ໃນຕອນເຊົ້າວັນທີ 14 ກຸມພາ ນີ້ ຜູ້ສະໝັກເລືອກຕັ້ງສະມະຊິກສະພາແຫ່ງຊາດຊຸດທີ IX ປະຈຳເຂດເລືອກຕັ້ງທີ 16 #ແຂວງເຊກອງ ຈໍານວນ 9 ທ່ານ, ຍິງ 3 ທ່ານ ເລີ່ມເຄື່ອນໄຫວພົບປະ ແລະແນະນຳຕົວຕໍ່ຜູ້ມີສິດເລືອກຕັ້ງ ຢູ່ທີ່ໜ່ວຍເລືອກຕັ້ງ #ບ້ານດອນຊາ #ເມືອງທ່າແຕງ #ແຂວງເຊກອງ ເຊິ່ງນຳໂດຍ ທ່ານ ນາງ ຈັນຫອມ ມະຫາໄຊ ກຳມະການປະຈໍາພັກແຂວງ, ຮອງເລຂາພັກແຂວງ ໂດຍມີທ່ານ ສົມເພັດ ເອີດລັດດາ ກຳມະການພັກແຂວງ ເລຂາພັກເມືອງ ເຈົ້າເມືອງທ່າແຕງ ພ້ອມດ້ວຍນາຍບ້ານ ຕະຫຼອດຮອດຜູ້ມີສິດເລືອກຕັ້ງເຂົ້າຮ່ວມຢ່າງພ້ອມພຽງ.

ຊຶ່ງໃນຄາບບ່າຍຂອງວັນດຽວກັນ ຜູ້ສະໝັກເລືອກຕັ້ງ ສສຊ ກໍໄດ້ສືບຕໍ່ເຄື່ອນໄຫວພົບປະພໍ່ແມ່ປະຊາຊົນຜູ້ມີສິດເລືອກຕັ້ງ ຢູ່ໜ່ວຍເລືອກຕັ້ງບ້ານກົງຕາຢູນ-ບ້ານຫຼັກຂາວ ເມືອງທ່າແຕງ ຕື່ມອີກ ຊຶ່ງມີອຳນາດການປົກຄອງບ້ານ, ປະຊາຊົນ ກໍຄືຜູ້ມີສິດເລືອກຕັ້ງຫຼາຍກວ່າ 100 ຄົນ ໃຫ້ການຕ້ອນຮັບຢ່າງອົບອຸ່ນ.
ໃນການລົງພົບປະໂຄສະນາຫາສຽງຄັ້ງນີ້ ບັນດາຜູ້ສະໝັກຮັບເລືອກຕັ້ງ ສສຊ ໄດ້ຜັດປ່ຽນກັນຂຶ້ນສະເໜີຕົວລະດັບການສຶກສາ, ປະຫວັດການເຄື່ອນໄຫວໂດຍຫຍໍ້ ແລະໜ້າທີ່ຮັບຜິດຊອບຂອງຕົນໃນໄລຍະຜ່ານມາ ທັງນີ້ ເພື່ອໃຫ້ພໍ່ແມ່ປະຊາຊົນໄດ້ຮັບຊາບ ເພື່ອເປັນຂໍ້ມູນໃຫ້ປະຊາຊົນໄດ້ຕັດສິນໃຈທີ່ຈະເລືອກເອົາ ເພື່ອເປັນຕົວແທນປະຊາຊົນ ເຂົ້າປະຕິບັດໜ້າທີ່ໃນສະພາແຫ່ງຊາດ, ພ້ອມນີ້ ບັນດາຜູ້ສະໝັກເລືອກຕັ້ງຍັງໃຫ້ຄໍາໝັ້ນສານຍາຕໍ່ປະຊາຊົນວ່າຖ້າໄດ້ຮັບການເລືອກຕັ້ງເອົາເປັນສະມາຊິກສະພາແຫ່ງຊາດ ພ້ອມແລ້ວທີ່ຈະເປັນຕົວແທນຂອງປະຊາຊົນ ນໍາພາປະເທດຊາດ ເພື່ອນໍາເອົາຄໍາຄິດຄໍາເຫັນຂອງປະຊາຊົນສະເໜີຕໍ່ສະພາແຫ່ງຊາດ ເພື່ອໃຫ້ພິຈາລະນາແກ້ໄຂບັນຫາຕ່າງໆຂອງປະຊາຊົນໃຫ້ສອດຄ່ອງ.