ມື້ທີ 5 ໃນການລົງເຄື່ອນໄຫວສະເໜີຕົວ ຂອງຜູ້ສະໝັກຮັບເລືອກຕັ້ງ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 12 ແຂວງຄຳມ່ວນ ທີ່ໄດ້ເຄື່ອນໄຫວຢູ່ບັນດາເມືອງຂອງແຂວງ. ເຊິ່ງໃນວັນທີ 13 ກຸມພາ 2021 ໄດ້ເຄື່ອນໄຫວຢູ່ເມືອງຍົມມະລາດ ເປັນກຽດເຂົ້າຮ່ວມ ຕິດຕາມການລົງສະເໜີຕົວໃນຄັ້ງນີ້ໂດຍ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ປະທານຄະນະກໍາມະການເລືອກຕັ້ງຂັ້ນແຂວງ, ມີການນຳຫລັກແຫລ່ງ ແລະ ພະນັກງານ, ທະຫານ – ຕໍາຫລວດ ຕະຫຼອດຮອດປະຊາຊົນບັນດາເຜົ່າ ແລະ ຜູ້ສະໝັກຮັບເລືອກຕັ້ງ ສສຂ ເມືອງຍົມມະລາດ ເຂົ້າຮ່ວມຕ້ອນຮັບດ້ວຍບັນຍາກາດອັນອົບອຸ່ນ.

ພາຍຫລັງໄດ້ຮັບຟັງການລາຍງານ ການກະກຽມຄວາມພ້ອມທຸກດ້ານໃຫ້ແກ່ບັ້ນເລືອກຕັ້ງ ຈາກທ່ານ ບຸນທັນ ສຸວັນນະລາດ ເຈົ້າເມືອງຍົມມະລາດ, ບັນດາຜູ້ສະໝັກຮັບເລືອກຕັ້ງກໍ່ໄດ້ຜັດປ່ຽນກັນຂຶ້ນພົບປະແນະນຳຕົນເອງ ແລະ ຜົນງານການເຄື່ອນໄຫວໃນໄລຍະຜ່ານມາ, ທັງໄດ້ຍົກໃຫ້ເຫັນເຖິງຄວາມໝາຍ ຄວາມສຳຄັນຂອງການເລືອກຕັ້ງ, ໂດຍສະເພາະແມ່ນບົດບາດຂອງສະພາແຫ່ງຊາດ ຕໍ່ກັບການປັບປຸງລະບົບກົງຈັກການຈັດຕັ້ງລັດໃຫ້ມີຄວາມໜັກແໜ້ນເຂັ້ມແຂງ, ຕິດພັນກັບການພັດທະນາເສດຖະກິດ – ສັງຄົມ ຕາມແນວທາງນະໂຍບາຍຂອງພັກ ກໍ່ຄືການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກໃຫ້ເຂົ້າສູ່ຊີວິດຕົວຈິງ ໂດຍສະເພາະບັນດາຄາດໝາຍ ແລະ ວິໄສທັດຂອງພັກວາງອອກແຕ່ນີ້ຮອດປີ 2025. ແນໃສ່ເຮັດໃຫ້ປະເທດຊາດໄດ້ຮັບການພັດທະນາກ້າວຂຶ້ນ.

ສຳລັບເມືອງຍົມມະລາດ ປະກອບມີ 46 ບ້ານ, ມີພົນລະເມືອງທັງໝົດ 35.799 ຄົນ, ຍິງ 17.860 ຄົນ, ມີໜ່ວຍປ່ອນບັດທັງໝົດ 29 ຈຸດ, ຜູ້ມີສິດປ່ອນບັດ 22.148 ຄົນ, ຍິງ 11.517 ຄົນ, ຜູ້ມີໜ້າປ່ອນບັດຕົວຈິງ 19.959 ຄົນ, ຍິງ 9.900 ກວ່າຄົນ. ໂອກາດ ເຂົ້້າຮ່ວມຕິດຕາມການລົງສະເໜີຕົວຂອງຄະນະຜູ້ສະໝັກຮັບເລືອກຕັ້ງຄັ້ງນີ້ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ກໍ່ໄດ້ມີຄຳເຫັນ ໂດຍໄດ້ຕີລາຄາສູງຕໍ່ຄວາມເອົາໃຈໃສ່ຂອງຄະນະພັກອໍານາດການປົກຄອງເມືອງ, ບ້ານທີ່ໄດ້ສ້າງເງື່ອນໄຂອໍານວຍຄວາມສະດວກໃນທຸກດ້ານໃຫ້ແກ່ການເຄື່ອນໄຫວຂອງຜູ້ສະໝັກຮັບເລືອກຕັ້ງ, ທີ່ສໍາຄັນຍັງໄດ້ເນັ້ນໜັກໃນບາງບັນຫາກ່ຽວກັບການເລືອກຕັ້ງ ເພື່ອແນໃສ່ຮັບປະກັນການມາໃຊ້ສິດປະຊາທິປະໄຕຂອງປະຊາຊົນກໍ່ຄືຜູ້ມີສິດປ່ອນບັດເລືອກຕັ້ງໃຫ້ບັນລຸຜົນຕາມລະດັບຄາດໝາຍ. ສຳລັບຈຸດລົງເຄື່ອນໄຫວສະເໜີຕົວຂອງບັນດາຜູ້ຮັບສະໝັກເລືອກຕັ້ງ ສສຊ ຊຸດທີ IX ຢູ່ເມືອງຍົມມະລາດ ແມ່ນໄດ້ກໍານົດເອົາ 3 ຈຸດ, ໃນຕອນເຊົ້າໄດ້ຈັດເປັນຈຸດຽວ ຢູ່ສະໂມສອນຂອງເມືອງ, ຕອນບ່າຍຈັດເປັນ 2 ຈຸຄື: ບ້ານຫາງການ ແລະ ບ້ານດອນເປືອຍ.