ວັນທີ 11 ກຸມພາ 2021 ທີ່ເມືອງຊົນນະບູລີ, ແຂວງສະຫວັນນະເຂດ, ໄດ້ເປີດການທ່ອງ ທ່ຽວແບບອະນຸລັກ ທ່ຽວຊົມ ໂອງ-ມັ່ງ ຂອງໂຄງການຄຸ້ມຄອງປ່າໄມ້ ແລະ ທີ່ດິນແບບຍືນຍົງ ຂອງ ລະບົບນິເວດປ່າໂຄກ ພາກໃຕ້ ຂອງລາວ ໂດຍມີ ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິ ກຳ ແລະ ປ່າໄມ້, ທ່ານ ວຽງທະວີສອນ ເທບປັນຍາ ຮອງເຈົ້າແຂວງສະຫວັນນະເຂດ, ທ່ານ ນາງ ແຄດເທີຣິນ ເຟືອງ (Catherine Phuong) ຮອງຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ (UNDP) ພ້ອມດ້ວຍບັນດາການນຳຂັ້ນແຂວງ ແລະ ບັນດາເມືອງເປົ້າໝາຍຂອງໂຄງການ ເຂົ້າຮ່ວມ.

ການທ່ອງທ່ຽວແບບອະນຸລັກ ທ່ຽວຊົມ ໂອງ-ມັ່ງ ໂດຍການມີສ່ວນຮ່ວມຂອງປະຊາຊົນທ້ອງຖິ່ນ ປະກອບ​ມີ​ລາຍການ​ທ່ອງ​ທ່ຽວ​ຕ່າງ​ເປັນ​ຕົ້ນ ການຕັ້ງແຄ້ມ, ຍ່າງທ່ຽວຊົມປ່າ, ຂີ່ລົດຖີບ, ການຂີ່ລົດທ່ຽວຊົມ ໂອງ-ມັ່ງ ຂອງນັກທ່ອງທ່ຽວເອງ, ບັນດາກິດຈະກຳ ດັ່ງກ່າວນີ້ ບໍ່ພຽງແຕ່ ຈະສາມາດສ້າງລາຍຮັບແກ່ປະຊາຊົນ, ແຕ່ຍັງຊ່ວຍອະນຸລັກມໍລະດົກທຳມະຊາດ ແລະ ວັດທະນະທຳຂອງຊຸມຊົນ ຜ່ານການມີສ່ວນຮ່ວມໃນການວາງແຜນ, ການພັດທະນາ ແລະ ການປະກອບສ່ວນເພື່ອຄວາມຜາສຸກຂອງເຂົາເຈົ້າ.

ເຂດອະນຸລັກ ໂອງ-ມັ່ງ ແຫ່ງຊາດ ທີ່ມີເນື້ອທີ່ 130.745 ເຮັກຕາ ແລະ ມີຄວາມສໍາຄັນເປັນພິເສດ ເຊິ່ງຖືກຈັດປະເພດເປັນເຂດປ່າສະຫງວນ ຂອງອົງການອະນຸລັກທຳມະຊາດໂລກ (IUCN) ປະເພດ 4 ເຊິ່ງລວມເອົາການປົກປັກຮັກສາສັດຊີວະນາໆພັນ ແລະ ການນໍາໃຊ້ທີ່ດິນແບບຍືນຍົງ ໂດຍຊຸມຊົນມີສ່ວນຮ່ວມ. ຊື່ຂອງປ່າສະຫງວນແຫ່ງຊາດແມ່ນໄດ້ມາຈາກ ໂອງ-ມັ່ງ ທີ່ເປັນສັດຫາຍາກ ແລະ ໃກ້ຈະສູນພັນ ທີ່ອາໄສຢູ່ໃນເຂດພື້ນທີ່ອະນຸລັກ ດັ່ງກ່າວ, ​ໂຄງການນີ້ ໄດ້ຊ່ວຍໃຫ້ຈຳນວນປະຊາກອນ ໂອງ-ມັ່ງ ເພີ່ມຂຶ້ນຈາກ 75 ຕົວໃນປີ 2016 ມາເປັນປະມານ 170 ຕົວໃນທ້າຍປີ 2020 ເຊິ່ງສະແດງໃຫ້ເຫັນວ່າ ການຮ່ວມມື ແລະ ການປູກຈິດສຳນຶກຂອງຊຸມຊົນໄດ້ຮັບໝາກຜົນທີ່ດີ.

​ໃນໂອກາດດຽວ, ກໍໄດ້ມີການມອບ-ຮັບຮູບປັ້ນຂອງໂອງ-ມັ່ງ ທີ່ຕັ້ງຢູ່ໃຈກາງເມືອງຊົນນະບູລີ, ​ເຊິ່ງ ຈະຊ່ວຍໃຫ້ປະຊາຊົນທ້ອງຖິ່ນ ກໍຄື ປະຊາຊົນທົ່ວປະເທດ ເຫັນ​ໄດ້ເຖິງຄວາມສຳຄັນຂອງສັດ ທີ່ເປັນສັນ ຍາລັກ ແລະ ໃກ້ຈະສູນພັນ ເພື່ອພ້ອມກັນປົກປັກຮັກສາ ໄວ້ໃຫ້ເຊັ່ນລູກເຊັ່ນຫລານໄດ້ເຫັນໃນອະນາຄົດ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)