ຄະນະຜູ້ຮັບສະໝັກເລືອກຕັ້ງ ເປັນສະມາຊິກສະພາແຫ່ງຊາດ (ສສຊ) ຊຸດທີ IX ປະຈຳເຂດ ເລືອກຕັ້ງທີ 14 ແຂວງສາລະວັນ ໄດ້ເຄື່ອນໄຫວໂຄສະນາຫາສຽງຢູ່ເມືອງຄົງເຊໂດນ ນັບແຕ່ວັນທີ 13 – 14 ກຸມພາ 2021 ຊຶ່ງເປັນຈຸດທີ 12 ຂອງແຂວງ.

ເມືອງຄົງເຊໂດນ ໄດ້ກຳນົດຈຸດໂຄສະນາຫາສຽງ ຈຳນວນ 3 ຈຸດຄື: ຈຸດເທດສະບານເມືອງ, ຈຸດບ້ານເລົ່າ ແລະ ຈຸດບ້ານກຸດມີໄຊ ຊຶ່ງມີພໍ່ແມ່ປະຊາຊົນ ເຂົ້າຮ່ວມທັງໝົດເກືອບ 1 ພັນຄົນ ກວມ 27 ບ້ານ ແລະ ກວມເອົາ 20 ໜ່ວຍບັດ. ທົ່ວເມືອງຄົງ ເຊໂດນ ປະກອບມີ 84 ບ້ານ, ມີພົນລະເມືອງທັງໝົດ 6 ໝື່ນກວ່າຄົນ, ຈຳນວນຜູ້ມີສິດປ່ອນບັດເລືອກ ຕັ້ງທັງໝົດ 31.162 ຄົນ, ມີ 59 ໜ່ວຍປ່ອນບັດເລືອກຕັ້ງ.ການລົງເຄື່ອນໄຫວໂຄສະນາຫາສຽງຄັ້ງນີ້ ຜູ້ສະໝັກເລືອກຕັ້ງ ສສຊ ຍັງໄດ້ຮັບຟັງການລາຍງານ ການກະກຽມດ້ານຄວາມພ້ອມຕ່າງໆໃຫ້ແກ່ການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ໃນແຕ່ ລະຈຸດ ຈາກຄະນະຮັບຜິດຊອບໜ່ວຍປ່ອນບັດເລືອກຕັ້ງ, ໂອກາດດຽວກັນນັ້ນ ປະຊາຊົນບັນດາເຜົ່າ, ຜູ້ມີສິດເລືອກຕັ້ງ ກໍໄດ້ຮັບຟັງຈຸດປະສົງ ແລະ ລະດັບຄາດໝາຍໃນບັ້ນເລືອກຕັ້ງຊຸດນີ້ເປັນຕົ້ນ ເພື່ອເປັນການປັບປຸງລະບອບປະຊາທິປະໄຕ ຈາກປະຊາຊົນ ໂດຍປະຊາຊົນ ແລະ ເພື່ອຜົນປະໂຫຍດ ຂອງປະຊາຊົນ, ເປັນພາກສ່ວນໜຶ່ງໃນການປັບປຸງດ້ານບຸກຄະລາກອນ ຂອງສະພາແຫ່ງຊາດ ທັງເປັນຄວາມຮັບຜິດຊອບຂອງທົ່ວປວງຊົນ.

ຈາກນັ້ນ, ບັນດາທ່ານຜູ້ລົງສະໝັກ ກໍໄດ້ສະແດງຄວາມ ຢື້ຢາມຖາມຂ່າວພໍ່ແມ່ປະຊາຊົນບັນດາເຜົ່າຊາວເມືອງຄົງເຊໂດນ ແລະ ໄດ້ຜັດປ່ຽນກັນນໍາສະເໜີຊື່, ປະຫັວດການເຄື່ອນໄຫວຂອງຕົນເອງ, ໜ້າທີ່ຄວາມຮັບຜິດຊອບ ຄຽງຄູ່ກັນນັ້ນກໍໄດ້ນໍາເອົາແນວທາງ ນະໂຍບາຍຂອງພັກ, ລະບຽບກົດໝາຍຂອງລັດມາເຜີຍແຜ່ໃຫ້ ປະຊາຊົນ ໄດ້ຮັບຮູ້ ແລະ ເຂົ້າໃຈເຖິງສິດ, ໜ້າທີ່ ແລະ ພັນທະຂອງພົນລະເມືອງໃນການໄປໃຊ້ສິດປ່ອນບັດເລືອກຕັ້ງ ເພື່ອເປັນບ່ອນອີງໃນການ ເລືອກຕັ້ງເອົາສະມາຊິກສະພາແຫ່ງຊາດເຂົ້າໃນສະພາ, ທັດສະນະ, ຄວາມມຸ້ງຫວັງ, ແນວຄວາມ ຄິດຂອງບັນດາທ່ານ ທີ່ຈະຊ່ວຍໃນການຊຸກຍູ້ການສ້າງສາພັດທະນາປະເທດຊາດ ເວົ້າສະເພາະກໍ ຄືຊາວແຂວງສາລະວັນ.

ການລົງຫາສຽງຄັ້ງນີ້, ນຳໂດຍ ທ່ານ ສີເຮັງ ຫອມສົມບັດ ຮອງເລຂາພັກແຂວງ ຜູ້ສະໝັກ ນ້ຳເບີ 1, ຫົວໜ້າຄະນະ ພ້ອມດ້ວຍຜູ້ລົງຮັບສະໝັກທັງໝົດ, ໂດຍການເຂົ້າຮ່ວມຕິດຕາມ ແລະ ນຳພາຂອງ ທ່ານ ຈັນສະໝອນ ພົມມະແສງ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມ ແຂວງສາລະວັນ, ທ່ານຄະນະປະຈຳພັກແຂວງ, ກຳມະການພັກແຂວງ, ຄະນະຮັບຜິດຊອບບັ້ນເລືອກ ຕັ້ງຂັ້ນເມືອງ ພ້ອມດ້ວຍພາກສ່ວນທີ່ກ່ຽວຂ້ອງ ແລະ ພໍ່ແມ່ປະຊາຊົນໃນແຕ່ລະກຸ່ມເຂົ້າຮ່ວມ.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)