ໃນຕອນບ່າຍຂອງວັນທີ 15 ກຸມພານີ້ ຢູ່ທີ່ສະໂມສອນເມືອງ ໄຊພູທອງ ແຂວງ ສະຫວັນນະເຂດ ບັນດາທ່ານຜູ້ສະໝັກເລືອກຕັ້ງຈຳນວນ 25 ທ່ານ ໄດ້ເດີນທາງມາພົບປະໂອ້ລົມຜູ້ມີສິດເລືອກຕັ້ງທີ່ເມືອງໄຊພູທອງ ໂດຍການໃຫ້ກຽດຕ້ອນຮັບຂອງທ່ານ ຮ່ວນ ຮັງບົວສອນ ຮອງເລຂາພັກເມືອງໄຊພູທອງພ້ອມດ້ວຍ ພະນັກງານລັດຖະກອນ ພໍ່ແມ່ ປະຊາຊົນເຂົ້າຮ່ວມຕ້ອນຮັບ .

ໃນພິທີຍັງໄດ້ຮັບຟັງການລາຍງານຄວາມພ້ອມໃນການຈັດຕັ້ງປະຕິບັດວຽກງານບັ້ນເລືອກຕັ້ງສະມາຊິກສະພາແຫ່ງຊາດຊຸດທີ 9 ແລະ ສະມາຊິກສະພາປະຊາຊົນແຂວງເຂດເລືອກຕັ້ງເມືອງໄຊພູທອງທີ່ຈະໄດ້ຈັດຂື້ນໃນວັນທີ 21 ກຸມພາ ທີ່ຈະມາເຖິງນີ້ ທົ່ວເມືອງ ໄຊພູທອງມີຈຳນວນພົນລະເມືອງ 51.944 ຄົນ ຍິງ 25.962 ຄົນ ,ອາຍຸ 18 ປີຂື້ນໄປ 36.311 ຄົນ ຍິງ18.555 ຄົນ , ມີໜ້າປ່ອນບັດຕົວຈິງ 26.035ຄົນ ຍິງ 13.513 ຄົນພາຍໃນເມືອງໄຊພູທອງມີ 45 ໜ່ວຍປ່ອນບັດ. ຈາກນັ້ນກໍ່ໄດ້ຮັບຟັງການສະເໜີລາຍຊື່ແລະປະຫວັດການເຄື່ອນໄຫວຂອງຜູ້ສະໝັກເລືອກຕັ້ງສະມາຊິກສະພາແຫ່ງຊາດຊຸດທີ 9ຈຳນວນ 25 ທ່ານ ແລະ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງໄຊພູທອງຊຸດທີ 2ຈຳນວນ 4ທ່ານ ພ້ອມທັງຮັບຟັງການໂອ້ລົມແລະແນະນຳຕົວຈາກນໍ້າເບີ 14 ທ່ານ ປອ ສຸລາພອນ ອິນທະວົງ,ເບີ 25 ທ່ານ ມົງກຸດເພັດ ວົງພະຈັນ ແລະ ສະມາຊິກສະພາປະຊາຊົນແຂວງປະຈຳເຂດເມືອງໄຊພູທອງເບີ 1ທ່ານ ພັນໂທ ສັງວານ ວົງວິໄລ.

ໂອກາດທີ່ໄດ້ເຂົ້າຮ່ວມຮັບຟັງການມາພົບປະຂອງຜູ້ສະໝັກເລືອກຕັ້ງຕໍ່ຜູ້ມີສິດເລືອກຕັ້ງເມືອງໄຊພູທອງໃນຄັ້ງນີ້ທ່ານ ສົມພິດ ໄຊຍະບົວສີ ພະນັກງານເມືອງໄຊພູທອງໄດ້ສະແດງຄວາມຮູ້ສືກຂອງຕົນໃນບັ້ນເລືອກຕັ້ງສະມາຊິກສະພາແຫ່ງຊາດຊຸດທີ 9 ແລະ ສະມາຊິກສະພາປະຊາຊົນແຂວງ ຊຸດທີ 2 ອອກມາວ່າ : ການເລືອກຕັ້ງຄັ້ງນີ້ມີຄວາມໝາຍຄວາມສໍາຄັນທາງດ້ານການເມືອງເປັນການເລືອກເອົາຕົວແທນຂອງປະຊາຊົນເຂົ້າໄປເຄື່ອນໄຫວວຽກງານ, ເພື່ອເປັນຕົວແທນໃຫ້ກັບປະຊາຊົນ, ດັ່ງນັ້ນຈຶ່ງຮຽກຮ້ອງໃຫ້ຜູ້ມີສິດເລືອກຕັ້ງໃຫ້ໄປໃຊ້ສິດຂອງຕົນໃນວັນທີ 21 ກຸມພາ ນີ້ໃຫ້ໄດ້ 100%.