ເມືອງບົວລະພາ ເປັນເມືອງທີ 5 ຂອງການລົງສະເໜີຕົວຜູ້ສະໝັກຮັບເລືອກຕັ້ງ ສະມາຊິກສະພາແຫ່ງຊາດຊຸດທີ IX ປະຈໍາເຂດເລືອກຕັ້ງທີ 12 ແຂວງຄໍາມ່ວນ. ໃນທົ່ວເມືອງບົວລະພາ ມີ 72 ບ້ານ, ມີ 11 ກຸ່ມ, ມີ 6 ຈຸດສຸມ, ມີພົນລະເມືອງ 35.537 ຄົນ, ຍິງ 17.748 ຄົນ, ຜູ້ມີສິດປ່ອນບັດ 20.188 ຄົນ, ຍິງ 10.328 ຄົນ, ມີໜ້າຕົວຈິງທັງໝົດ 18.334 ຄົນ, ຍິງ 9.494 ຄົນ. ມີຈຸດປ່ອນບັດ 23 ຈຸດ. ສຳລັບຈຸດເຄື່ອນໄຫວສະເໜີຕົວຢູ່ເມືອງບົວລະພາ ໄດ້ກຳນົດ 3 ຈຸດຄື: ຈຸດສຸມຫລັງຄັງ – ວັງມະເນີ, ບ້ານຂະຍຸ ແລະ ຢູ່ສະໂມສອນຂອງເມືອງ. ໂດຍລວມແລ້ວແມ່ນເຕັມໄປດ້ວຍຄວາມຄຶກຄື້ນ, ອົບອຸ່ນ ດ້ວຍຄວາມສາມັກຄີຮັກແພງ ດີອົກດີໃຈ ຄຽງຄູ່ກັບຄວາມສະຫງົບປອດໄພ ແລະ ການປະຕິບັດມາດຕະການໂຄວິດ -19. ເຂົ້້າຮ່ວມຮັບຕ້ອນ ແລະ ຕິດຕາມໂດຍ ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ, ທ່ານ ບຸນກວ້າງ ແກ້ວບຸນຍົງ ເຈົ້າເມືອງບົວລະພາ, ພະນັກງານອ້ອມຂ້າງເມືອງ ຕະຫລອດພໍ່ແມ່ປະຊາຊົນເຂົ້າຮ່ວມຈຳນວນ 400 ກວ່າຄົນ.

ໂອກາດຄັ້ງນີ້ ທ່ານຜູ້ສະໝັກຮັບເລືອກຕັ້ງ ທີ່ມາຈາກສູນກາງ ແລະ ທ້ອງຖິ່ນ ຍັງໄດ້ສະແດງຄວາມຄິດເຫັນຜ່ານສື່ມວນຊົນຂອງແຂວງ ເຊັ່ນ: ການໃຫ້ສໍາພາດຂອງ ທ່ານ ປອ. ໄຊນະຄອນ ອິນທະວົງ ຜູ້ສະໝັກນໍ້າເບີ 03 ວ່າ: ຂໍສະແດງຄວາມສະບາຍດີ ປະຊາຊົນຊາວແຂວງຄຳມ່ວນ, ໂດຍສ່ວນຕົວມີຄວາມຮູ້ສຶກດີໃຈ ແລະ ພາກພູມໃຈທີ່ໄດ້ຮັບການສະເໜີຊື່ໃຫ້ລົງສະໝັກ ສສຊ ຊຸດທີ IX ຢູ່ເຂດເລືອກຕັ້ງທີ 12 ປະຈຳແຂວງຄຳມ່ວນ. ການເລືອກຕັ້ງແມ່ນມີຄວາມໝາຍຄວາມສຳຄັນຫລາຍ ຖືໄດ້ວ່າເປັນງານປະຫວັດສາດຂອງປະເທດເຮົາ ຄຽງຄູ່ກັບການພັດທະນາປະເທດຊາດຕະຫລອດໄລຍະຜ່ານມາເປັນການເຕີບໃຫຍ່ຂະຫຍາຍຕົວທາງດ້ານການສ້າງກົດໝາຍ, ປະຊາຊົນ ຫລື ການພັດທະນາຕ່າງໆ ເລີ່ມປັບປຸງໄປສູ່ທິດທາງຂອງກົດໝາຍໃຫ້ດີຂຶ້ນ. ຖ້າໄດ້ຄວາມນິຍົມຈາກປະຊາຊົນຊາວ ແຂວງຄຳມ່ວນ ແມ່ນຈະສຸມໃສ່ທຸກຄວາມຮູ້ – ຄວາມສາມາດໃນການປະຕິບັດໜ້າທີ່ ສສຊ ໃຫ້ດີທີ່ສຸດ, ສໍາຄັນທີ່ສຸດແມ່ນຕ້ອງໄດ້ຮຽນຮູ້ຈຸດພິເສດທ່າແຮງ ແລະ ຄວາມຫຍຸ້ງຍາກ, ຂໍ້ຈຳກັດຂອງແຂວງຄໍາມ່ວນ ເພື່ອນໍາເອົາໄປຄົ້ນຄວ້າຕາມໜ້າທີ່ຂອງ ສສຊ ທີກຳນົດໄວ້ໃນກົດໝາຍ.

