ໃນຕອນບ່າຍວັນທີ 15 ກຸມພາ 2021 ນີ້ທີ່ສະໂມສອນເມືອງ ຈໍາປາສັກໄດ້ຈັດພິທີຕ້ອນຮັບການພົບປະ ແລະ ໂຄສະນາຫາສຽງຂອງຄະນະຜູ້ສະໝັກຮັບເລືອກຕັ້ງ ສະມາຊິກສະພາແຫ່ງຊາດ (ສສຊ) ຊຸດທີ IX ເຂດເລືອກຕັ້ງທີ 15 ແຂວງຈໍາປາສັກ ຈໍານວນ 10 ທ່ານ   ເຊິ່ງນໍາໂດຍ ທ່ານ ສົມມາດ ພົນເສນາ ກໍາມະການສູນກາງພັກ, ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ຄະນະຜູ້ສະໝັກ ສສຂ ເມືອງຈໍາປາສັກຈໍານວນ 5 ທ່ານ ນໍາໂດຍ ທ່ານ ສົມສີ ມະນີນິນ ກໍາມະການພັກແຂວງ ຜູ້ສະໝັກ ສສຂ ເມືອງຈໍາປາສັກ .ໃຫ້ກຽດຮັບມີທ່ານ ສະຫວາດ ແກ້ວບັນດິດ ກໍາມະການພັກແຂວງ ເລຂາພັກເມືອງ ເຈົ້າເມືອງໆຈໍາປາສັກ ພ້ອມດ້ວຍຄະນະ ແລະພະນັກງານ,ລັດຖະກອນໃຫ້ການຕ້ອນຮັບຢ່າງອົບອຸ່ນ.

ໃນພິທີໄດ້ອ່ານຊີວະປະຫວັດຫຍໍ້ຂອງ ຜູ້ສະໝັກຮັບເລືອກຕັ້ງແຕ່ລະທ່ານ, ຟັງຄໍາສະເໜີຕົວ ແລະ ຄໍາປະຕິຍານຂອງແຕ່ລະທ່ານ ຊຶ່ງລ້ວນແຕ່ກ່າວວ່າ: ຖ້າຕົນເອງໄດ້ຮັບຄວາມໄວ້ວາງໃຈໄດ້ຮັບການເລືອກຕັ້ງເປັນ ສສຊ ແລະ ສສຂ ແລ້ວ ກໍຈະສືບຕໍ່ຕັ້ງໜ້າເຮັດໜ້າທີ່ເປັນຕົວແທນແຫ່ງສິດຜົນປເປັນໂຫຍດຂອງປະຊາຊົນ ແລະ ປະເທດຊາດຢ່າງແທ້ຈິງ.
ທ່ານ ສະຫວາດ ແກ້ວບັນດິດ ເຈົ້າເມືອງໆຈໍາປາສັກ ປະທານຄະນະກໍາມະການເລືອກຕັ້ງຂັ້ນເມືອງ ໄດ້ກ່າວວ່າ: ການກະກຽມໃຫ້ແກ່ການເລືອກຕັ້ງ ສສຊ ແລະ ສສຂ ຢູ່ເມືອງຈໍາປາສັກໃນຄັ້ງນີ້ ແມ່ນມີຄວາມພ້ອມແລ້ວ 100%, ທົ່ວເມືອງມີ 73 ບ້ານ, 5 ກຸ່ມ,11. 748 ຄອບຄົວ. ພົນລະເມືອງ 69.948 ຄົນ ໜ່ວຍປ່ອນບັດທັງໝົດ 45 ໜ່ວຍ, ຜູ້ມີສິດປ່ອນບັດທັງໝົດ 30.451 ຄົນ,ຍິ່ງ 15.861 ຄົນ.ຄາດຄະນເນການປ່ອນບັດເລືອກຕັ້ງຈະໃຫ້ສໍາເລັດຕາມລະດັບຄາດໝາຍ 300%.
ໃນພິທີນອກຈາກແນະນໍາຕົວ ເພື່ອທໍາຄວາມຮູ້ຈັກຮັກແພງລະຫວ່າງຜູ້ສະໝັກ ສສຊ ແລະ ສສຂ ແລ້ວ ທາງອົງການປົກຄອງເມືອງຍັງໄດ້ຈັດພິທີບາສີສູ່ຂວັນແກ່ຄະນະຜູ້ສະໝັກ ແລະ ພະນັກງານເຊິ່ງກັນ ແລະ ກັນຕາມຮີດຄອງປະເພນີອີກດ້ວຍ.