທີ IX ເຂດເລືອກຕັ້ງທີ 15 ແຂວງຈໍາປາສັກ ຈໍານວນ 20 ທ່ານ ເຊິ່ງນໍາໂດຍ ທ່ານ ສົມມາດ ພົລເສນາ ກໍາມະການສູນກາງພັກ, ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ທ່ານ ສາຍທອງ ໄຊຍະວົງ ຮອງເລຂາພັກແຂວງຈໍາປາສັກ ແລະ ຄະນະຜູ້ສະໝັກ ສສຂ ນະຄອນປາກເຊ 6 ທານ ນໍາໂດຍ ທ່ານ ຄໍາມ່ວນ ພິລາພອນເດດ ກໍາມະການພັກແຂວງ ຜູ້ສະໝັກ ສສຂນະຄອນປາກເຊ . ໄດ້ເຄື່ອນໄຫວໂຄສະນາຫາສຽງ ແລະ ພົບປະຜູ້ມີສິດປ່ອນບັດເລືອກຕັ້ງ ທີ່ມະກາວິທະຍາໄລ ຈໍາປາສັກ.

ໂດຍການໃຫ້ກຽດເຂົ້າຮ່ວມຂອງທ່ານ ເມກສະຫວັນ ພົມພິທັກ ປະທານສະພາປະຊາຊົນແຂວງ, ການຕ້ອນຮັບຂອງ ທ່ານ ປອ ບຸນມີ ພອນສະຫວັນ ອະທິການບໍດີມະຫາວິທະຍາໄລຈໍາປາສັກ ພ້ອມຄະນະ ແລະພະນັກງານຄູອາຈານ ແລະ ນັກສຶກສາເຂົ້າຮ່ວມຢ່າງຫຼວງຫຼາຍ.
ການເຄື່ອນໄຫວພົບປະຜູ້ມີສິດປ່ອນບັດເລືອກຕັ້ງ ຂອງຜູ້ສະໝັກຮັບເລືອກຕັ້ງ ສສຊ ແລະ ສສຂ ຄັ້ງນີ້ ກໍເພື່ອເຮັດໃຫ້ຜູ້ມີສິດເລືອກຕັ້ງໄດ້ຮູ້, ໄດ້ເຫັນໂສມໜ້າຕົວຈິງຂອງຜູ້ສະໝັກຮັບເລືອກຕັ້ງ ແລະ ກໍາໄດ້ຊີວະປະຫວັດການເຄື່ອນໄຫວວຽກງານຂອງຜູ້ສະໝັກຮັບເລືອກຕັ້ງ ເພື່ອເປັນບ່ອນອີງໃນການເລືອກຕັ້ງເອົາຜູ້ສະໝັກຮັບເລືອກຕັ້ງເປັນ ສສຊ ຊຸດທີ IX ແລະ ສສຂ ຊຸດທີ II.

ໃນພິທີໄດ້ຜ່ານຊີວະປະຫວັດຫຍໍ້ຂອງ ຜູ້ສະໝັກຮັບເລືອກຕັ້ງແຕ່ລະທ່ານ,ຟັງຄໍາສະເໜີຕົວ ແລະຄໍາປະຕິຍານຂອງແຕ່ລະທ່ານ ຊຶ່ງລ້ວນແຕ່ກ່າວວ່າ:ຖ້າຕົນເອງໄດ້ຮັບຄວາມໄວ້ວາງໃຈໄດ້ຮັບການເລືອກຕັ້ງເປັນ ສສຊ ແລະ ສສຂ ແລ້ວ ກໍຈະສືບຕໍ່ຕັ້ງໜ້າເຮັດໜ້າທີ່ເປັນຕົວແທນແຫ່ງສິດຜົນປເປັນໂຫຍດຂອງປະຊາຊົນ ແລະ ປະເທດຊາດຢ່າງແທ້ຈິງ ໂດຍສະເພາະໃນດ້ານການສຶກສາກໍຈະຄົ້ນຄ້ວານໍາສະເໜີຄໍາຄິດເຫັນຂອງປະຊາຊົນ,ຄູ-ອາຈານ ໄປຍັງລັດຖະບານ ກໍຄືພາກສ່ວນທີ່ກ່ຽວຂ້ອງເພື່ອປັບປຸງ ແລະພັດທະນາໃຫ້ດີຂື້ນໄປສູ່ຄຸນນະພາບ.