ວັນທີ 16 ກຸມພາ 2021 ນີ້ທີ່ຫ້ອງການບ້ານທົ່ງໄກ່ໂອກເຂດວັງຕັດ,​ເມືອງຊານໄຊ ແຂວງອັດຕະປື ຜູ້ສະໝັກຮັບເລືອກຕັ້ງເປັນສະມະຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ​II​ ໄດ້ລົງເຄື່ອນໄຫວໂຄສະນາຫາສຽງ ຢູ່ບ້ານທົ່ງໄກ່ໂອກ,ນຳໂດຍທ່ານ ຄຳບຸນ ດວງພະບາງ ຄະນະປະຈຳພັກແຂວງ ຫົວໜ້າຄະນະຈັດຕັ້ງ ແຂວງອັດຕະປື,ມີຄະນະກຳມະການຂັ້ນແຂວງ,ຂັ້ນເມືອງ ພ້ອມດ້ວຍປະຊາຊົນພາຍໃນບ້ານ ເຂົ້າຮ່ວມ.

ທ່ານ ຄຳບຸນ ດວງພະບາງ ໄດ້ກ່າວມີຄຳເຫັນວ່າ: ການເລືອກຕັ້ງຊຸດນີ້ ເປັນການສືບຕໍ່ປັບປຸງ,ບູລະນະລະບອບປະຊາທິປະໄຕ ປະຊາຊົນ,ຈາກປະຊາຊົນ ໂດຍປະຊາຊົນ ແລະ ເພື່ອຜົນໂຫຍດຂອງປະຊາຊົນ,ການເລືອກຕັ້ງ ເປັນພາກສ່ວນໜື່ງໃນການປັບປຸງບູລະນະການຈັດຕັ້ງ ແລະ ບຸກຄະລາກອນຂອງລະບົບການເມືອງຢູ່ສູນກາງ ແລະ ທ້ອງຖິ່ນ ເປັນການເລືອກເຟັ້ນ ແລະ ຊັບຊ້ອນພະນັກງານຮັບຜິດຊອບໃນວຽກງານຕ່າງໆ,ການເລືອກຕັ້ງຊຸດນີ້ ເປັນຄວາມຮັບຜິດຊອບຂອງຄະນະພັກທຸກຂັ້ນ ແລະ ຂອງທົ່ວປວງຊົນລາວ ທັງເລືອກໄດ້ຜູ້ທີ່ມີມາດຖານ,ເງື່ອນໄຂຄົບຖ້ວນ ທັງສູນກາງ,ທ້ອງຖິ່ນ,ເພດເຜົ່າ,ຜູ້ເກົ່າ ແລະ ຜູ້ໃໝ່.

ໂອກາດດັ່ງກ່າວຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດ ຊຸດທີ IX ຈໍານວນ 9 ທ່ານ,​ ຍິງ​ 3​ ທ່ານ ແລະ ຜູ້ສະໝັກສະມາຊິກສະພາປະຊາຊົນແຂວງ ຊຸດທີ II ເຂດເລືອກຕັ້ງເມືອງຊານໄຊ ຈໍານວນ 6 ທ່ານ,​ຍິງ​ 1​ທ່ານ,​ກໍ່ໄດ້ນໍາສະເໜີຕົວ ເພື່ອສ້າງເງື່ອນໄຂໃຫ້ຜູ້ມີສິດປ່ອນບັດເລືອກຕັ້ງ ຮັບຮູ້ເຂົ້າໃຈຢ່າງຖືກຕ້ອງຕໍ່ປະຫວັດຄວາມເປັນມາຜົນງານ ແລະ ວິໃສທັດ ຂອງຕົນ ເພື່ອໃຫ້ຜູ້ມີສິດເລືອກຕັ້ງ ຮັບຮູ້ ແລະ ເຂົ້າໃຈແຈ້ງຕື່ມ ກ່ຽວກັບທາດແທ້ລະບອບການເມືອງ ເຊິ່ງແມ່ນລະບອບປະຊາທິປະໄຕ ປະຊາຊົນ,ມີຄວາມຮັບຮູ້ ແລະ ເຂົ້າໃຈກ່ຽວກັບໂຄງປະກອບການຈັດຕັ້ງ ແລະ ບຸກຄະລາກອນ ຂອງສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນ ຊຸດທີ II ເຫັນໄດ້ສິດ,ໜ້າທີ ແລະ ພັນທະຂອງພົນລະເມືອງໃນການໄປໃຊ້ສິດປ່ອນບັດເລືອກຕັ້ງຢ່າງຄົບຖ້ວນ,ຖືກຕ້ອງຕາມກົດໝາຍ ແລະ ລະບຽບການ,ພ້ອມທັງໃຫ້ຜູ້ສະໝັກຮັບເລືອກຕັ້ງໄດ້ຮັບຮູ້ກ່ຽວກັບຄວາມມຸ້ງມາດປາດຖະໜາ ແລະ ສະພາບການພັດທະນາ ການດໍາລົງຊີວິດຂອງປະຊາຊົນບັນດາເຜົ່າ ໃນເຂດເລືອກຕັ້ງຂອງຕົນ ພ້ອມທັງສ້າງສາຍພົວພັນສະນິດແໜ້ນ ກັບປະຊາຊົນຢູ່ໃນທ້ອງຖິ່ນ ທີ່ຕົນລົງສະໝັກເລືອກຕັ້ງເພື່ອຮັບປະກັນ300%.
ບ້ານທົ່ງໄກ້ໂອກ ມີພົນລະເມືອງ 632​ ຄົນ,​ຍິງ​ 306​ ຄົນ,​ໃນນັ້ນຜູ້ມີສິດປ່ອນບັດ ມີ​ 335​ ຄົນ,​ຍິງ​ 164​ ຄົນ.,ມີ​ 1ໜ່ວຍປ່ອນບັດ ແລະ​ ມີ​ 2​ ຫີບບັດ.​