ພະແນກພະລັງງານ ແລະ ບໍ່ແຮ່ ແຂວງໄຊສົມບູນ ໃນນາມກອງເລຂາ ຄຸ້ມຄອງເງິນຮ່ວງພັດທະນາສັງຄົມຊຸມຊົນ ບໍລິສັດເຂື່ອນໄຟຟ້ານຳ້ໄຜ ໄດ້ນຳເອົາອຸປະກອນຮັບໃຊ້ວຽກງານສື່ມວນຊົນ ມາມອບໃຫ້ແກ່ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງໄຊສົມບູນ ໃນຕອນບ່າຍຂອງວັນທີ 15 ກຸມພາ ນີ້ ທີ່ຫ້ອງປະຊຸມພະແນກຖະແຫລງຂ່າວ, ວັດທະນະທຳ ແລະ ທ່ຽວ ແຂວງໄຊສົມບູນ ໂດຍການກ່າວມອບຂອງທ່ານ ບຸນທຽມ ໄຊສົງຄາມ ຫົວໜ້າພະແນກພະລັງງານ ແລະ ບໍ່ແຮ່ ແຂວງໄຊສົມບູນ ແລະ ກ່າວຮັບໂດຍ ທ່ານ ທົງສະຫວັນ ໂພສະລາດ ຮອງຫົວໜ້າພະແນກ ຖວທ ແຂວງ ມີພະນັກງານຈາກພະແນກພະລັງງານ ແລະ ບໍ່ແຮ່ ແລະ ພະແນກ ຖວທ ແຂວງໄຊສົມບູນ ເຂົ້າຮ່ວມເປັນສັກຂີພີຍານ.

ເຄື່ອງທີ່ນຳມາມອບໃນຄັ້ງນີ້ ປະກອບມີ: ໂທລະໂຄ່ງຈຳນວນ 6 ຊຸດ, ຄອມພິວເຕີຕັ້ງໂຕະ 1 ໜ່ວຍ ແລະ ປິ່ຣນເຕີ 1 ໜ່ວຍ ລວມມູນຄ່າທັງໝົດ 61 ລ້ານກວ່າກີບ ຈຸດປະສົງກໍເພື່ອນຳເອົາໄປ ມອບໃຫ້ແກ່ ບັນດາ 5 ເມືອງ ໃນທົ່ວແຂວງ ເພື່ອອຳນວຍຄວາມສະດວກໃຫ້ແກ່ການຈັດຕັ້ງປະຕິບັດວຽກງານ ໂດຍສະເພາະກໍແມ່ນການໂຄສະນາເຜີຍແຜ່ຂໍ້ມູນຂ່າວສານ, ແນວ ທາງນະໂຍບາຍຂອງພັກ-ລັດ ໃຫ້ປະຊາຊົນບັນດາເຜົ່າ ຊາວແຂວງໄຊສົມບູນ ໄດ້ຮັບຮູ້ຢ່າງທົ່ວເຖິງ

ໃນໂອກາດນີ້ ທ່ານ ທົງສະຫວັນ ໂພສະລາດ ໄດ້ກ່າວສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງສູງ ມາຍັງພະແນກພະລັງງານ ແລະ ບໍ່ແຮ່ ແຂວງ ທີ່ໄດ້ມີຄວາມເປັນຫ່ວງເປັນໄຍ ແລະ ໄດ້ນຳເອົາເຄື່ອງຮັບໃຊ້ວຽກງານສື່ມວນຊົນ ມາມອບໃຫ້ແກ່ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງ ໃນຄັ້ງນີ້ ພ້ອມທັງໃຫ້ຄຳໝັ້ນສັນຍາວ່າຈະນຳເອົາເຄື່ອງຈຳນວນດັ່ງກ່າ່ວ ໄປມອບຕໍ່ບັນດາ 5 ເມືອງໃຫ້ທົ່ວເຖິງ ແລະ ນຳໃຊ້ໃຫ້ເກີດປະໂຫຍດສູງສຸດ.