​ເມື່ອ​ບໍ່​ດົນ​ມາ​ນີ້, ທ່ານ ນາງ ສອນທິດາ ອຸນາພົມ ຜູ້ອຳນວຍການ ບໍລິສັດພັດທະນາແຫລ່ງທ່ອງທ່ຽວ ນໍ້າຕົກຕາດເຍືອງ ​ໄດ້​ມອບ​ທຶນ​ການ​ສຶກສາ ​​ແລະ ສະໜອງອຸປະກອນ​ການ​ຮຽນ-ການ​ສອນ ຈຳນວນ​ໜຶ່ງ ​ໃຫ້​ນ້ອງ​ນັກຮຽນ ຈຳນວນ 164 ຄົນ ຢູ່​ໂຮງຮຽນ​ປະຖົມ​ສົມບູນ ບ້ານ​ຫລັກ 40 ​ເມືອງ​ປາກ​ຊ່ອງ ​ແຂວງ​ຈຳປາ​ສັກ ​ເພື່ອ​ປະກອບສ່ວນ​ຊ່ວຍ​ໃຫ້​ນ້ອງ​ນັກຮຽນ​ຜູ້​ທຸກ​ຍາກ​ຂາດ​ເຂີນ ​ໄດ້​ມີ​ໂອກາດ​ໄດ້​ເຂົ້າ​ໂຮງຮຽນ​ເປັນ​ປົກກະຕິ.

ທ່ານ ນາງ ສອນທິດາ ອຸນາພົມ ​ໄດ້​​ໃຫ້ຮູ້​ວ່າ: ການ​ຊ່ວຍ​ເຫລືອ​ຊຸກຍູ້​ສົ່ງ​ເສີມ​ດ້ານ​ການ​ສຶກສາ​ແກ່​ນ້ອງ​ນັກຮຽນ ​ແມ່ນ​ກິດຈະກຳ​ໜຶ່ງ​ຂອງ​ແຜນ​ພັດທະນາ ແຫ່ລງທ່ອງທ່ຽວນໍ້າຕົກຕາດເຍືອງ ໃນຂົງເຂດບ້ານຫລັກ 40, ​ເຊິ່ງ​ໄລ​ຍະ​ຜ່ານ​ມາ ພວກ​ເຮົາ​ໄດ້​ເຕົ້າ​ໂຮມ​ປະຊາຊົນ​ ສ້າງ​ຕັ້ງ​ກຸ່ມ​ພື​ດຜັກ​ປອດ​ສານ​ພິດ ປະມານ 77 ຄອບຄົວ ​ເພື່ອ​ສ້າງ​ລາຍ​ຮັບ​ແກ່​ຄອບຄົວ, ​ແຕ່​ມາ​ໄລຍະ​ການລະບາດ​ຂອງ​ພະຍາດ​ໂຄ​ວິດ-19 ນີ້ ​ໂດຍ​ເຫັນ​ໄດ້​ຄວາມ​ຈຳ​ເປັນ ​ແລະ ຄວາມ​ຂາດ​ເຂີນ​ຂອງ​ພໍ່​ແມ່​ປະຊາຊົນ, ຕົນ​ເອງ​ຈຶ່ງ​ໄດ້​ໄປ​ພົວພັນ​ກັບ​ໂຮງຮຽນ​ດັ່ງກ່າວ​ ເພື່ອ​ຊ່ວຍ​ທຶນ​ກາ​ສຶກສາ​ແກ່​ນ້ອງນ້ອຍ ​ໄດ້​ມີ​ໂອກາດ​ມາ​ເຂົ້າ​ໂຮງຮຽນ​ໄດ້​ປົກກະຕິ ດ້ວຍ​ການ​ເຊັນ​ສັນຍາ​ ໃຫ້​ທຶນ​ການ​ສຶກສາ​ແກ່​ເຂົາ​ເຈົ້າ​ເປັນ​ໄລຍະ​ເວລາ 5 ປີ ​ໂດຍ​ບໍ່​ໃຫ້​ພໍ່​ແມ່​ນັກຮຽນ​ເສຍ​ຄ່າ​ໃຊ້​ຈ່າຍ​ຫຍັງ ພວກ​ເຮົາ​ຈະ​ເສຍ​ຄ່າ​ໃຊ້​ຈ່າຍ​ໃຫ້​ໝົດ, ສະ​ເພາະ​ສົກ​ປີ 2020-2021 ນີ້​ແມ່ນ​ມີ​ຈຳນວນ 164 ຄົນ ​ແລະ ປີ​ຕໍ່ໆ​ໄປ​ອາດ​ຈະ​ຫລາຍ​ກວ່າ​ນີ້.

