ໃນວັນທີ 12 ກຸມພາ 2021 ນີ້, ຜູ້ສະໝັກເລືອກຕັ້ງສະມາຊິກສະພາແຫ່ງຊາດ ຊຸດທີ IX ເຂດເລືອກຕັ້ງທີ 7 ແຂວງໄຊຍະບູລີ ແລະ ສະມາຊິກສະພາປະຊາຊົນແຂວງໄຊຍະບູລີ ຊຸດທີ II ປະຈໍາເຂດເລືອກຕັ້ງເມືອງຫົງສາ ໄດ້ລົງເຄື່ອນໄຫວ ແລະ ສະເຫນີຕົວ ຢູ່ເມືອງຫົງສາ ນຳໂດຍ ທ່ານ ພົນໂທ ສຸວອນ ເລືອງບຸນມີ ກຳມະການສູນກາງພັກ ຮອງລັດຖະມົນຕີກະຊວງປ້ອງກັນປະເທດ ພ້ອມດ້ວຍຄະນະ. ໂດຍການໃຫ້ກຽດຕ້ອນຮັບຂອງ ທ່ານ ຄຳຫລ້າ ຜີວວັນນາ ເຈົ້າເມືອງຫົງສາ, ມີຄະນະຮັບຜິດຊອບຂັ້ນແຂວງ, ມີການນຳຂອງເມືອງ, ພະນັກງານລັດຖະກອນ, ພະນັກງານປະຕິວັດອາວຸໂສບໍານານ, ອົງການຈັດຕັ້ງບ້ານ ຕະຫຼອດຮອດປະຊາຊົນບັນດາເຜົ່າຜູ້ມີສິດເລືອກຕັ້ງພາຍໃນເມືອງເຂົ້າຮ່ວມຢ່າງພ້ອມພຽງ.

ຈຸດປະສົງໃນການລົງເຄື່ອນໄຫວສະເຫນີຕົວຄັ້ງນີ້ ແມ່ນເພື່ອນໍາສະເໜີໃຫ້ຜູ້ມີສິດເລືອກຕັ້ງພາຍໃນເມືອງໄດ້ຮັບຮູ້ ແລະ ເຂົ້າໃຈເຖິງພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ, ຂອງສະມາຊິກສະພາແຫ່ງຊາດ ແລະ ສະພາປະຊາຊົນແຂວງ ພ້ອມທັງນໍາສະເໜີປະຫວັດການເຄື່ອນໄຫວໂດຍຫຍໍ້ຂອງແຕ່ລະທ່ານໃນແຕ່ລະໄລຍະຜ່ານມາຈົນເຖິງປະຈຸບັນ, ເພື່ອເຮັດໃຫ້ຜູ້ມີສິດເລືອກຕັ້ງໄດ້ນໍາໄປພິຈາລະນາໃນການໃຊ້ສິດຂອງຕົນເຂົ້າໃນການເລືອກເອົາຕົວແທນຂອງຕົນເຂົ້າໄປນັ່ງໃນສະພາ ເພາະການເລືອກຕັ້ງຖືເປັນເຫດການການເມືອງທີ່ສຳຄັນຂອງພັກຂອງຊາດ, ເປັນໂອກາດທີ່ປະຊາຊົນບັນດາເຜົ່າ ຈະໄດ້ໃຊ້ສິດປະຊາທິປະໄຕເລືອກເອົາຕົວແທນຂອງຕົນ ເພື່ອປົກປ້ອງສິດຜົນປະໂຫຍດອັນຊອບທໍາຂອງປະຊາຊົນບັນດາເຜົ່າຢ່າງແທ້ຈິງ.

ສະເພາະຢູ່ເຂດເລືອກຕັ້ງທີ 7 ແຂວງໄຊຍະບູລີມີຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດ ມີທັງໝົດ 12 ທ່ານ, ຍິງ 2 ທ່ານ ເລືອກເອົາ 9 ທ່ານ ແລະ ຜູ້ສະໝັກເລືອກຕັ້ງສະມາຊິກສະພາປະຊາຊົນແຂວງໄຊຍະບູລີ ຊຸດທີ II ປະຈຳເຂດເລືອກຕັ້ງເມືອງຫົງສາ ມີທັງໝົດ 5 ທ່ານ, ຍິງ 2 ທ່ານ ເລືອກເອົາ 3 ທ່ານ. ການລົງເຄື່ອນໄຫວສະເຫນີຕົວຢູ່ເມືອງຫົງສາຄັ້ງນີ້ ໄດ້ແບ່ງອອກເປັນ 4 ຈຸດຄື: ຈຸດເດີ່ນກິລາຮົ່ມຂອງເມືອງ, ຈຸດບ້ານເມືອງຫານ, ຈຸດບ້ານວຽງແກ້ວ ແລະ ຈຸດບ້ານນາແກ່ນຄຳ, ທົ່ວເມືອງຫົງສາ ມີ 32 ບ້ານ, ປະກອບມີ 35 ໜ່ວຍເລືອກຕັ້ງ ມີປະຊາກອນທັງໝົດ 29.339 ຄົນ ຍິງ 14.436 ຄົນ ໃນນັ້ນຜູ້ມີສິດປ່ອນບັດເລືອກຕັ້ງມີທັງໝົດ 19.687 ຄົນ, ຍິງ 9.545 ຄົນ.