ໃນໂອກາດການເຄື່ອນໄຫວພົບປະໂຄສະນາຫາສຽງຂອງຜູ້ສະໝັກເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ທີ່ເມືອງວິລະບູລີ ໃນຄັ້ງວັນທີ 13 ກຸມພາ 2021 ນີ້ ຜູ້ສື່ຂ່າວສະຖານີວິທະຍຸກະຈາຍສຽງແຂວງສະຫວັນນະເຂດ ກໍ່ໄດ້ມີໂອກາດໄດ້ສໍາພາດຄວາມຮູ້ສຶກຂອງ ທ່ານ ປອ ນາງ ສູນທອນ ໄຊຍະຈັກ ເລຂາທິການສູນກາງພັກ ຫົວໜ້າໜ້າຄະນະພົວພັນຕ່າງປະເທດສູນກາງພັກ ຜູ້ສະໝັກເລືອກຕັ້ງສະມາຊິກສະພາແຫ່ງຊາດ ເຂດເລືອກຕັ້ງທີ 13 ໄດ້ກ່າວວ່າ: ຂ້າພະເຈົ້າມີຄວາມຮູ້ສຶກດີໃຈຫຼາຍທີ່ໄດ້ຕາງໜ້າໃຫ້ຜູ້ສະໝັກເລືອກຕັ້ງສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ແຂວງສະຫວັນນະເຂດ ເຊິ່ງເປັນແຂວງວິລະຊົນ, ເປັນບ້ານເກີດເມືອງນອນຂອງວິລະບູລຸດແຫ່ງຊາດ ກໍ່ຄືບ້ານເກີດຂອງປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ. ການເຄື່ອນໄຫວພົບປະກັບຜູ້ມີສິດເລືອກຕັ້ງມາຮອດໄລຍະນີ້ກໍ່ໃກ້ຈະສຳເລັດ 100% ແລ້ວ ຈຸດປະສົງກໍ່ເພື່ອຮຽກຮ້ອງໃຫ້ປະຊາຊົນນຳໃຊ້ສິດຂອງຕົນໃນການປ່ອນບັດເອົາຕົວແທນຂອງສິດແລະຜົນປະໂຫຍດຂອງຕົນເອງໃນວັນທີ 21 ທີ່ຈະມາເຖິງນີ້ ແລະ ຫວັງຢ່າງຍິ່ງວ່າໃນຄັ້ງວັນທີ 21 ນີ້ ຊາວນະຄອນໄກສອນພົມວິຫານ ກໍ່ຄື 14 ເມືອງຢູ່ໃນແຂວງສະຫວັນນະເຂດ ຈະອອກໄປໃຊ້ສິດໃນວັນເລືອກຕັ້ງໃຫ້ໄດ້ 300%
ໂອກາດນີ້ ທ່ານ ປອ ນາງ ສູນທອນ ໄຊຍະຈັກ ກໍ່ຍັງໄດ້ສະແດງຄວາມຂອບອົກຄອບໃຈຕໍ່ການນຳຂອງແຂວງ,ຂອງເມືອງ ຕະຫຼອດຮອດຜູ້ມີສິດເລືອກຕັ້ງທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ສະໜິດສະໜົມເປັນກັນເອງ ຫວັງຢ່າງຍິ່ງວ່າຖ້າຫາກໄດ້ຮັບການເລືອກຕັ້ງເປັນຕົວແທນຂອງປະຊາຊົນຊາວແຂວງສະຫວັນນະເຂດ ກໍ່ຈະເຮັດໜ້າທີ່ເພື່ອຮັບໃຊ້ປະຊາຊົນຈົນສຸດຄວາມສາມາດ.