ວັນທີ 9-12 ກຸມພາ 2021, ບັນດາຜູ້ສະໝັກຮັບເລືອກຕັ້ງເປັນສະມາຊິກສະ ພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 13 ແຂວງສະຫວັນນະເຂດ ຊຸດທີ IX ຈໍານວນ 25 ທ່ານ ຍິງ 7 ທ່ານ ແລະ ສະມາຊິກສະພາປະຊາຊົນແຂວງ (ສສຂ) ຊຸດທີ II ຊຶ່ງນໍາໂດຍທ່ານ ນາງ ສູນທອນ ໄຊຍະຈັກ ເລຂາທິການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ, ພ້ອມດ້ວຍຜູ້ສະໝັກ ຮັບເລືອກຕັ້ງເປັນ ສສຊ ຊຸດທີ IX ແລະ ສສຂ ຊຸດທີ II ປະຈຳເມືອງອາດສະພັງທອງ, ເມືອງອຸ ທຸມພອນ, ເມືອງອາດສະພອນ, ເມືອງເຊໂປນ, ເມືອງພະລານໄຊ ແລະ ເມືອງນອງ ແຂວງສະຫວັນນະເຂດ ໄດ້ເຄື່ອນໄຫວພົບປະໂຄສະນາຫາສຽງກັບຜູ້ມີສິດເລືອກຕັ້ງ. ໂອກາດດັ່ງກ່າວ ຜູ້ສະໝັກຮັບເລືອກຕັ້ງ ໄດ້ຮັບຟັງການລາຍງານຂອງແຕ່ລະເມືອງຄື: ເມືອງອາດສະພັງທອງແມ່ນທ່ານ ອຸໄພວັນ ໄຊຍະວົງ ເຈົ້າເມືອງອາດສະພັງທອງ ໄດ້ລາຍງານໃຫ້ຮູ້ວ່າ:

ເມືອງອາດສະພັງທອງ ມີຜູ້ສະໝັກ ສສຂ ຈໍານວນ 5 ທ່ານ ຍິງ 1 ທ່ານ ເລືອກເອົາ 3 ທ່ານ, ທົ່ວເມືອງມີໜ່ວຍປ່ອນບັດທັງໝົດ 47 ໜ່ວຍ, ພົນລະເມືອງຜູ້ມີສິດປ່ອນບັດເລືອກຕັ້ງ 24.310 ຄົນ ຍິງ 12.526 ຄົນ;

ເມືອງອຸທຸມພອນ ແມ່ນທ່ານ ປະສົງສິນ ຈະເລີນສຸກ ເຈົ້າເມືອງອຸທຸມພອນ ໄດ້ລາຍງານໃຫ້ຮູ້ວ່າ: ເມືອງອຸທຸມພອນ ມີຜູ້ສະໝັກ ສສຂ ຈຳນວນ 5 ທ່ານ ຍິງ 1 ທ່ານ ເລືອກເອົາ 3 ທ່ານ, ທົ່ວເມືອງມີໜ່ວຍປ່ອນບັດທັງໝົດ 88 ໜ່ວຍ, ພົນລະເມືອງຜູ້ມີສິດປ່ອນບັດເລືອກຕັ້ງ 50.038 ຄົນ ຍິງ 26.345 ຄົນ;

ເມືອງອາດສະພອນ ແມ່ນທ່ານ ນາງ ບຸນທະລັງສີ ຄຳມະນີວົງ ເຈົ້າເມືອງອາດສະພອນ ໄດ້ລາຍງານໃຫ້ຮູ້ວ່າ: ເມືອງອາດສະພອນ ມີຜູ້ສະໝັກ ສສຂ ຈຳນວນ 4 ທ່ານ ຍິງ 1 ທ່ານ ເລືອກເອົາ 2 ທ່ານ, ທົ່ວເມືອງມີໜ່ວຍປ່ອນບັດທັງໝົດ 76 ໜ່ວຍ, ພົນລະເມືອງຜູ້ມີສິດປ່ອນບັດເລືອກຕັ້ງ 32.036 ຄົນ ຍິງ 16.711 ຄົນ;

