ໃນວັນທີ 15 ກຸມພາ 2021 ນີ້ິ້, ຜູ້ສະໝັກຮັບເລືອກຕັ້ງ ສະມາຊິກສະພາແຫ່ງຊາດ (ສສຊ) ຊຸດທີ IX ເຂດເລືອກຕັ້ງທີ 15 ແຂວງຈໍາປາສັກ ຈໍານວນ 20 ທ່ານ ຊຶ່ງນໍາໂດຍ ທ່ານ ສົມມາດ ພົນເສນາ ກໍາມະການສູນກາງພັກ ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ທ່ານ ສາຍທອງ ໄຊຍະວົງ ຮອງເລຂາພັກແຂວງຈໍາປາສັກ ແລະ ຄະນະຜູ້ສະໝັກ ສສຂ ນະຄອນປາກເຊ 6 ທ່ານ ນໍາໂດຍ ທ່ານ ຄໍາມ່ວນ ພິລາພອນເດດ ກໍາມະການພັກແຂວງ ຜູ້ສະໝັກ ສສຂ ນະຄອນປາກເຊ ໄດ້ເຄື່ອນໄຫວໂຄສະນາຫາສຽງ ແລະ ພົບປະຜູ້ມີສິດປ່ອນບັດເລືອກຕັ້ງ ທີ່ມະຫາວິທະຍາໄລ ຈໍາປາສັກ.

ໂດຍການໃຫ້ກຽດເຂົ້າຮ່ວມຂອງທ່ານ ເມກສະຫວັນ ພົມພິທັກ ປະທານສະພາປະຊາຊົນແຂວງ ແລະ ໃຫ້ການຕ້ອນຮັບຂອງ ທ່ານ ບຸນມີ ພອນສະຫວັນ ອະທິການບໍດີມະຫາວິທະຍາໄລຈໍາປາສັກ ພ້ອມ ຄະນະ ແລະ ພະນັກງານຄູ-ອາຈານ ແລະ ນັກສຶກສາເຂົ້າຮ່ວມຢ່າງຫຼວງຫຼາຍ.

ການເຄື່ອນໄຫວພົບປະຜູ້ມີສິດປ່ອນບັດເລືອກຕັ້ງ ຂອງຜູ້ສະໝັກຮັບເລືອກຕັ້ງ ສສຊ ແລະ ສສຂ ຄັ້ງນີ້ ກໍເພື່ອເຮັດໃຫ້ຜູ້ມີສິດເລືອກຕັ້ງໄດ້ຮູ້, ໄດ້ເຫັນໂສມໜ້າຕົວຈິງຂອງຜູ້ສະໝັກຮັບເລືອກຕັ້ງ ແລະ ກໍາໄດ້ຊີວະປະຫວັດການເຄື່ອນໄຫວວຽກງານຂອງຜູ້ສະໝັກຮັບເລືອກຕັ້ງ ເພື່ອເປັນບ່ອນອີງໃນການ ເລືອກຕັ້ງເອົາຜູ້ສະໝັກຮັບເລືອກຕັ້ງເປັນ ສສຊ ຊຸດທີ IX ແລະ ສສຂ ຊຸດທີ II.

ໃນພິທີໄດ້ຜ່ານຊີວະປະຫວັດຫຍໍ້ຂອງ ຜູ້ສະໝັກຮັບເລືອກຕັ້ງແຕ່ລະທ່ານ, ຟັງຄໍາສະເໜີຕົວ ແລະ ຄໍາປະຕິຍານຂອງແຕ່ລະທ່ານ ຊຶ່ງກ່າວວ່າ: ຖ້າຕົນເອງໄດ້ຮັບຄວາມໄວ້ວາງໃຈ ໄດ້ຮັບເລືອກຕັ້ງເປັນ ສສຊ ແລະ ສສຂ ແລ້ວ ກໍຈະສືບຕໍ່ຕັ້ງໜ້າເຮັດໜ້າທີ່ເປັນຕົວແທນແຫ່ງສິດຜົນປະໂຫຍດຂອງປະຊາຊົນ ແລະ ປະເທດຊາດຢ່າງແທ້ຈິງ ໂດຍສະເພາະໃນດ້ານການສຶກສາກໍຈະຄົ້ນຄວ້ານໍາສະເໜີຄໍາຄິດເຫັນຂອງ ປະຊາຊົນ, ຄູ-ອາຈານ ໄປຍັງລັດຖະບານ ກໍຄືພາກສ່ວນທີ່ກ່ຽວຂ້ອງເພື່ອປັບປຸງ ແລະ ພັດທະນາໃຫ້ດີ ຂຶ້ນໄປສູ່ຄຸນນະພາບ.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)