ການສ້າງເສດຖະກິດຄອບຄົວ ດ້ວຍການຢຶດຖືເອົາອາຊີບປູກຝັງ-ລ້ຽງສັດ ເປັນອາຊີບສຳຮອງ ເພື່ອແກ້ໄຂຊີວິດການເປັນຢູ່ໃຫ້ຫຼຸດພົ້ນອອກຈາກຄວາມທຸກຍາກ ໂດຍຕິດພັນກັບວິຖີການດຳລົງຊີວິດຂອງປະຊາຊົນບັນດາເຜົ່າມາແຕ່ດົນນານຈົນເຖິງປັດຈຸບັນ, ນະໂຍບາຍຂອງພັກ-ລັດ ກໍໄດ້ວາງອອກໃນແຕ່ລະໄລຍະຊຸກຍູ້ສົ່ງເສີມຊາວກະສິກອນ ຊອກຂຸດຄົ້ນທ່າແຮງຕາມເງື່ອນໄຂ ເພື່ອສ້າງລາຍຮັບ ຕາມທິດທາງເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ຕ້ອງໄດ້ອີງໃສ່ເງື່ອນໄຂຂອງແຕ່ລະຄອບຄົວຂອງໃຜລາວ ຄືດັ່ງການສ້າງເສດຖະກິດຄອບຄົວຂອງ ທ່ານ ສິດ ວົງສົງຄອນ ອາຍຸ 53 ປີ ປັດຈຸບັນຢູ່ບ້ານຄອນທູດ ເມືອງປະທຸມພອນ ແຂວງຈຳປາສັກ.

ທ່ານ ສິດ ວົງສົງຄອນ ໄດ້ເວົ້າສູ່ຟັງວ່າ: ສະມາຊິກໃນຄອບຄົວມີ 7 ຄົນ, ແຮງງານຕົ້ນຕໍມີ 4 ຄົນ, ແຮງງານສຳຮອງມີ 2 ຄົນ ອາຊີບແຕ່ກ່ອນແມ່ນເຮັດນາປູກເຂົ້າ ແລະ ໄດ້ລ້ຽງສັດເປັນອາຊີບເສີມ ສ້າງລາຍຮັບເຂົ້າຄອບຄົວໃນເວລານັ້ນ ບໍ່ພຽງພໍຕໍ່ກັບຄວາມຕ້ອງການ ຊີວິດການເປັນຢູ່ຍັງຂາດໆເຂີນໆ ດັ່ງນັ້ນ, ຈຶ່ງໄດ້ຕັດສິນໃຈຫັນມາເຮັດສວນປູກໝາກໄມ້ໃຫ້ໝາກ ໃນປີ 2005 ຈຶ່ງໄດ້ນຳເອົາເງິນຈາກການສະສົມໄວ້ໃນເມື່ອກ່ອນ ໄປຊື້ທີ່ດິນໃນເນື້ອທີ່ 1,5 ເຮັກຕາ ແລ້ວບຸກເບີກເນື້ອທີ່ເຮັດການຜະລິດ ຫຼັງຈາກນັ້ນ, ໄດ້ນຳເອົາແນວພັນໝາກໄມ້ມາປູກໃສ່ ໂດຍມີໝາກເງາະ 70 ຕົ້ນ, ໝາກມັງຄຸດ 25 ຕົ້ນ ໝາກຖົ່ວລຽນ 5 ຕົ້ນ, ແລະ ມີໝາກລອງກອງ 2 ຕົ້ນ.

ແນວພັນແມ່ນຊື້ມາຈາກປະເທດໄທ ໃນລາຄາ 25.000 ກີບຕໍ່ 3 ຕົ້ນ, ຫຼັງຈາກປູກໄດ້ປະມານ 4 ປີ ຈຶ່ງໄດ້ເກັບໝາກໄມ້ຂາຍ ສຳລັບຂາຍທຳອິດແມ່ນບໍ່ໄດ້ຮັບຜົນດີເທົ່າທີ່ຄວນ ຕໍ່ຈາກນັ້ນມາແມ່ນເຫັນໄດ້ຢ່າງຈະແຈ້ງວ່າ ລາຍຮັບຈາກການຂາຍໝາກໄມ້ແມ່ນໄດ້ເພີ່ມຂຶ້ນເລື້ອຍໆ ຊຶ່ງປັດຈຸບັນນີ້ ສຳລັບລາຄາຂາຍສະເພາະຢູ່ກັບສວນ ແມ່ນ 10.000 ກີບຕໍ່ໂລ, ຖ້າຫາກວ່າຂາຍສົ່ງແມ່ນ 8.000 ກີບຕໍ່ໂລ ສຳລັບຕະຫຼາດຈຳໜ່າຍ ແມ່ນຕະຫຼາດເມືອງປະທຸມພອນ, ຕະຫຼາດປາກເຊ ແລະ ແຂວງອັດຕະປື ຈາກການຫັນມາເຮັດອາຊີບດັ່ງກ່າວນີ້ ສາມາດສ້າງລາຍຮັບເຂົ້າຄອບຄົວ 45 ລ້ານກີບ/ປີ ນອກຈາກນັ້ນ ຍັງໄດ້ລ້ຽງງົວອີກ 30 ກວ່າໂຕ ແລະ ໄດ້ເງິນຈາກການຂາຍງົວ 20 ລ້ານກີບ/ປີ, ສະເລ່ຍສ້າງລາຍຮັບເຂົ້າຄອບຄົວເປັນເງິນ 60 ລ້ານກີບຕໍ່ປີ ຊຶ່ງເຫັນໄດ້ວ່າຊີວິດການເປັນຢູ່ຂອງຄອບຄົວຂ້າພະເຈົ້າ ຖ້າທຽບໃສ່ເມື່ອກ່ອນ ແມ່ນມີການຫັນປ່ຽນດີຂຶ້ນ ຄອບຄົວມີລາຍຮັບໝັ້ນຄົງ ແລະ ສາມາດຫຼຸດພົ້ນອອກຈາກຄວາມທຸກຍາກໄດ້ ເປັນຄອບຄົວພັດທະນາ ແລະ ເປັນຄອບຄົວແບບຢ່າງ ໃນການປູກໝາກໄມ້ໃຫ້ໝາກຂາຍ ຊຶ່ງສະແດງອອກຄື: ມີເຮືອນຢູ່ຖາວອນ 1 ຫຼັງ, ມີລົດໄຖນາເດີນຕາມ 1 ຄັນ, ມີເຄື່ອງໃຊ້ໄຟຟ້າຢູ່ພາຍໃນເຮືອນຄົບຊຸດ, ມີທຶນໝູນວຽນ ແລະ ທຶນການສຶກສາໃຫ້ລູກ.