ເມືອງເຊໂປນ ແມ່ນທ່ານ ວົງສະຫວັນ ວຽງມະນີ ເຈົ້າເມືອງເຊໂປນ ໄດ້ລາຍງານໃຫ້ຮູ້ວ່າ: ເມືອງເຊໂປນ ມີຜູ້ສະໝັກເປັນ ສສຂ ປະຈຳເມືອງເຊໂປນ ຈຳນວນ 5 ທ່ານ ຍິງ 2 ທ່ານ ເລືອກເອົາ 3 ທ່ານ, ທົ່ວເມືອງມີໜ່ວຍປ່ອນບັດທັງໝົດ 64 ໜ່ວຍ, ພົນລະເມືອງ 63.722 ຄົນ ຍິງ 31.345 ຄົນ, ໃນນີ້ ພົນລະເມືອງຜູ້ມີສິດເລືອກຕັ້ງທີ່ມີອາຍຸກະສຽນແຕ່ 18 ປີຂຶ້ນໄປ ມີຈຳນວນ 33.121 ຄົນ ຍິງ 16.472 ຄົນ, ໄປສຶກສາຮ່ຳຮຽນຢູ່ທ້ອງຖິ່ນອື່ນ ພາຍໃນປະເທດມີ 194 ຄົນ ຍິງ 68 ຄົນ, ໄປສຶກສາຮ່ຳຮຽນຕ່າງປະເທດມີ 60 ຄົນ ຍິງ 40 ຄົນ, ຜູ້ທີ່ໄປອອກແຮງງານຢູ່ໃນທ້ອງຖິ່ນອື່ນ ພາຍໃນປະເທດ 680 ຄົນ ຍິງ 281 ຄົນ, ໄປອອກແຮງງານຢູ່ຕ່າງປະເທດມີ 115 ຄົນ ຍິງ 74 ຄົນ, ຜູ້ທີ່ຢູ່ທ້ອງຖິ່ນອື່ນມາພັກເຊົາພາຍໃນບ້ານມີ 535 ຄົນ ຍິງ 135 ຄົນ, ສານຕັດສິນປົດສິດເລືອກຕັ້ງມີ 69 ຄົນ ຍິງ 2 ຄົນ, ເປັນບ້າເສຍຈິດມີ 122 ຄົນ ຍິງ 41 ຄົນ, ຈຳນວນຜູ້ມີສິດເລືອກຕັ້ງທີ່ມີໜ້າຕົວຈິງຈຳນວນ 32.416 ຄົນ ຍິງ 16.101 ຄົນ ຜ່ານການຫ້າງຫາກະກຽມຕະຫຼອດໄລຍະຜ່ານມາເຫັນວ່າ ເມືອງເຊໂປນ ມີຄວາມພ້ອມໃຫ້ແກ່ບັ້ນເລືອກຕັ້ງ 100% ແລ້ວ;

ເມືອງພະລານໄຊ ແມ່ນທ່ານ ຄຳເກິ່ງ ສຸດທິເດດ ເຈົ້າເມືອງພະລານໄຊ ໄດ້ລາຍງານໃຫ້ຮູ້ວ່າ: ເມືອງພະລານໄຊ ມີຜູ້ສະໝັກເປັນ ສສຂ 4 ທ່ານ ຍິງ 2 ທ່ານ ເລືອກເອົາ 2 ທ່ານ, ທົ່ວເມືອງມີໜ່ວຍປ່ອນບັດ 30 ໜ່ວຍ, ມີພົນລະເມືອງ 44.843 ຄົນ ຍິງ 22.756 ຄົນ, ຜູ້ທີ່ມີອາຍຸແຕ່ 18 ປີຂຶ້ນໄປຈຳນວນ 26.546 ຄົນ ຍິງ 13.596 ຄົນ, ມີໜ້າຕົວຈິງ 21.377 ຄົນ ຍິງ 10.908 ຄົນ ມາຮອດປັດຈຸບັນ ເມືອງພະລານໄຊແມ່ນມີຄວາມພ້ອມ ໃຫ້ແກ່ບັ້ນເລືອກຕັ້ງແລ້ວ 100%.

ເມືອງນອງ ແມ່ນທ່ານ ສຸກສາຄອນ ໂພທິລາດ ຮອງເຈົ້າເມືອງໆນອງ ໄດ້ລາຍງານໃຫ້ຮູ້ວ່າ: ເມືອງນອງ ມີຜູ້ສະໝັກເປັນ ສສຂ 5 ທ່ານ ຍິງ 1 ທ່ານ ເລືອກເອົາ 3 ທ່ານ, ທົ່ວເມືອງມີໜ່ວຍປ່ອນບັດຈຳນວນ 38 ໜ່ວຍ, ມີພົນລະເມືອງ 33.718 ຄົນ ຍິງ 16.504 ຄົນ, ຜູ້ທີ່ມີອາຍຸແຕ່ 18 ປີຂຶ້ນໄປຈຳນວນ 16.408 ຄົນ ຍິງ 8.320 ຄົນ.

ມາຮອດປັດຈຸບັນ ເມືອງນອງມີ ຄວາມພ້ອມໃຫ້ແກ່ບັ້ນເລືອກຕັ້ງແລ້ວ 100%. ຈາກນັ້ນ, ທ່ານ ນາງ ສູນທອນ ໄຊຍະຈັກ ຍັງໄດ້ມອບ ເຄື່ອງຊ່ວຍເຫຼືອ ເປັນຕົ້ນ ເສື້ອ, ໂສ້ງ ຈຳນວນ 20 ແກັດ ໃຫ້ເມືອງນອງອີກດ້ວຍ. ໂອກາດພົບປະໂຄສະນາຫາສຽງກັບຜູ້ມີສິດເລືອກຕັ້ງຄັ້ງນີ້ ບັນດາຜູ້ລົງສະໝັກຮັບເລືອກຕັ້ງ ໄດ້ຜັດປ່ຽນກັນປະກອບຄໍາເຫັນ ພ້ອມຮັບຟັງຂໍ້ສະເໜີຈາກຜູ້ມີສິດເລືອກຕັ້ງ.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)