ພ້ອມດຽວກັນນັ້ນ ຜູ້ສະໝັກຮັບເລືອກຕັ້ງຈາກທ້ອງຖິ່ນ ທ່ານ ນ. ບັງອອນ ໄຊຍະສິດ ຮັກສາການຫົວໜ້າຄະນະຈັດຕັ້ງແຂວງ ຜູ້ສະໝັກນໍໍ້າເບີ 4 ກໍ່ໄດ້ໃຫ້ສຳພາດຕື່ມວ່າ: ຂ້າພະເຈົ້າມີຄວາມພູມໃຈຫລາຍ ທີ່ໄດ້ຮັບການມອບໝາຍເຮັດໜ້າທີ່ເປັນຜູ້ລົງສະໝັກຮັບເລືອກຕັ້ງ ສສຊ ຊຸດທີ່ IX ນີ້ ຂ້າພະເຈົ້າມີຄວາມຮູ້ສຶກດີໃຈຫລາຍ ເຫັນໄດ້ຄວາມໝາຍຄວາມສຳຄັນຂອງສະພາແຫ່ງຊາດ ເພາະແມ່ນສິດຜົນປະໂຫຍດຂອງພໍ່ແມ່ປະຊາຊົນບັນດາເຜົ່າ ຂອງອົງການນິຕິບັນຍັດ. ໃນນາມຜູ້ໜຶ່ງທີ່ເປັນຜູ້ຮັບສະໝັກ ຖ້າໄດ້ເປັນຕົວແທນຂອງປະຊາຊົນແມ່ນຈະຮັບໃຊ້ປະຊາຊົນຢ່າງສຸດໃຈນຳໃຊ້ຄວາມຮູ້ຄວາມສາມາດທີ່ມີຢູ່ແລ້ວພັດທະນາປົກປ້ອງສິດ ຜົນປະໂຫຍດຂອງປະຊາຊົນ ໂດຍສະເພາະແມ່ນຈະໄດ້ເອົາໃຈໃສ່ພັດທະນາເອື້ອຍນ້ອງແມ່ຍິງໃຫ້ເຂົາເຈົ້າໄດ້ຮູ້ ໄດ້ເຫັນ ແລະ ເຂົ້າເຖິງການພັດທະນາຕົນເອງຢ່າງເປັນຮູບປະທຳ. ສຳລັບການເຄື່ອນໄຫວພົບປະຢູ່ບັນດາເມືອງ ແມ່ນຈະໄດ້ສືບຕໍ່ ອີກ 5 ເມືອງ ຄື : ເມືອງໄຊບົວທອງ, ມະຫາໄຊ, ເຊບັ້ງໄຟ, ໜອງບົກ ແລະ ເມືອງທ່າແຂກ ຈົນກວ່າຈະສໍາເລັດໃນວັນທີ 19 ກຸມພາ 2021.