ທ່ານ ຍັງໄດ້ກ່າວເນັ້ນຕື່ມອີກວ່າ: ແຜນໃນຕໍ່ໜ້າຈະຂະຫຍາຍເນື້ອທີ່ດິນປູກໝາກໄມ້ຕື່ມປະມານ 3 ເຮັກຕາ ແລະ ຈະຂະຫຍາຍຕົ້ນໄມ້ຕື່ມຂຶ້ນ ເພື່ອໃຫ້ຜົນຜະລິດທັນກັບຄວາມຮຽກຮ້ອງຕ້ອງການຂອງຜູ້ບໍລິໂພກ ແລະ ຈະສູ້ຊົນຂະຫຍາຍການຜະລິດ ຕິດພັນກັບການຂະຫຍາຍຕະຫຼາດຈຳໜ່າຍ ໃຫ້ກວ້າງຂວາງກວ່າເກົ່າ. ທ່ານ ບຸນໂຮມ ແກ້ວຄຳພັນ ເລຂາພັກບ້ານ ນາຍບ້ານໆຄອນທູດ ໄດ້ຢັ້ງຢືນວ່າ: ບ້ານຄອນທູດ ເປັນບ້ານໜຶ່ງ ຫ່າງຈາກເທດສະບານເມືອງປະທຸມພອນ ປະມານ 35 ກິໂລແມັດ, ມີຈຳນວນພົນທັງໝົດ 1.459 ຄົນ ຍິງ 723 ຄົນ ມີ 262 ຫຼັງຄາເຮືອນ, ເນື້ອທີ່ທັງໝົດ 547,45 ເຮັກຕາ ປະຊາຊົນບ້ານຄອນທູດ ແມ່ນປູກເຂົ້າເປັນອາຊີບຕົ້ນຕໍ ແລະ ປູກຝັງ – ລ້ຽງສັດຄ້າຂາຍ ແລະ ບໍລິການ ເປັນສຳຮອງ.

ສໍາລັບຄອບຄົວຂອງທ່ານ ສິດ ວົງສົງຄອນ ແມ່ນຄອບຄົວໜຶ່ງ ທີ່ປະສົບຜົນສຳເລັດ ໃນການປູກໝາກໄມ້ໃຫ້ໝາກ ເປັນຕົ້ນ ໝາກເງາະ, ໝາກຖົ່ວລຽນ ແລະ ໝາກມັງຄຸດ ແລະ ເປັນແບບຢ່າງທີ່ດີໃນການເຮັດກະສິກຳປູກຝັງ ຄວາມສຳເລັດດັ່ງກ່າວ ຍ້ອນພາຍໃນຄອບຄົວມີຄວາມສາມັກຄີ, ດຸໝັ່ນຂະຫຍັນພຽນ, ກ້າເຮັດ, ກ້າຕັດສິນໃຈ ແລະ ຮູ້ໝູນໃຊ້ທ່າແຮງບົ່ມຊ້ອນທີ່ຕົນເອງມີ ສາມາດເຮັດໃຫ້ຄອບຄົວປະສົບຜົນສຳເລັດ ທັງເປັນແບບຢ່າງທີ່ດີໃຫ້ແກ່ຊາວກະສິກອນ ປັດຈຸບັນ ຜູ້ກ່ຽວສາມາດສ້າງລາຍຮັບເຂົ້າຄອບຄົວໄດ້ປະມານ 50-70 ລ້ານກີບຕໍ່ປີ. ໃນນາມຕາງໜ້າໃຫ້ອໍານາດການປົກຄອງບ້ານ ຂ້າພະເຈົ້າຂໍຢັ້ງຢືນວ່າ ທ່ານ ສິດ ວົງສົງຄອນ ເປັນຄອບຄົວຕົວແບບ ຢູ່ພາຍໃນບ້ານຄອນທູດ ເມືອງປະທຸມພອນ ແຂວງຈຳປາສັກ.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)