ໃນວັນທີ 13 ກຸມພາ ນີ້, ຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ປະຈໍາເຂດເລືອກຕັ້ງທີ16 ແຂວງເຊກອງ ໄດ້ສໍາເລັດການລົງເຄື່ອນໄຫວໂຄສະນາຫາສຽງນໍາປະຊາຊົນຢູ່ໜ່ວຍປ່ອນບັດທີ 8 #ບ້ານດາກຕະອອກໃຫຍ່ #ເມືອງດາກຈຶງ #ແຂວງເຊກອງ ຊຶງເປັນຈຸດທີ3 ແລະເປັນຈຸດສຸດທ້າຍຂອງເມືອງ ໂດຍການນໍາພາຂອງທ່ານ ສີສຸພັນ ມະຫາວົງ,ກຳມະການພັກແຂວງ, ຫົວໜ້າຫ້ອງວ່າການແຂວງ, ຄະນະກໍາມະການເລືອກຕັ້ງຂັ້ນແຂວງ, ຊຶ່ງມີຜູ້ມີສິດປ່ອນບັດເຂົ້າຮ່ວມຢ່າງຫຼວງຫຼາຍ.
ໃນການລົງພົບປະໂຄສະນາຫາສຽງຄັ້ງນີ້ ບັນດາຜູ້ສະໝັກຮັບເລືອກຕັ້ງ ສສຂ ໄດ້ຜັດປ່ຽນກັນຂຶ້ນສະເໜີຕົວລະດັບການສຶກສາ, ປະຫວັດການເຄື່ອນໄຫວໂດຍຫຍໍ້ ແລະໜ້າທີ່ຮັບຜິດຊອບຂອງຕົນໃນໄລຍະຜ່ານມາ ກໍຄືປະຈຸບັນ ເພື່ອໃຫ້ພໍ່ແມ່ປະຊາຊົນໄດ້ຮັບຊາບ ເພື່ອເປັນຂໍ້ມູນໃຫ້ປະຊາຊົນໄດ້ຕັດສິນໃຈທີ່ຈະເລືອກເອົາ ເພື່ອເປັນຕົວແທນຂອງຕົນເຂົ້າປະຕິບັດໜ້າທີ່ໃນສະພາແຫ່ງຊາດ ຊຸດທີIX ເຂດເລືອກຕັ້ງທີ16 ແຂວງເຊກອງ.


ໜ່ວຍເລືອກຕັ້ງທີ 8 ປະກອບມີບ້ານດາກຕະອອກໃຫຍ່ ແລະບ້ານດາກມັນ, ມີ 144 ຫຼັງຄາເຮືອນ 113 ຄອບຄົວ, ມີພົນລະເມືອງທັງໝົດ 1.019 ຄົນ, ຍິງ 360 ຄົນ, ໃນນີ້ຈໍານວນຜູ້ມີສິດປ່ອນບັດເລືອກຕັ້ງໃນເກນອາຍຸ 18 ປີຂຶ້ນໄປ 344 ຄົນ, ຍິງ 181 ຄົນ. ການລົງພົບປະສະເໜີຕົວ ແລະ ໂຄສະນາຫາສຽງຮັບສະໝັກເປັນສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ16 ແຂວງເຊກອງ ແມ່ນຈະໄດ້ລົງຢູ່ 4 ເມືອງທົ່ວແຂວງ, ຊຶ່ງຈະໄດ້ດຳເນີນໄປຮອດວັນທີ 19 ກຸມພາ 2021 ຈຶ່ງຈະສຳເລັດ.