ງານວາງສະແດງສິນຄ້າ ແລະ ຕັ້ງກອງບຸນ ທີ່ຫໍຈາລຶກເຫດການປະຫວັດສາດ ບັ້ນຮົບປ້ອງກັນຕົວເມືອງທ່າແຂກ 21 ມີນາ 1946 ໄດ້ເປີດຂຶ້ນໃນວັນທີ 15 ກຸມພາ 2021 ເປັນກຽດເຂົ້າຮ່ວມມີທ່ານ ວັນໄຊ ພອງສະຫວັນ ເຈົ້າແຂວງ ຄຳມ່ວນ, ທ່ານ ແກ້ວລັນດອນ ຈັນທະປານີ ເຈົ້າເມືອງທ່າແຂກ, ທ່ານ ວັນນະລັກ ພົມມະວົງສາ ປະທານບໍລິສັດໄຮໂດຼ ພາວເວີ ຈຳກັດ ພ້ອມດ້ວຍບັນດາທ່ານການນຳຂອງແຂວງ, ຄະນະພະແນກການ, ຂະແໜງການອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ແກ້ວລັນດອນ ຈັນທະປານີ ເຈົ້າເມືອງທ່າແຂກ ທັງເປັນປະທານຈັດງານ ໄດ້ຂຶ້ນກ່າວຕໍ່ພິທີເປີດງານ ດັ່ງກ່າວວ່າ: ເພື່ອເປັນການ ລະນຶກເຖິງມູນເຊື້ອການຕໍ່ສູ້ອັນອົງອາດ, ທົນທານໜຽວແໜ້ນ ບໍ່ຍອມຈຳນົນ ພວກເຮົາໄດ້ ພ້ອມກັນຈັດງານດັ່ງກ່າວຂຶ້ນ ເພື່ອອຸທິດຫາດວງວິນຍານຂອງນັກຮົບປະຕິວັດ ແລະ ປະຊາຊົນບັນດາເຜົ່າ ຊາວເມືອງ ທ່າແຂກ ທີ່ເສຍສະຫຼະເລືອດເນື້ອ ອັນສູງສົ່ງ ເພື່ອປ້ອງກັນຕົວເມືອງທ່າແຂກ 21 ມີນາ 1946 ຕິດພັນກັບການສົ່ງເສີມ, ຊຸກຍູ້ຂະບວນການ ຜະລິດເປັນສິນຄ້າ ແລະ ຊຸກຍູ້ການທ່ອງທ່ຽວພາຍໃນໃຫ້ມີການຂະຫຍາຍຕົວ ຄຽງຄູ່ກັບການຊຸກຍູ້ ເສດຖະກິດ ຕິດພັນກັບການສ້າງຂະບວນການເຮັດໃຫ້ເມືອງທ່າແຂກ ມີບັນຍາກາດທີ່ຟົດຟື້ນ.

ເຊິ່ງງານດັ່ງກ່າວ ແມ່ນຈະໄດ້ເລີ່ມແຕ່ວັນທີ 15-19 ກຸມພາ 2021 ພາຍໃນງານຈະມີການຕັ້ງກອງບຸນຈຳນວນ 02 ກອງຢູ່ໃນຫໍຈາລຶກ 21 ມີນາ ແລະ ບໍລິເວນອ້ອມຂ້າງດ້ານນອກກໍ່ຈະມີຮ້ານຄ້າເຂົ້າຮ່ວມວາງສະແດງ ແລະ ຈຳໜ່າຍສິນຄ້າທັງໝົດ 68 ຮ້ານ. ໃນນັ້ນຮ້ານຜະລິດຕະພັນສິນຄ້າໂອດ໋ອບ ຂອງແຂວງຈຳນວນ 03 ຮ້ານ, ຈາກຕ່າງແຂວງ 17 ຮ້ານ ແລະ ຮ້ານຄ້າ ຈາກຫົວໜ່ວຍທຸລະກິດ 48 ຮ້ານ.

ນອກຈາກການວາງສະແດງສິນຄ້າແລ້ວ ໃນຍາມຄໍ່າຄືນຍັງມີການສະແດງສີລະປະ ທີ່ມາຈາກສູນກາງໃນແຕ່ລະຄືນ ແລະ ໃນຕອນເຊົ້າຂອງວັນທີ 19 ກຸມພາ ຈະມີການໃສ່ບາດຖວາຍສັງຄະທານ ເພື່ອ ອຸທິດສ່ວນບຸນກຸສົນເຖິງດວງວິນຍານຂອງນັກຮົບປະຕິວັດ ແລະ ປະຊາຊົນບັນດາເຜົ່າຊາວເມືອງທ່າແຂກ ທີ່ເສຍສະຫຼະ ເລືອດເນື້ອ ເພື່ອປ້ອງກັນຕົວເມືອງທ່າແຂກ ໃນເຫດການ 21 ມີນາ ປີ 1946. ໂອກາດດຽວກັນ ບັນດາຄະນະປະທານ ແລະ ແຂກທີ່ເຂົ້າຮ່ວມພາຍໃນງານກໍ່ໄດ້ຮ່ວມຕັດແຖບຜ້າ ເພື່ອເປີດ ງານຢ່າງເປັນທາງການ ພ້ອມທັງເລາະຊົມການວາງສະແດງສິນຄ້າປະເພດຕ່າງໆ.