ວັນທີ 15 ກຸມພາ 2021ນີ້, ຂະບວນຜູ້ລົງສະໝັກຮັບເລືອກຕັ້ງ ສສຊ ເຂດ 16 ແຂວງເຊກອງ ສືບຕໍ່ເຄື່ອນໄຫວລົງສະເໜີໂຕ ເພື່ອໃຫ້ປະຊາຊົນຜູ້ມີສິດປ່ອນບັດ ຮັບຮູ້ເຖິງປະຫວັດການເຄື່ອນໄຫວ ເພື່ອພິຈາລະນາຄັດເລືອກເອົາຕົວແທນໃຫ້ແກ່ປະຊາຊົນຊາວແຂວງເຊກອງ ຢູ່ທີ່ສະໂມສອນເມືອງທ່າແຕງ, ເຊິ່ງນໍາພາຂະບວນໂດຍ ທ່ານເຫຼັກໄຫຼ ສີວິໄລ ກຳມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ, ໃຫ້ການຕ້ອນຮັບແມ່ນທ່ານ ສົມເພັດ ເອີດລັດດາ ເລຂາພັກເມືອງ, ເຈົ້າເມືອງທ່າແຕງ, ປະທານຄະນະກຳມະການເລືອກຕັ້ງຂັ້ນເມືອງ ພ້ອມດ້ວຍພະນັກງານຫຼັກແຫຼ່ງ, ຜູ້ມີສິດປ່ອນ, ນັກຮຽນຮູ້ປັນຍາຊົນ ໂດຍມີ 3 ບ້ານຄື: ບ້ານທ່າແຕງເໜືອ, ທ່າແຕງໃຕ້ ແລະ ບ້ານຫ້ວຍຊາຍ ເຂົ້າຮ່ວມຮັບຟັງ.

ນອກຈາກນີ້ ໃນຕອນບ່າຍຂອງວັນດຽວກັນ ຂະບວນຜູ້ລົງສະໝັກຮັບເລືອກຕັ້ງ ສສຊ ຍັງໄດ້ສືບຕໍ່ພົບປະ ແລະສະເໜີໂຕຕໍ່ປະຊາຊົນຜູ້ມີສິດເລືອກຕັ້ງ ຢູ່ໜ່ວຍປ່ອນບັດຢູ່ບ້ານຫົວເຊໂດນ ຕື່ມອີກ. ໂອກາດນີ້, ຜູ້ລົງສະໝັກເລືອກຕັ້ງ ສສຊ ນັບແຕ່ນໍ້າເບີ 1 ຈົນຮອດນໍ້າເບີ 9 ຕ່າງກໍ່ໄດ້ສະເໜີຜົນງານການເຄື່ອນໄຫວຂອງຕົນ ເພື່ອໃຫ້ພະນັກຫຼັກແຫຼ່ງ ແລະນັກຮຽນຮູ້ປັນຍາຊົນຊາວເມືອງທ່າແຕງ ນໍາໄປຄົ້ນຄວ້າ ພິຈາລະນາຄັດເລືອກໃຫ້ໄດ້ບຸກຄົນທີ່ຕົນເຊື່ອໝັ້ນ ແລະໄວ້ວາງໃຈ,ເຊິ່ງຜູ້ລົງສະໝັກທັງ 9 ທ່ານ, ຍິງ 3 ທ່ານ ໄດ້ຝາກຄວາມຫວັງເປັນສຽງດຽວກັນວ່າ: ຖ້າໄດ້ຮັບຄວາມໄວ້ເນື້ອເຊື່ອໃຈຈາກພໍ່ແມ່ພີ່ນ້ອງຊາວເມືອງທ່າແຕງ ກໍຄືຊາວແຂວງເຊກອງ ກໍ່ພ້ອມຈະເຮັດໜ້າທີ່ໃນການເປັນຂົວຕໍ່ນໍາເອົາຄໍາສະເໜີ, ຂໍ້ຄິດເຫັນຂອງປະຊາຊົນ ສະເໜີໃຫ້ຂັ້ນເທິງຮັບພິຈາລະນາແກ້ໄຂຕາມຄວາມເໝາະສົມ ແລະຖືກຕ້ອງຕາມແນວທາງ; ພ້ອມນີ້ ກໍຈະເຮັດໜ້າທີ່ນໍາເອົາແນວທາງຂອງພັກ-ຂອງລັດ ມາຜັນຂະຫຍາຍໃຫ້ປະຊາຊົນໄດ້ຮັບຮູ້ເຂົ້າໃຈ ແລະປະກອບສ່ວນຢ່າງຕັ້ງໜ້າໃນການປະຕິບັດແນວທາງ ແລະໜ້າທີ່ຂອງການເປັນພົນລະເມືອງລາວທີ່ດີ.

ໃນຕອນທ້າຍ, ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ໄດ້ກ່າວເນັ້ນວ່າ: ວັນທີ 21 ກຸມພາ 2021 ທີ່ຈະມາເຖິງໃນມໍ່ໆນີ້, ປະຊາຊົນບັນດາເຜົ່າຊາວແຂວງເຊກອງທຸກໆທ່ານ ຈົ່ງພ້ອມກັນໄປໃຊ້ສິດປະຊາທິປະໄຕຂອງຕົນ ເລືອກເອົາຕົວແທນທີ່ຕົນເຊື່ອໝັ້ນຄື: ສະມາຊິກສະພາແຫ່ງຊາດ ແລະສະມາຊິກສະພາປະຊາຊົນແຂວງ ໄປເຮັດໜ້າທີ່ອັນສໍາຄັນໃນ 2 ສະພາ ເພາະການທີ່ປະຊາຊົນໄດ້ໃຊ້ສິດເລືອກເອົາຜູ້ແທນ ຈະສະແດງໃຫ້ເຫັນທາດແທ້ຂອງລັດທີ່ມາຈາກປະຊາຊົນ, ລັດຂອງປະຊາຊົນ, ໂດຍປະຊາຊົນ ແລະເພື່ອຜົນປະໂຫຍດຂອງປະຊາຊົນຢ່າງແທ້ຈິງ.