ໃນວັນທີ 15 ກຸມພານີ້ ຜູ້ຮັບສະໝັກຮັບເລືອກຕັ້ງສະມາຊິກສະພາປະຊາຊົນແຂວງເຊກອງຊຸດທີ II (ສສຂ) ເຂດເລືອກຕັ້ງເມືອງທ່າແຕງໄດ້ລົງໂຄສະນາຫາງສຽງຢູ່ໜ່ວຍປ່ອນບັດທີ 6 ທີ່ຂຶ້ນກັບຈຸດສຸມພັດທະນາທີ II ບ້ານກົກພຸງໃຕ້ ໂດຍມີທ່ານ ນາງ ແກ້ວອຸດອນ ດວງມະນີວົງ ກໍາມະການປະຈໍາພັກເມືອງ, ຫົວໜ້າຄະນະໂຄສະນາອົບຮົມເມືອງຕະຫຼອດຮອດພໍ່ແມ່ປະຊາຊົນ ກໍຄືຜູ້ມີສິດເລືອກຕັ້ງບ້ານກົກພຸງເໜືອ ແລະ ກົກພຸງໃຕ້ຕ້ອນຮັບຢ່າງອົບອຸ່ນ.

ໂອກາດດັ່ງກ່າວ, ບັນດາຜູ້ສະໝັກ ສສຂ ຈໍານວນ 7 ທ່ານ,ຍິງ 2 ທ່ານ ກໍໄດ້ຜັດປ່ຽນກັນຂຶ້ນສະເໜີຕົວ, ປະຫວັດການເຄື່ອນໄຫວ ແລະ ໜ້າທີ່ຮັບຜິດຊອບໃນໄລຍະຜ່ານມາ. ຫຼັງຈາກນັ້ນທ່ານ ຄໍາບົນ ເລຂາໜ່ວຍພັກ, ນາຍບ້ານກົກພຸງເໜືອ ຕາງໜ້າແກ່ປະຊາຊົນ 2 ບ້ານກໍໄດ້ສະເໜີຕໍ່ຜູ້ສະໝັກສະມາຊິກສະພາປະຊາຊົນແຂວງ (ສສຂ) ຊຸດທີ II ເຂດເລືອກຕັ້ງເມືອງທ່າແຕງໃຫ້ຊ່ວຍສົມທົບກັບຂະແໜງການກ່ຽວຂ້ອງ ເພື່ອຂໍການລົງທຶນຈາກພາກລັດ ແລະ ເອກະຊົນເຂົ້າໃນການພັດທະນາພື້ນຖານໂຄງລ່າງ, ສ້າງສິ່ງອໍານວຍຄວາມສະດວກແກ່ການດໍາລົງຊີວິດ ແລະການພັດທະນາເສດຖະກິດຄອບຄົວຂອງປະຊາຊົນເປັນຕົ້ນ: ສະເໜີກໍ່ສ້າງລະບົບຊົນລະປະທານ, ຂະຫຍາຍຕາຂ່າຍໄຟຟ້າ, ບຸກເບີກເສັ້ນ ທາງເຂົ້າຫາບ່ອນເຮັດການຜະລິດ ແລະອອກມາດຕະການຮັກສາສັດລ້ຽງປະເພດຕ່າງໆພາຍໃນບ້ານ.

ດ້ານທ່ານ ນິກອນ ສີສຸພັນ ຫົວໜ້າເຂດຈຸດສຸມພັດທະນາທີ II ບ້ານກົກພຸງໃຕ້ໄດ້ລາຍງານວ່າ: ເຂດຈຸດສຸມພັດທະນາທີ II ບ້ານກົກພຸງໃຕ້ລວມມີ 6 ບ້ານຂຶ້ນກັບຄື: ບ້ານກົກພຸງໃຕ້, ກົກພຸງເໜືອ, ໝື່ນໃໝ່, ໝື່ນກາງ, ຕະກຽວ ແລະ ບ້ານຕຸມຍໍ, ມີໜ່ວຍປ່ອນບັດ 2 ໜ່ວຍຄື: ໜ່ວຍທີ 6 ແລະໜ່ວຍທີ 7 ໃນນີ້ສະເພາະໜ່ວຍທີ 6 ປະກອບມີ 2 ບ້ານຄື: ບ້ານກົກພຸງໃຕ້ ແລະບ້ານກົກພຸງເໜືອ, ມີພົນລະເມືອງທັງໝົດ 1.463 ຄົນ, ຍິງ 774 ຄົນ ຊຶ່ງໃນນີ້ມີຜູ້ມີສິດປ່ອນບັດທັງໝົດ 727 ຄົນ,ຍິງ 371 ຄົນ.