ຄະນະຜູ້ລົງຮັບສະຫມັກເປັນສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 14 ແຂວງສາລະວັນ ຈຳນວນ 12 ທ່ານ, ສືບຕໍ່ເຄື່ອນໄຫວໂຄສະນາຫາສຽງຢູ່ເມືອງລະຄອນເພັງ ເປັນເມືອງທີ 4, ພາຍຫຼັງສໍາເລັດແລ້ວ 3 ເມືອງພູດອຍ ຄື: ເມືອງສະໝ້ວຍ, ຕະໂອ້ຍ ແລະ ເມືອງຕຸ້ມລານ. ມາຮອດປັດຈຸບັນ ການລົງເຄື່ອນໄຫວເປັນຈຸດທີ 8. ໃນວັນທີ 12 ກຸມພາ 2021, ຢູ່ທີ່ສະໂມສອນເມືອງ, ນຳໂດຍ ທ່ານ ສີເຮັງ ຫອມສົມບັດ ຮອງເລຂາພັກແຂວງ ຜູ້ສະໝັກນ້ຳເບີ 1, ຫົວໜ້າຄະນະທິມງານ ພ້ອມດ້ວຍຄະນະ, ມີ ທ່ານ ຈັນສະໝອນ ພົມມະແສງ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ, ທ່ານ ພັອ ພູວັນ ພິມມະຈັນ ຄະນະປະຈຳພັກແຂວງ ຫົວໜ້າການເມືອງ ກອງບັນຊາການທະຫານແຂວງ, ທ່ານ ທອງດີ ຈັນທະວົງ ເຈົ້າເມືອງລະຄອນເພັງ ແລະ ບັນດາທ່ານຄະນະປະຈຳພັກແຂວງ, ການນຳຂັ້ນເມືອງ, ພະນັກງານຫຼັກແຫຼ່ງ ແລະ ອົງການຄອງບ້ານເທສະບານເຂົ້າຮ່ວມ.

ທົ່ວເມືອງລະຄອນເພັງ ປະກອບມີ 75 ບ້ານ, ມີພົນລະເມືອງທັງໝົດ 54,433 ຄົນ, ຜູ້ມີສິດປ່ອນບັດເລືອກຕັ້ງ24.317 ຄົນ, ຍິງ 12 ພັນກວ່າຄົນ, ມີໜ່ວຍປ່ອນບັດເລືອກຕັ້ງ 54 ໜ່ວຍ, ເຊີ່ງມີຈຳນວນຫີບບັດທັງໝົດ 108 ຫີບບັດ, ໃນນັ້ນ ຫີບບັດ ສສຊ ຈຳນວນ 54 ແລະ ສສຂ 54 ຫີບບັດ, ທັງໄດ້ກະກຽມຫີບບັດສຳເລັດ 100%, ສ້າງຂະບວນການຕິດປ້າຍຢາຍຄຳຂວັນປຸກລະດົມຂະບວນການເລືອກຕັ້ງ ແລະ ຮູບພາບ, ຊີວະປະຫວັດຂອງຜູ້ຮັບສະໝັກເລືອກເປັນ ສສຊ ຊຸດທີ IX.

ການລົງຫາສຽງຄັ້ງນີ້, ບັນດາທ່ານຜູ້ສະໝັກ ຈຳນວນ 12 ທ່ານ ກໍ່ໄດ້ສະແດງຄວາມຢື້ຢາມຖາມຂ່າວ ແລະ ສະເໜີໂຕ, ແນະນຳຕົນເອງ, ຊື່-ປະຫວັດການເຄື່ອນໄຫວ, ໜ້າທີ່ຄວາມຮັບຜິດຊອບ, ຄວາມໝາຍຄວາມສຳຄັນໃນບັ້ນເລືອກຕັ້ງ, ທັງໄດ້ສະເໜີຈຸດປະສົງ, ເຈດຈຳນົງ ແລະ ແນວຄວາມຄິດ ໃນວຽກງານທີ່ຕົນຮັບຜິດຊອບ ທີ່ຈະສ້າງເງື່ອນໄຂ, ນຳສະເໜີຕໍ່ສະພາແຫ່ງຊາດ ເພື່ອຂົນຂວາຍດຶງດູດ ໃນການສ້າງສາພັດທະນາແຂວງສາລະວັນ ຖ້າໄດ້ຮັບເລືອກຕັ້ງເປັນ ສສຊ ຊຸດນີ້.

ການລົງເຄື່ອນໄຫວຫາສຽງຢູ່ເມືອງລະຄອນເພັງ ແມ່ນໄດ້ກຳນົດເອົາ 3 ຈຸດ ຄື: ຈຸດທີ 1 ແມ່ນຢູ່ເທສະບານເມືອງ ໂດຍມີບັນດາພະນັກງານຫຼັກແຫຼ່ງຂອງເມືອງ, ອຳນາດການປົກຄອງບ້ານເທສະບານ, ຈຸດທີ 2 ເຂດບ້ານທ່າຄັນຊຸມຊົວ ແລະ ເຂດບ້ານແບ່ງດ່ານ, ເພື່ອພົບປະພະນັກງານ, ທະຫານ, ຕຳຫຼວດ, ພໍ່ແມ່ນປະຊາຊົນ ແລະ ຜູ້ມີສິດປ່ອນບັດເລືອກຕັ້ງ ໄປໃຊ້ສິດປ່ອນບັດເລືອກຕັ້ງເອົາ ສສຊ ຊຸດທີ IX ປະຈຳເຂດເລືອກຕັ້ງທີ 14 ແຂວງສາລະວັນ ໃນວັນທີ 21 ກຸມພາ 2021.