ວັນທີ 13 ກຸມພາ 2021 ນີ້ ທີ່ນະຄອນ-ຫຼວງພະບາງ ທ່ານ ວຽງທອງ ຫັດສະຈັນ ຄະນະປະຈຳພັກເຂວງ ເລຂາພັກ ເຈົ້ານະຄອນ-ຫຼວງພະບາງ ໄດ້ໃຫ້ສຳພາດຕໍ່ສື່ມວນຊົນ ແຂວງຫຼວງພະບາງ ກ່ຽວກັບການກະກຽມຄວາມພ້ອມໃນບັ້ນເລືອກຕັ້ງ ສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II, ເຊິ່ງໃນໄລຍະນີ້ ແມ່ນໄດ້ມີການເຊື່ອມຊຶມບັນດານິຕິກຳຕ່າງໆເຊັ່ນ: ຄຳສັ່ງແນະນຳຂອງກົມການເມືອງສູນກາງພັກ, ຄຳສັ່ງແນະນຳຂອງຄະນະກຳມະການເລືອກຕັ້ງແຫ່ງຊາດ ແລະຄຳສັ່ງແນະນຳຂອງສະພາປະຊາຊົນແຂວງ ພ້ອມນີ້ຍັງໄດ້ມີການຕົກລົງ ແຕ່ງຕັ້ງຄະນະກຳມະການຮັບຜິດຊອບຂັ້ນການເລືອກຕັ້ງໃນຂັ້ນນະຄອນ-ຫຼວງພະບາງ ແລະແຕ່ງຕັ້ງພະນັກງານ ລົງສູ່ຮາກຖານເພື່ອເກັບກຳຂໍ້ມູນເບື້ອງຕົ້ນ ເປັນຕົ້ນແມ່ນກວດກາຈຳນວນພົນລະເມືອງທັງໝົດພາຍໃນນະຄອນຫຼວງພະບາງ ໂດຍສະເພາະແມ່ນແນໃສ່ຜູ້ທີ່ມີເກນອາຍຸ 18 ປີຂຶ້ນໄປ ພ້ອມທັງລາຍງານຕໍ່ຄະນະນຳຂັ້ນແຂວງຢ່າງເປັນປົກກະຕິ ໃນນີ້ຍັງໄດ້ຈັດຄັດເລືອກເອົາບັນດາພະນັກງານຫຼັກແຫຼ່ງຜູ້ທີ່ມີຄວາມຮູ້ຄວາມສາມາດ ເຂົ້າຮ່ວມຝຶກອົບຮົມໃຫ້ເຂົາເຈົ້າກາຍເປັນຄະນະກຳມະການ ແລະຄະນະຮັບຜິດຊອບການປ່ອນບັດເລືອກຕັ້ງໃນຊຸດນີ້ຢ່າງມີປະສິດທິພາບສູງ ສົມທົບກັບອົງການປົກຄອງໃນແຕ່ລະບ້ານ ພ້ອມກັນຈັດຕັ້ງປະຕິບັດໃນທົ່ວນະຄອນ-ຫຼວງພະບາງ ມີຈຳນວນ 79 ໜ່ວຍ ແລະມີຈຳນວນຜູ້ມີສິດເຂົ້າປ່ອນບັດເລືອກຕັ້ງ ຈຳນວນ 64.241 ຄົນ, ຍິງ 32.539 ຄົນ ໃນຈໍານວນພົນລະເມືອງທັງໝົດ 92.878 ຄົນ ໃນນັ້ນ ຈຳນວນ 64 ພັນກວ່າຄົນນີ້ ຍັງໄດ້ຂັດອອກ ບັນດາຈຳນວນທີ່ມີມາດຖານເງື່ອນໄຂບໍ່ຂົບຖ້ວນເຊັ່ນ: ຜູ້ອາຍຸສູງ, ຜູ້ເຈັບປ່ວຍ ເຫຼືອຜູ້ທີ່ມີສິດ ແລະ ສາມາດປ່ອນບັດຕົວຈິງມີ 58.214 ຄົນ, ຍິງ 30.149 ຄົນ ຕໍ່ກັບວຽກງານດັ່ງກ່າວ ໃນໄລຍະນີ້ ຍັງໄດ້ສຸມໃສ່ລົງສູ່ບັນດາບ້ານ ເພື່ອນຳເອົາບັນດາເອກະສານເຊື່ອມຊຶມຕໍ່ປະຊາຊົນບັນດາເຜົ່າ ໄດ້ຮັບຮູ້ ແລະ ເຂົ້າໃຈໃນບັ້ນເລືອກຕັ້ງໃນຄັ້ງນີ້ ນອກນັ້ນ ຍັງໄດ້ນຳພາປະຊາຊົນສ້າງຂະບວນການ ເປັນຕົ້ນແມ່ນການຊຸກຍູ້ໃຫ້ປະຊາຊົນສ້າງເສດຖະກິດຄອບຄົວໂດຍສຸມໃສ່ການຜະລິດໃຫ້ເປັນສິນຄ້າກ່ຽວກັບການປູກ, ການລ້ຽງ, ສ້າງຂະບວນການອະນາໄມ, ພ້ອມທັງຮັບປະກັນໃຫ້ການເລືອກຕັ້ງມີຄວາມສະຫງົບ ສາມຮ້ອຍສ່ວນຮ້ອຍ.