ການ​ຊ່ວຍ​ເຫລືອ​ດັ່ງກ່າວ​, ບໍ່​ສະ​ເພາະ​ແຕ່​ທຶນ​ການ​ສຶກສາ​ເທົ່າ​ນັ້ນ ພວກ​ເຮົາ​ຍັງ​ໄດ້​ເຊື່ອມ​ໂຍງ​ກິດ ຈະກຳ​ໃຫ້​ລູກ​ຫລານ​ໄດ້​ໄປ​ທັດສະນະ​ສຶກສາ ຫລື ສ້າງ​ກິດຈະກຳ​​ແຫ​ລ່ງທ່ອງ​ທ່ຽວ​ຕາດ​ເຍືອງ ​ເພາະ​ຢູ່​ຕາດ​ເຍືອງ ມີ​ການສະ​ແດງ​ສິລະ​ປະ​ວັນນະຄະດີ, ມີ​ແຫ​ລ່ງທ່ອງ​ທ່ຽວ​ນໍ້າຕົກ, ຫັດຖະກຳ ​ແລະ ຫລາຍ​ສີສັນ​ຂອງ​ການທ່ອງທ່ຽວ ​ໂດຍ​ຈະ​ເຊື່ອມ​ໂຍງ​ແຕ່​ລະ​ກິດຈະກຳ​ໃຫ້​ນ້ອງ​ນັກຮຽນ, ​ໃຜ​ຮຽນ​ເກັ່ງ​ກໍ​ຊຸກ​ຍູ້​ສົ່ງ​ເສີມ​ໄປ​ເສັງ​ນັກຮຽນ​ເກັ່ງ, ​ໃຜ​ມີ​ພອນ​ສະຫວັນ​ດ້ານ​ສິລະ​ປະ, ຮ້ອງ​ເພງ ກໍ​ຊຸກຍູ້​ໃຫ້​ມາສະ​ແດງ​ຢູ່​ໃນ​ເວທີ​ຢູ່​ຕາດ​ເຍືອງ​ພວກ​ເຮົາ. ນອກຈາກ​ນັ້ນ, ພວກ​ເຮົາ​ຍັງ​ຈະ​ສ້າງ​ໃກ້​ນຳ​ທ່ຽວ​ກັບ​ທີ່ ​ເມື່ອ​ນັກ​ທ່ຽວ​ກ່ຽວ​ມາ​ກໍ​ຈະ​ໃຫ້​ລູກ​ຫລານ ນັກຮຽນ ປ4-ປ5 ​ເປັນ​ຜູ້ນຳ​ທ່ຽວ ​ແລະ ກິດຈະກຳ​ອື່ນໆ ​ທີ່​ພວກ​ເຮົາ​ຈະ​ສາມາດ​ຊ່ວຍ​ໄດ້.

ທ່ານ ນາງ ສອນທິດາ ອຸນາພົມ ຍັງ​ໃຫ້​ຮູ້​ອີກ​ວ່າ: ໃນປີ 2017 ຜ່ານມາ, ບໍລິ​ສັດ​ຂອງພວກເຮົາ ກໍໄດ້ ສ້າງໂຮງຮຽນປະຖົມຫລັງໜຶ່ງ ລວມມູນຄ່າການກໍ່ສ້າງ 1 ຕື້ກີບ ຢູ່ບ້ານ ຫລັກ 38 ​ແລະ ນັກຮຽນກໍໄດ້ຮຽນ​ເປັນ​ເວລາ 2-3 ປີແລ້ວ, ຄາດວ່າ​ຈະ​ຈັດ​ພິທີ​ມອບ-ຮັບ​ ຢ່າງ​ເປັນ​ທາງ​ການ​ໃນ​ທ້າຍ​ປີ 2021 ນີ້.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)