ວັນທີ 12 ກຸມພາ 2021 ນີ້ ຂະບວນການລົງຫາສຽງຂອງບັນດາຜູ້ສະໝັກເລືອກຕັ້ງເປັນ ສະມາຊິກສະພາແຫ່ງຊາດ (ສສຊ) ຊຸດທີ IX ປະຈຳເຂດເລືອກຕັ້ງທີ16 ແຂວງເຊກອງ ສືບຕໍ່ເຄື່ອນໄຫວສະເໜີຕົວ ແລະໂຄສະນາຫາສຽງຢູ່ໜ່ວຍເລືອກຕັ້ງທີ2 ແລະໜ່ວຍທີ3 ເມືອງດາກຈຶງ, ເຊິ່ງນຳພາໂດຍ ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ປະທານຄະນະກຳມະການເລືອກຕັ້ງຂັ້ນແຂວງ, ພ້ອມດ້ວຍບັນດາທ່ານຜູ້ສະໝັກ ສສຊ ໂດຍການຕ້ອນຮັບຂອງທ່ານ ໄລສວນ ມິດສຸວັນ ເຈົ້າເມືອງໆດາກຈຶງ ພ້ອມດ້ວຍຄະນະກຳມະການເລືອກຕັ້ງຂັ້ນເມືອງ, ພະນັກງານ-ລັດຖະກອນ, ທະຫານ-ຕໍາຫຼວດ, ອຳນາດການປົກຄອງບ້ານ, ຕະຫຼອດຮອດປະຊາຊົນຜູ້ມີສິດປ່ອນບັດເຂົ້າຮ່ວມຮັບຟັງຢ່າງຫຼວງຫຼາຍ.

ຫຼັງຈາກ ທີ່ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ໄດ້ກ່າວເປີດພິທີໂຄສະນາຫາສຽງແລ້ວ, ຈາກນັ້ນ, ບັນດາທ່ານຜູ້ສະໝັກ ສສຊ ນັບຕັ້ງແຕ່ນໍ້າເບີ 1 ຈົນເຖິງນໍ້າເບີ 9 ກໍໄດ້ສະເໜີປະຫວັດໂດຍຫຍໍ້ ກ່ຽວກັບການເຄື່ອນໄຫວ ແລະໜ້າທີ່ຄວາມຮັບຜິດຊອບ ໃນແຕ່ລະໄລຍະ ແລະ ຄວາມມຸ້ງຫວັງ, ແນວຄວາມຄິດຂອງຕົນເອງ ທີ່ຈະນຳພາສ້າງສາພັດທະນາແຂວງເຊກອງ ໃນຕໍ່ໜ້າໃຫ້ມີຄວາມຈະເລີນ ຮຸ່ງເຮືອງສີວິໄລ, ທັງນີ້ເພື່ອໃຫ້ຜູ້ມີສິດເລືອກຕັ້ງໄດ້ຮັບຮູ້ ແລະນຳໄປພິຈາລະນາສຸມຈິດສຸມໃຈ ໃຊ້ສິດຂອງຕົນປ່ອນບັດ ຄັດເລືອກເອົາບຸກຄົນຜູ້ທີ່ມີມາດຖານ ແລະເງື່ອນໄຂກວ່າໝູ່ ແລະສາມາດເປັນຕົວແທນຂອງປະຊາຊົນບັນດາເຜົ່າ ປົກປ້ອງສິດຜົນປະໂຫຍດຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນຢ່າງແທ້ຈິງ.

ພ້ອມກັນນັ້ນຜູ້ຮັບສະໝັກເປັນສະມາຊີກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ16 ແຂວງເຊກອງ ຍັງໄດ້ໃຫ້ຄຳໜັ້ນສັນຍາວ່າ ຖ້າຫາກໄດ້ຮັບເລືອກເຂົ້າເປັນສະມາຊິກສະພາແຫ່ງຊາດທີIX ແມ່ນ ພ້ອມແລ້ວທີ່ຈະປະຕິບັດຕາມສິດ ແລະໜ້າທີ່ ພາລະບົດບາດຂອງຕົນເອງໃນຖານະເປັນຕົວແທນແຫ່ງສິດຜົນປະໂຫຍດຂອງປະຊາຊົນ ແລະຈະນຳເອົາບັນດາບັນຫາຕ່າງໆຂອງປະຊາຊົນຢູ່ທ້ອງຖິ່ນ ສະເໜີຕໍ່ກອງປະຊຸມສະພາແຫ່ງຊາດແຕ່ລະສະໄໜ, ພ້ອມນັ້ນກໍ່ຍັງຈະໄດ້ສະເໜີ ແລະ ປັບປຸງແກ້ໄຂບັນດານິຕິກຳ, ກົດໝາຍຕ່າງໆ, ພິຈາລະນາຕົກລົງບັນຫາຕ່າງໆຂອງຊາດ, ຂອງທ້ອງຖິ່ນ.

ສໍາລັບໜ່ວຍປ່ອນບັດທີ2 ມີ 2ບ້ານ (ບ້າານດາກຈຶງ ແລະບ້ານງອນດອນ) ແລະໜ່ວຍທີ3 ມີ2ບ້ານ (ບ້ານໂນນສະຫວັນ ແລະບ້ານດາກບອງ), ຊຶ່ງທັງສອງໜ່ວຍປ່ອນບັດ ມີຜູ້ມີສິດປ່ອນບັດທັງໝົດ 1.392 ຄົນ, ຍິງ 898 ຄົນ.