ນາງ ແກ້ວສອນ ອາຍຸ 18 ປີ ນັກຮຽນໂຮງຮຽນມັດທະຍົມສົມບູນ ເມືອງດາກຈຶງ #ແຂວງເຊກອງ ໄດ້ສະແດງຄວາມຮູ້ສຶກຜ່ານສື່ມວນຊົນແຂວງພວກເຮົາໃນວັນທີ13 ກຸມພາ ວ່າ: ຕົນເອງມີຄວາມດີໃຈຫຼາຍທີ່ສຸດທີ່ຈະໄດ້ໃຊ້ສິດປະຊາທິປະໄຕຂອງຕົນເລືອກສະມາຊິກສະພາ ໃນວັນທີ 21 ກຸມພາ ທີ່ຈະມາເຖິງ ໂດຍສ່ວນຕົວຂ້າພະເຈົ້າແມ່ນຈະເລືອກເອົາຜູ້ທີ່ມີຄວາມຮູ້ຄວາມສາມາດ, ມີຄຸນສົມບັດສິນທໍາປະຕິວັດ, ມີລະບຽບວິໄນ, ແບບແຜນການນໍາພາ-ຊີ້ນໍາທີ່ດີ, ມີຄວາມຈົ່ງຮັກພັກດີຕໍ່ປະເທດຊາດ ແລະສິ່ງສໍາຄັນຕ້ອງເຮັດໜ້າທີ່ເປັນຕົວແທນຂອງປະຊາຊົນໃນການຕັດສິນບັນຫາສໍາຄັນຕ່າງໆຂອງປະເທດຊາດ ກໍຄືທ້ອງຖິ່ນຢ່າງມີຄວາມຍຸຕິທໍາ ແລະຕົນເອງຢາກຂໍເຊີນຊວນປະຊາຊົນ, ໝູ່ເພື່ອນຜູ້ທີ່ມີອາຍຸກະສຽນແຕ່ 18 ປີຂຶ້ນໄປ ອອກໄປໃຊ້ສິດໃຊ້ສຽງຂອງຕົນ ເພື່ອເລືອກເອົາຜູ້ແທນທີ່ດີ, ມີມາດຖານເຂົ້ານັ່ງໃນສະພາ.

ດ້ານທ້າວ ກິດສະວົງ ອາຍຸ 20 ປີ ປະຊາຊົນ #ບ້ານດາກຕະອອກໃຫຍ່ #ເມືອງດາກຈຶງ ກໍໄດ້ສະແດງຄວາມຮູ້ສຶກຂອງຕົນວ່າ: ຕົນເອງແມ່ນມີຄວາມດີໃຈ ແລະພາກພູມໃຈຫຼາຍ, ທີ່ຈະໄດ້ໃຊ້ສິດປ່ອນບັດເລືອກເອົາສະມາຊິກສະພາແຫ່ງຊາດ ແລະສະມາຊິກສະພາປະຊາຊົນແຂວງ ຊຶ່ງເທື່ອນີ້ ກໍແມ່ນເປັນເທື່ອທໍາອິດ, ຂ້າພະເຈົ້າຈະເລືອກເອົາຄົນດີ, ຄົນມີຫົວຄິດປະດິດສ້າງ, ຮູ້ສຸກທຸກຂອງປະຊາຊົນ ແລະມີຄຸນສົມບັດທີ່ດີ, ເອົາໃຈໃສ່ສ້າງສາ ແລະພັດທະນາປະເທດຊາດບ້ານເມືອງໃຫ້ຮຸ່ງເຮືອງສີວິໄລກ້າວຂຶ້ນ.

ຂະນະທີ່ ທ່ານ ນາງ ວຽງລາພອນ ວັນມະວີ ອາຍຸ 41 ປີ ປະທານສະຫະພັນແມ່ຍິງບ້ານດາກຕະອອກໃຫຍ່ ກໍໄດ້ທັດສະນະວ່າ: ການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ແມ່ນປາງບຸນໃຫຍ່ທີ່ມີຄວາມໝາຍຄວາມສໍາຄັນທາງປະຫວັດສາດ, ມີຄວາມໝາຍຄວາມຕໍ່ປະຊາຊົນ ແລະຕໍ່ປະເທດຊາດ. ສະນັ້ນ, ຂໍເຊີນຊວນປະຊາຊົນລາວ ໂດຍສະເພາະພໍ່ແມ່ປະຊາຊົນບ້ານດາກຕະອອກພວກເຮົາຜູ້ທີ່ມີອາຍຸກະສຽນແຕ່ 18 ປີຂຶ້ນໄປ ທີ່ນອນໄຮ່ໄປສວນ ອອກມາໃຊ້ສິດຂອງຕົນຢ່າງເຕັມສ່ວນໃນວັນທີ 21 ກຸມພານີ້ ແລະບໍ່ຄວນນອນຫຼັບທັບສິດຕົນເອງເພາະພວກເຮົາແມ່ນພົນລະເມືອງລາວ ແລະສິ່ງສໍາຄັນເພື່ອເລືອກເອົາຄົນດີເຂົ້າໄປເຮັດວຽກໃນສະພາ.