ການກະກຽມໃນບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ຢູ່ຈຸດສຸມບ້ານທ່າຄັນຊຸມຊົວ ເມືອງລະຄອນເພັງ ມີຄວາມກຽມພ້ອມແລ້ວ 100%. ທົ່ວຈຸດສຸມປະກອບມີ 3 ບ້ານຂື້ນກັບຄື: ບ້ານທ່າຄັນຊຸມຊົວ, ບ້ານດອນໝາກເກືອ ແລະ ບ້ານພູກາສີ ມີຈໍານວນພົນລະເມືອງທັງໝົດ ນັບແຕ່ອາຍຸ 18 ປີຂື້ນໄປ ມີທັງຫມົດ 1 ພັນກວ່າຄົນ, ໃນນັ້ນມີຫນ້າຕົວຈິງ 975 ຄົນ, ສ່ວນທີ່ເຫຼືອແມ່ນໄປອອກແຮງງານ, ໄປຮຽນ, ບ້າໃບ້ເສຍຈິດ, ຖືກສານຕັດສິນ, ກັກຂັງ ແລະ ອື່ນໆ. ຈໍານວນ 3 ຫນ່ວຍ ມີຫີບບັດທັງໝົດ 6 ຫີບບັດ.

ທ່ານນາງ ໄກ່ແກ້ວ ແສນທະວີ ປະຊາຊົນບ້ານທ່າຄັນຊຸມຊົວ ເປັນຜູ້ທີ່ມີສິດເລືອກຕັ້ງ ໄດ້ສະແດງຄວາມຮູ້ສຶກ ວ່າ: ຕົນເອງດີໃຈ, ພາກພູມໃຈຫຼາຍທີ່ໄດ້ເຫັນ, ໄດ້ຮັບຟັງການຜ່ານປະຫວັດການເຄື່ອນໄຫວຂອງແຕ່ລະທ່ານ, ເຊີ່ງລ້ວນແລ້ວແຕ່ເປັນບຸກຄົນຜູ້ທີ່ມີຄວາມຮູ້ຄວາມສາມາດທີ່ແຕກຕ່າງກັນ, ພ້ອມທີ່ຈະໃຊ້ສິດຂອງຕົນຢ່າງເຕັມສ່ວນ ເພື່ອເລືອກເອົາຕົວແທນເຂົ້າໃນສະພາ ແລະ ຈະໄດ້ບອກກ່າວໃຫ້ບັນດາໝູ່ຄູ່, ເອື້ອຍອ້າຍ ຜູ້ທີ່ມີສິດປ່ອນບັດໄດ້ຮັບຮູ້ເຂົ້າໃຈນຳອີກ.

ທ່ານວິລະສັກ ຂຸນວິເສດ ປະຊາຊົນບ້ານທ່າຄັນຊຸມຊົວ ເມືອງລະຄອນເພັງ ກໍ່ໄດ້ສະແດງຄວາມດີໃຈທີ່ໄດ້ເຫັນຜູ້ລົງສະໝັກ ພ້ອມທັງໄດ້ຮັບຟັງປະຫວັດໂດຍຫຍໍ້, ຜົນງານ ແລະ ໜ້າທີ່ຄວາມຮັບຜິດຊອບ, ແຕ່ລະທ່ານກໍ່ຍັງໄດ້ສະແດງທັດສະນະ, ແນວຄວາມຄິດ, ຄວາມມຸ້ງຫວັງຂອງບັນດາທ່ານ ທີ່ຈະຊ່ວຍໃນການຊຸກຍູ້ການສ້າງສາພັດທະນາປະເທດຊາດ ເວົ້າສະເພາະກໍ່ຄືເມືອງລະຄອນເພັງ ແຂວງສາລະວັນ.