ພິທີເປີດຊຸດອົບຮົມ-ຫັດແອບການທະຫານ, ການເມືອງ ແລະ ພະລາທິການ-ເຕັກນິກ ປະຈຳປີ 2021 ຂອງກອງພົນທີ 4 ໄດ້ຈັດຂຶ້ນເມື່ອບໍ່ດົນມານີ້ ທີ່ກອງພົນກດັ່ງກ່າວ ໂດຍການເປັນປະທານ ຂອງສະຫາຍ ພັນເອກ ຕ່າງຕາ ຕາດເວີນຄຳ ຫົວໜ້າການທະຫານກອງພົນທີ 4, ມີສະຫາຍພັນເອກ ສົມຈິດ ກິດຕິຍະລາດ ຫົວໜ້າການເມືອງກອງພົນທີ 4, ມີຄະນະພັກ-ຄະນະບັນຊາກອງພົນ, ອົງການ 5 ຫ້ອງ, ພະແນກການກ່ຽວຂ້ອງເຂົ້າຮ່ວມ.

ສະຫາຍ ພັນໂທ ສົມສະໄໝ ສີດາວັນ ຫົວໜ້າພະແນກອົບຮົມຫ້ອງເສນາທິການກອງພົນທີ 4 ໄດ້ຂຶ້ນຜ່ານແຜນການອົບຮົມການທະຫານ-ຫັດແອບການເມືອງ ແລະ ພະລາທິການ-ເຕັກນິກປະຈຳປີ 2021 ໂດຍປະຕິບັດຕາມຄໍາສັ່ງອົບຮົມ-ຫັດແອບຂອງກົມໃຫຍ່ເສນາທິການ ເລກທີ 2462/ກສນ, ລົງວັນທີ 11 ທັນວາ 2020 ແລະ ແຜນການອົບຮົມຫັດແອບປັບປຸງລະບຽບແບບແຜນ, ຝຶກຝົນກຳລັງແຮງກາຍປະຈຳປີ 2021 ຂອງກອງພົນທະຫານຮາບທີ 4 ສະບັບເລກທີ 114/ກສນ, ລົງວັນທີ 12 ມັງກອນ 2021 ວ່າດ້ວຍເນື້ອໃນກໍານົດເວລາ ແລະ ວິທີຈັດຕັ້ງປະຕິບັດ, ສິລະປະຍຸດ-ຍຸດທະວິທີມີລະບຽບວິໄນເຂັ້ມງວດ.

ໃນນີ້, ພາກການເມືອງ 10 ວັນ, ການທະຫານ 140 ວັນ, ພະລາທິການ-ເຕັກນິກ 10 ວັນ, ອົບຮົມວິຊາສະເພາະເຫຼົ່າຮົບຕ່າງໆ 100 ວັນ, ໃນການອົບຮົມ-ຫັດແອບຈະໄດ້ດຳເນີນໄປເປັນເວລາ 160 ວັນ ແບ່ງອອກເປັນ 2 ໄລຍະຄື: ໄລຍະທີ I ເລີ່ມແຕ່ຕົ້ນເດືອນກຸມພາຫາເດືອນພຶດສະພາປີ 2021, ໄລຍະທີ II ເລີ່ມແຕ່ເດືອນກໍລະກົດ ຫາ ເດືອນພະຈິກ ປີ 2021 ການອົບຮົມເພື່ອເຮັດໃຫ້ນາຍ ແລະ ພົນທະຫານກຳໄດ້ພາກທິດສະດີ ແລະ ພາກປະຕິບັດຕົວຈິງ ເຮັດໃຫ້ພະນັກງານ-ນັກຮົບ ມີຄວາມເຂັ້ມແຂງຊຳນິຊຳນານໃນການກຽມພ້ອມສູ້ຮົບ ແລະ ຕອບສະໜອງກັບຄວາມຮຽກຮ້ອງຕ້ອງການຂອງຂັ້ນເທິງວາງອອກ.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)