ວັນທີ 15 ກຸມພາ 2021 ທີ່ຜ່ານມານີ້ ບໍລິສັດເບຍລາວ ຈໍາກັດ ໄດ້ມອບເງິນ 200 ລ້ານກີບ ໃຫ້ແກ່ຄະນະພັກ-ອົງການປົກຄອງແຂວງຈໍາປາສັກ ເພື່ອປະກອບສ່ວນໃນການເຄື່ອນໄຫວວຽກງານປ້ອງກັນ, ສະກັດກັ້ນ ແລະ ຕອບໂຕ້ການລະບາດຂອງພະຍາດ ໂຄວິດ-19.

ພິທີມອບ-ຮັບເງິນໃນຄັ້ງນີ້ ຈັດຂຶ້ນຢູ່ຫ້ອງວ່າການແຂວງ ມອບໂດຍ ທ່ານ ເຮັນລິກ ຈູນ ແອນເດີຊັນ ຜູ້ອໍານວຍການໃຫຍ່ບໍລິສັດເບຍລາວ ຈໍາກັດ ແລະ ທ່ານ ສູນທອນ ພົມມະຈັກ ປະທານ ບໍລິສັດເບຍລາວຈໍາກັດ ເປັນກຽດຮັບໂດຍ ທ່ານ ປອ ວິໄລວົງ ບຸດດາຄໍາ ກໍາມະການສູນກາງພັກ ເລຂາພັກແຂວງ ເຈົ້າແຂວງໆ ຈໍາປາສັກ ມີການນຳແຂວງ ແລະ ພະນັກ ງານຂະແໜງການທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພະຍານ.

ນອກຈາກນີ້ ທ່ານ ເຮັນລິກ ຈູນ ແອນເດີຊັນ ຜູ້ອໍານວຍການໃຫຍ່ບໍລິສັດເບຍລາວ ຈໍາກັດ ແລະ ທ່ານ ສູນທອນ ພົມມະຈັກ ປະທານ ບໍລິສັດເບຍລາວຈໍາກັດ ໄດ້ໄປຢ້ຽມຢາມ ແລະ ຊົມເຊີຍຜົນສຳເລັດກອງປະຊຸມໃຫຍ່ ຄັ້ງທີ IX ຂອງແຂວງສາລະວັນ.

ແລະ ໃນໂອກາດດຽວກັນກໍ່ໄດ້ບໍລິຈາກເງີນ ຈຳນວນ 100 ລ້ານກີບ ເພື່ອຊ່ວຍໃນວຽກງານສາທາລະນະສຸກຂອງແຂວງ ໂດຍສະເພາະເລັ່ງໃສ່ການປ້ອງກັນ, ສະກັດກັ້ນ ແລະ ຕອບໂຕ້ການລະບາດຂອງພະຍາດ ໂຄວິດ-19 ທີ່ທົ່ວສັງຄົມກຳລັງເປັນຫ່ວງ ເປັນກຽດຮັບໂດຍ ທ່ານ ໂພໄຊ ໄຊຍະສອນ ເຈົ້າແຂວງໆ ສາລະວັນ ແລະ ພ້ອມດ້ວຍຄະນະ ເງີນດັ່ງກ່າວຈະນຳໃຊ້ເຂົ້າໃນວຽກງານປ້ອງກັນ, ສະກັດກັ້ນ ແລະ ຕອບໂຕ້ການລະບາດຂອງພະຍາດ ໂຄວິດ-19 ໃຫ້ເກີດປະໂຫຍດສູງສຸດ.