ໃນອາທິດຜ່ານມາ ຜູ້ສະໝັກເລືອກຕັ້ງ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 14 ແຂວງສາລະວັນ ຈໍານວນ 12 ທ່ານ ຍິງ: 2 ທ່ານ, ໄດ້ສືບຕໍ່ເຄື່ອນໄຫວ ໂຄສະນາຫາສຽງ 2 ຈຸດຢູ່ເມືອງ ຕຸ້ມລານຄື: ຈຸດທີ 1 ແມ່ນຢູ່ຈຸດບ້ານ ນາລະຈາງ, ຈຸດທີ່ 2 ຢູ່ເທດສະບານເມືອງ ນໍາພາທີມງານໂດຍທ່ານ ສີເຮັ່ງ ຫອມສົມບັດ ຮອງເລຂາພັກແຂວງ ທັງເປັນຜູ້ສະໝັກເລືອກຕັ້ງສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 14 ແຂວງສາລະວັນ, ໃຫ້ກຽດເຂົ້າຮ່ວມໂດຍ ນາງ ບຸນທະວີ ດວງລາສີ ຮອງເລຂາພັກແຂວງ, ທ່ານ ຈັນສະໜອນ ພົມມະແສງ ຫົວໜ້າຄະນະໂຄສະນາອົບຮົມແຂວງ ຮອງຫົວໜ້າອະນຸກຳມະການໂຄສະນາປຸກລະດົມຂະບວນການ, ທ່ານ ທອງໃສ ເພັດລາສີ ກໍາມະການພັກແຂວງ ເລຂາພັກເມືອງ, ເຈົ້າເມືອງໆຕຸ້ມລານ ພ້ອມດ້ວຍການນໍາຂອງເມືອງ ແລະພໍ່ແມ່ປະຊາຊົນເຂົ້າຮ່ວມ.


ທົ່ວເມືອງຕຸ້ມລານມີ 37 ບ້ານ, ມີ 4 ພັນກວ່າຫຼັງຄາເຮືອນ ແລະມີ 6 ພັນກວ່າຄອບຄົວ, ມີປະຊາກອນທັງໝົດ 32.884 ຄົນ, ຍິງ 16.609 ຄົນ, ໃນນັ້ນຜູ້ມີສິດປ່ອນບັດເລືອກຕັ້ງ 16.669 ຄົນ, ຍິງ 8.600 ຄົນ, ມີ 21 ໜ່ວຍປ່ອນບັດ, ສະເພາະໜ່ວຍປອ່ບັດເລືອກຕັ້ງທີ 16 ໜ່ວຍບ້ານ ນາລະຈາງກວມເອົາ 3 ໜູ່ບ້ານຄີ: ບ້ານ ນາກະຕາວ, ບ້ານ ຫ້ວຍໄຫລ່ ແລະບ້ານ ນາລະຈາງມີ 307 ຫຼັງຄາເຮືອນ, 515 ຄອບຄົວ, ມີຈຳນວນພົນ 2.567 ຄົນ, ຍິງ 1.274 ຄົນ, ໃນນັ້ນອາຍຸ 18 ປີຂື້ນໄປ 1.286 ຄົນ, ຍິງ 685 ຄົນ, ມີໜາຕົວຈິງ 1.271 ຄົນ, ຍິງ 676 ຄົນ, ການລົງເຄື່ອນໄຫວໂຄສະນາຫາສຽງຄັ້ງນີ້ກໍ່ໄດ້ຖາມເຖິງຄວາມສຸກທຸກຂອງພໍ່ແມ່ປະຊາຊົນ ແລະການພັດທະນາພື້ນຖານຕ່າງໆພາຍບ້ານ ແລະເມືອງ, ທ່ານ ສີເຮັ່ງ ຮອງເລຂາພັກແຂວງ, ທັງແມ່ນຜູ້ສະໜັກນຳເບີ 1 ກໍ່ໄດ້ກ່າວວ່າ: ຜູ້ທີ່ລົງສະໜັກເທື່ອນີ້ແມ່ນມີຄົບທັງມາດຖານ, ເງື່ອນໄຂ, ມີທັງສູນກາງ, ທ້ອງຖີ່ນ, ເພດເຜົ່າ, ຜູ້ເກົ່າ ແລະ ຜູ້ໃໝ່, ,ພ້ອມນັ້ນຜູ້ສະໜັກ ສສຊ ຊູດທີ IX ໄດ້ໃຫ້ສະເໜີຊື່ ແລະປະຫວັດການເຄື່ອນໄຫວຂອງຕົນເອງ ພ້ອມທັງສະເໜີຈຸດປະສົງໃນການລົງໂຄສະນາຫາສຽງໃນຄັ້ງນີ້ວ່າ: ແມ່ນເຫດການ ການເມືອງທີ່ສໍາຄັນຂອງຊາດ ແມ່ນເປັນການສຶກສາອົບຮົມໃຫ້ແກ່ຜູ້ມີສິດເຂົ້າໃຈຈະແຈ້ງຕື່ມກ່ຽວກັບທາດແທ້ຂອງລະບອບການເມືອງຂອງພັກເຮົາ, ມີຄວາມຮັບຮູ້ເຂົ້າໃຈກ່ຽວກັບໂຄງປະກອບຂອງຜູ້ສະໝັກຮັບເລືອກຕັ້ງເປັນຜູ້ແທນໃນຊຸດນີ້, ເຫັນໄດ້ສິດ, ໜ້າທີ່ ແລະ ພັນທະຂອງພົນລະເມືອງໃນການໄປໃຊ້ສິດປ່ອນບັດເລືອກຕັ້ງ, ເຮັດໃຫ້ຜູ້ມີສິດເລືອກຕັ້ງໄດ້ຮູ້ ໄດ້ເຫັນຜູ້ສະໝັກຮັບເລືອກຕັ້ງ ແລະກໍາໄດ້ຊີວະປະຫວັດການເຄື່ອນໄຫວວຽກງານຂອງຜູ້ສະໝັກ ເພື່ອເປັນບ່ອນອິງໃນການເລືອກຕັ້ງເອົາສະມາຊິກສະພາແຫ່ງຊາດ ເຂົ້າມານັ່ງໃນສະພາ ແລະ ເປັນຕົວແທນໃຫ້ພໍ່ແມ່ປະຊາຊົນ, ທັງເປັນການເຮັດໃຫ້ຜູ້ສະໝັກຮັບເລືອກຕັ້ງ, ເຫັນໄດ້ຄວາມມຸ້ງມາດປາດຖະໜາສະພາບການພັດທະນາ, ກໍ່ຄືການດໍາລົງຊີວິດຂອງປະຊາຊົນບັນດາເຜົ່າ.

ຈາກນັ້ນຜູ້ສະໜັກຮັບເລືອກຕັ້ງສະມາຊິກສະພາແຫ່ງຊາດ ຍັງໄດ້ຮຽກຮ້ອງໃຫ້ຜູ້ມີສິດເລືອກຕັ້ງ ກໍ່ຄືປະຊາຊົນລາວບັນດາເຜົ່າ ຈົ່ງໄດ້ຮ່ວມຈິດຮ່ວມໃຈເຂົ້າຮ່ວມຂະບວນການເລືອກຕັ້ງໃນຄັງນີ້ ໃຫ້ກາຍເປັນປາງບຸນໃຫຍ່ຂອງຊາດ, ເລືອກໄດ້ຜູ້ສະໝັກທີ່ມີມາດຖານເງື່ອນໄຂ, ມີຄວາມຮູ້ຄວາມສາມາດ, ເພື່ອມາເປັນຕົວແທນໃຫ້ປະຊາຊົນ ແລະ ນໍາພາປະຊາຊົນຫລຸດພົ້ນອອກຈາກຄວາມທຸກຍາກໄດ້ເທື່ອລະກ້າວ, ແລະ ດໍາເນີນໄປດ້ວຍບັນຍາກາດເບີກບານມ່ວນຊື່ນ, ມີປະຊາທິປະໄຕຖືກຕ້ອງຕາມກົດໝາຍ ແລະ ປະຕິບັດໃຫ້ໄດ້ 300% ຄື: ຜູ້ມີສິດປ່ອນບັດເລືອກຕັ້ງ ຕ້ອງຕື່ນຕົວສະໝັກໃຈໄປໃຊ້ສິດເລືອກຕັ້ງໃຫ້ໄດ້ 100%, ຮັບປະກັນບໍ່ໃຫ້ມີບັດຕາຍ 100%, ແຕ່ລະໜ່ວຍປ່ອນບັດ ແລະ ເຂດເລືອກຕັ້ງຕ້ອງຮັບປະກັນໃຫ້ມີຄວາມສະຫົງບ, ຄວາມປອດໄພໃນວັນເລືອກຕັ້ງໃຫ້ໄດ້ 100% ແລະຈົ່ງພ້ອມກັນໄປໃຊສິດປະຊາທິປະໄຕຂອງຕົນໃຫ້ໄດ້ໃນວັນທີ 21 ກຸມພາ 2021,