ກົມສື່ມວນຊົນ ໄດ້ຈັດກອງປະຊຸມເຜີຍແຜ່ຂໍ້ຕົກລົງ ຂອງລັດຖະມົນຕີ ວ່າດ້ວຍການຄຸ້ມຄອງຈານດາວທຽມ ແລະ ຝຶກອົບຮົມເຕັກນິກການຖະແຫຼງຂ່າວ ທີ່ແຂວງໄຊຍະບູລີ ໃນວັນທີ 16 ກຸມພາ 2021 ນີ້ຢູ່ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງໄຊຍະບູລີ. ໃຫ້ກຽດເຂົ້າຮ່ວມມີ ທ່ານ ສະຫວັນຄອນ ລາຊະມົນຕີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ທ່ານ ນາງ ບົວຈັນ ພັນທະວົງ ຫົວໜ້າພະແນກ ຖວທ ແຂວງ, ມີຫົວໜ້າກົມ, ຮອງກົມ, ຄະນະພະແນກ, ຫົວໜ້າ, ຮອງຫົວໜ້າຫ້ອງການ ຖວທ 11 ເມືອງ, ຫົວໜ້າ, ຮອງຫົວໜ້າຂະແໜງການ ພ້ອມດ້ວຍພະນັກງານວິຊາການເຂົ້າຮ່ວມ.

ໃນພິທີພາຍຫຼັງ ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ ໄດ້ກ່າວຕ້ອນຮັບ ແລະ ລາຍງານຫຍໍ້ທີ່ຕັ້ງຈຸດພິເສດຂອງແຂວງໄຊຍະບູລີ, ແຜນພັດທະນາເສດຖະກິດສັງຄົມ, ການພັດທະນາພື້ນຖານໂຄງລ່າງ ແລະ ຜົນສໍາເລັດໃນການຈັດຕັ້ງປະຕິບັດວຽກງານຖະແຫຼງຂ່າວ ວັດທະນະທໍາຂອງແຂວງໃນໄລຍະຜ່ານມາ ກໍ່ຄືການຈັດຕັ້ງປະຕິບັດໃນປະຈຸບັນ. ຈາກນັ້ນ ທ່ານ ສະຫວັນຄອນ ລາຊະມົນຕີ ຮອງລັດຖະມົນຕີກະຊວງ ຖວທ ໃຫ້ກຽດກ່າວເປີດກອງປະຊຸມເຜີຍແຜ່ຂໍ້ຕົກລົງ ຂອງລັດຖະມົນຕີ ວ່າດ້ວຍການຄຸ້ມຄອງຈານດາວທຽມ ແລະ ຝຶກອົບຮົມເຕັກນິກຖະແຫຼງຂ່າວ. ໃນໄລຍະຜ່ານມາບໍລິສັດດາວທຽມລາວເອເຊຍປາຊີຟິກຈໍາກັດ ໄດ້ປະກອບສ່ວນຢ່າງຕັ້ງໜ້າ ໃນການຈັດຝຶກອົບຮົມໃນດ້ານວຽກງານຖະແຫຼງຂ່າວ ໃນການປັບປຸງວຽກງານຄຸ້ມຄອງວິທະຍຸ-ໂທລະພາບ, ວຽກງານໂທລະໂຄ່ງ ການຄຸ້ມຄອງອຸປະກອນຮັບສັນຍານຜ່ານດາວທຽມ ແລະ ວຽກງານຖະແຫຼງຂ່າວດ້ານອື່ນໆ. ດັ່ງນັ້ນ ກອງປະຊຸມຄັ້ງນີ້ບັນດາຜູ້ເຂົ້າຮ່ວມ ຈະໄດ້ຮຽນຮູ້ ຄໍາແນະນໍາຂອງຫ້ອງວ່າການສໍານັກງານນາຍົກ ແລະ ຂໍ້ຕົກລົງລັດຖະມົນຕີ ເລກທີ 961 ວ່າດ້ວຍການຄຸ້ມຄອງອຸປະກອນ ເຄື່ອງຮັບສັນຍານວິທະຍຸ-ໂທລະພາບຜ່ານດາວທຽມ ມີ 8 ໜວດ 9 ມາດຕາ, ເຜີຍແຜ່ຂໍ້ມູນລະບົບດາວທຽມລາວແຊັດ 1, ເຜີຍແຜ່ລົງເລິກຕົວຈິງກ່ຽວກັບການຄຸ້ມຄອງອຸປະກອນເຄື່ອງຮັບສັນຍານດາວທຽມ DTH, ຜ່ານລະບຽບຫຼັກການຕ່າງໆ, ອົບຮົມດ້ານເຕັກນິກລະບົບໂທລະໂຄ່ງ, ລົງປະຕິບັດຕົວຈິງຕິດຕັ້ງ ແລະ ການນໍາໃຊ້ອຸປະກອນເຄື່ອງຮັບສັນຍານຜ່ານດາວທຽມ ແລະ ການຕິດຕັ້ງໂທລະໂຄ່ງ. ທັງນີ້ກໍ່ເພື່ອສ້າງຄວາມສາມາດ ໃຫ້ແກ່ພະນັກງານວິຊາການຖະແຫຼງຂ່າວ ໃຫ້ມີຄວາມສາມາດໃນການຄຸ້ມຄອງຫົວໜ່ວຍທຸລະກິດ, ການນໍາເຂົ້າ, ການຈໍາໜ່າຍ ແລະ ບໍລິການອຸປະກອນຮັບສັນຍານວິທະຍຸ-ໂທລະພາບຜ່ານດາວທຽມຢູ່ໃນ ສປປ ລາວ ໃຫ້ເປັນລະບົບ, ມີຄວາມທັນສະໄໝ, ປອດໄພ ແລະ ຍຸຕິທໍາ ຖືກຕ້ອງຕາມກົດໝາຍ ຂອງ ສປປ ລາວ. ຈາກນັ້ນ ບັນດາຜູ້ເຂົ້າຮ່ວມ ໄດ້ປະກອບຄໍາຄິດຄໍາເຫັນ ທັງດ້ານດີ ແລະ ຂໍ້ຫຍຸ້ງຍາກ ທີ່ໄດ້ປະສົບບັນຫາໃນການຈັດຕັ້ງວຽກງານຖະແຫຼງຂ່າວ ທີ່ເມືອງຕົນເອງໄດ້ພົບພໍ້ ເພື່ອເປັນການແລກປ່ຽນບົດຮຽນ ແລະ ຊອກວິທີການແກ້ໄຂໃນຕໍ່ໜ້າ. ຊຸດອົບຮົມຈະໃຊ້ເວລາ 2 ວັນຈຶ່ງສໍາເລັດ.