ຫ້ອງການໂຍທາທິການ ແລະ ຂົນສົ່ງ (ຍ​ທ​ຂ) ເມືອງແກ່ນທ້າວ ແຂ​ວງ​ໄຊ​ຍະ​ບູ​ລີ ໄດ້ຈັດຝຶກອົບ ຮົມການຂັບຂີ່ ແລະ ສອບເສັງການຂັບຂີ່ພາຫະນະ ປະຈໍາປີ 2021 ຂຶ້ນເມື່ອ​ຕົ້ນ​ເດືອນ​ກຸມ​ພາ​ຜ່ານມານີ້ ທີ່​ເມືອງ​ດັ່ງ​ກ່າວ.

ຈຸດປະສົງໃນການຝຶກອົບຮົມຄັ້ງນີ້, ແນໃສ່ເຮັດໃຫ້ຜູ້ນໍາໃຊ້ລົດ-ນໍາໃຊ້ຖະໜົນ ກໍຄືນັກ ຂັບຂີ່ພາຫະນະທາງບົກໄດ້ຮັບຮູ້ ເຂົ້າໃຈຂຶ້ນຕື່ມໃນການຂັບຂີ່ລົດ, ​ເປັນ​ຕົ້ນ​ແມ່ນ​ຮຽນ​ຮູ້ຄຸນສົມບັດຂອງ ນັກຂັບຂີ່, ກົດລະບຽບການສັນຈອນ, ຜົນຮ້າຍຈາກອຸບັດເຫດ, ບົດຮຽນການສອບເສັງເອົາໃບອະນຸຍາດ ຂັບຂີ່, ເຜີຍແຜ່ ແລະ ໃຫ້ຄວາມຮູ້ກ່ຽວກັບກົດໝາຍການສັນຈອນ, ການເຂົ້າຮູບແບບການສອບເສັງ, ຮຽນ​ຮູ້ປ້າຍສັນຍານຈາລະຈອນຕາມເສັ້ນທາງ ແລະ ລະບຽບການສອບເສັງການຂັບຂີ່, ເພື່ອແນໃສ່ເຮັດໃຫ້ ຜູ້ໃຊ້ລົດ-ໃຊ້ຖະໜົນ ​ໃຫ້ມີຄວາມປອດໄພ, ຫຼຸດຜ່ອນອຸບັດເຫດຕາມທາງຫຼວງ.

ການສອບເສັງຄັ້ງນີ້, ມີນັກຂັບຂີ່ທັງໝົດ 210 ກວ່າຄົນ ຍິງ 30 ກວ່າ​ຄົນ, ຜ່ານການສອບເສັງໄດ້ 210 ຄົນ. ໃນນີ້, ປະເພດລົດຈັກ (A) 3 ຄົນ, ລົດກະບະ (B) 6 ຄົນ, ລົດບັນທຸກ (C) 3 ຄົນ, ລົດໂດຍສານ (D) 2 ຄົນ, ລົດຈັກ, ລົດກະບະ (AB) 110 ກວ່າຄົນ, ລົດຈັກ, ລົດກະບະ (BC) 2 ຄົນ ແລະ ປະເພດລົດຈັກ, ລົດກະບະ, ລົດບັນທຸ​ກ (ABC) 77 ກວ່າຄົນ.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)