ໃນວັນທີ 12-13 ກຸມພາ ນີ້, ຜູ້ສະໝັກຮັບເລືອກຕັ້ງສະມາຊິກສະພາປະຊາຊົນຂັ້ນແຂວງ ຊຸດທີ II ປະຈໍາເມືອງແກ່ນທ້າວ ແຂວງໄຊຍະບູລີ ໄດ້ລົງພົບປະຜູ້ມີສິດເລືອກຕັ້ງຢູ່ພາຍໃນເມືອງໂດຍໄດ້ແບ່ງເປັນ 2 ທີມ. ທີມທີ 1 ມີ ເບີ 1 ທ່ານ ບຸນສົງ ລາດຊະວົງ, ເບີ 2 ທ່ານ ອາລິຍະ ຂັນຕິ ແລະ ເບີ 4 ທ່ານ ນາງ ມະນີວັນ ກັນດີ. ທີມທີ 2 ມີເບີ 3 ທ່ານ ນາງ ຈັນທະສອນ ແສນພັນສິລິ ແລະ ເບີ 5 ທ່ານ ພັທ ບຸນຍູ້ ອິນທະວອນ. ເຊິ່ງໃນ 2 ວັນນີ້, ໄດ້ລົງພົບປະຜູ້ມີສິດເລືອກຕັ້ງຢູ່ 4 ຈຸດຂອງເມືອງຄື: ຈຸດບ້ານຫ້ວຍລ້າ, ບ້ານໜອງ, ບ້ານຫ້ວຍອີ່ຮຸມ ແລະ ຈຸດບ້ານກົກກະທອນ.

ໃນການລົງພົບໃນຄັ້ງນີ້, ຕ່າງໜ້າຜູ້ສະໝັກຮັບເລືອກຕັ້ງ ໄດ້ແຈ້ງໃຫ້ຜູ້ມີສິດເລືອກຕັ້ງຮັບຮູ້ ແລະ ເຂົ້າໃຈກ່ຽວກັບທາດແທ້ຂອງລະບອບການເມືອງ ເຊິ່ງແມ່ນລະບອບປະຊາທິປະໄຕປະຊາຊົນ, ຮັບຮູ້ ແລະ ເຂົ້າໃຈກ່ຽວກັບໂຄງປະກອບການຈັດຕັ້ງ ແລະ ບຸກຄະລາກອນຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II, ເຫັນໄດ້ສິດ, ໜ້າທີ່ ແລະ ພັນທະຂອງພົນລະເມືອງ ໃນການໄປໃຊ້ສິດປ່ອນບັດເລືອກຕັ້ງເອົາສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ຢ່າງຄົບຖ້ວນ, ຖືກຕ້ອງຕາມກົດໝາຍ ແລະ ລະບຽບການ. ຈາກນັ້ນ, ຜູ້ສະໝັກຮັບເລືອກຕັ້ງທັງ 5 ທ່ານ ໄດ້ແນະນໍາຕົນເອງ ແລະໃຫ້ຮູ້ການເຄື່ອນໄຫວວຽກງານໃນໄລຍະຜ່ານມາຈົນເຖິງປັດຈຸບັນ. ພ້ອມທັງແຈ້ງລາຍຊື່ ແລະ ການເຄື່ອນໄຫວວຽກງານຂອງຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 7 ແຂວງໄຊຍະບູລີ ເຊິ່ງມີຜູ້ສະໝັກທັງໝົດ 12 ທ່ານ, ຍິງ 2 ທ່ານ ແລະ ຈະໄດ້ເລືອກເອົາ 9 ທ່ານ. ຜູ້ສະໜັກຮັບເລືອກຕັ້ງສະມາຊິກສະພາປະຊາຊົນຂັ້ນແຂວງ ມີ 54 ທ່ານ, ຍິງ 19 ທ່ານ, ເລືອກເອົາ 32 ທ່ານ.