ເພື່ອເຮັດໃຫ້ປະຊາຊົນຜູ້ມີສິດເລືອກຕັ້ງເຂົ້າໃຈ ແລະ ຕື່ນຕົວອອກໄປໃຊ້ສິດຂອງຕົນຢ່າງເຕັມສ່ວນໃນການເລືອກເອົາຜູ້ແທນຂອງຕົນເຂົ້າຢູ່ໃນສະພາແຫ່ງຊາດ ແລະ ສະພາປະຊາຊົນແຂວງ ໃນຈຳນວນຜູ້ສະໝັກ 25 ທ່ານແມ່ນໃຫ້ຂີດອອກ 5 ທ່ານ ເພື່ອເປັນຕົວແທນແຫ່ງສິດເປັນເຈົ້າຂອງປະຊາຊົນເຂົ້າໃນການຕັດສິນບັນຫາສຳຄັນຂອງຊາດເພື່ອປະຊາຊົນ,ໂດຍປະຊາຊົນຢ່າງແທ້ຈິງ. ດັ່ງນັ້ນໃນວັນທີ 16 ກຸມພາ ນີ້ຢູ່ທີ່ສະໂມສອນຫ້ອງວ່າການປົກຄອງເມືອງຈຳພອນ ແຂວງ ສະຫັວນນະເຂດໄດ້ຈັດພິທີຕ້ອນຮັບ ແລະ ຮັບຟັງການລາຍງານກ່ຽວກັບການກຽມພ້ອມແກ່ບັ້ນເລືອກຕັ້ງສະມາຊິກສະພາແຫ່ງຊາດຊຸດທີ 9 ແລະ ສະມາຊິກສະພາປະຊາຊົນຂັ້ນແຂວງຊຸດທີ 2 ປະຈຳເຂດເລືອກຕັ້ງເມືອງຈຳພອນ .ໂດຍການໃຫ້ກຽດຕ້ອນຮັບຂອງທ່ານ ຄຳລຸຍ ຍາດຕິວົງ ກຳມະການພັກແຂວງ ເລຂາພັກເມືອງ ເຈົ້າເມືອງຈຳພອນ ,ມີຄະນະກຳມະການເລືອກຕັ້ງຂັ້ນເມືອງ ແລະ ຜູ້ມີສິດເລືອກຕັ້ງພາຍໃນເມືອງຈຳພອນເຂົ້າຮ່ວມ.

ໃນພິທີໄດ້ຮັບຟັງການລາຍງານກ່ຽວກັບການກະກຽມໃຫ້ແກ່ບັ້ນເລືອກຕັ້ງໃນຄັ້ງນີ້ຈາກທ່ານ ຄຳລຸຍ ຍາດຕິວົງ ເຈົ້າເມືອງຈຳພອນ ເຊິ່ງຜ່ານມາຄະນະພັກ ອົງການປົກຄອງເມືອງຈຳພອນໄດ້ເອົາໃຈໃສ່ຊີ້ນຳ ນຳພາການຈັດຕັ້ງທຸກພາກສວ່ນ ແລະ ພໍ່ແມ່ປະຊາຊົນບັນດາເຜົ່າຊາວເມືອງຈຳພອນ ພ້ອມພາກັນອອກແຮງແຂ່ງຂັນທັງເປັນການສ້າງຂະບວນການຂ່ຳນັບຮັບຕ້ອນໃຫ້ແກ່ການເລືອກຕັ້ງສະມາຊິກສະພາແຫ່ງຊາດຊຸດທີ 9 ແລະ ສະມາຊິກສະພາປະຊາຊົນຂັ້ນແຂວງຊຸດທີ 2 ເຂດເລືອກຕັ້ງທີ 13 ແຂວງ ສະຫວັນນະເຂດ ທີ່ຈະໄດ້ຈັດຂື້ນໃນວັນທີ 21 ກຸມພານີ້ ເຊິ່ງເຮັດໃຫ້ຂະບວນການຫລາຍດ້ານໄດ້ຮັບຜົນສຳເລັດຢ່າງເປັນຮູບປະທຳ ສຳລັບວຽກງານຈຸດສຸມທີ່ກະກຽມໃຫ້ແກ່ການເລືອກຕັ້ງເພື່ອຮັບປະກັນໃຫ້ໄດ້ 300% ເມືອງຈຳພອນມີບ້ານທັງໝົດ 100 ບ້ານ,ຈຳນວນພົນລະເມືອງ 118.706 ຄົນ ຍິງ 60.031 ຄົນ ອາຍຸກະສຽນ 18 ປີ ຂື້ນໄປ 74.877 ຄົນ ຍິງ 38.176 ຄົນ ຜູ້ມີໜ້າຕົວຈິງທີ່ມີສິດເລືອກຕັ້ງ 53.807 ຄົນ ຍິງ 27.717 ຄົນ , ໄປສືກສາຢູ່ພາຍໃນປະເທດ 65 ຄົນ ຍິງ 26 ຄົນ.ໄປສືກສາຢູ່ຕ່າງປະເທດ 11 ຄົນ ຍິງ 6 ຄົນ ,ໄປອອກແຮງງານພາຍໃນປະເທດ 6.940 ຄົນ ຍິງ 2.744 ຄົນ ,ຜູ້ມີສິດເລືອກຕັ້ງໄປອອກແຮງງານ ຢູ່ຕ່າງປະເທດ 13.165 ຄົນ ຍິງ 7.441 ຄົນ ,ຖືກສານຕັດສິນລົງໂທດຕັດອິດສະຫລະພາບ 354 ຄົນ ຍິງ 71 ຄົນ, ຜູ້ເປັນບ້າເສຍຈິດ 494 ຄົນ ຍິງ 160 ຄົນ , ທົ່ວເມືອງກຳນົດເອົາ 86 ຫນ່ວຍປ່ອນບັດ ,ມີຄະນະຮັບຜິດຊອບ 1.290 ຄົນ , ກຳລັງປ້ອງກັນຄວາມສະຫງົບ 1.792 ຄົນ .ຈາກນັ້ນກໍ່ໄດ້ຮັບຟັງການລາຍງານຊື່ແລະປະຫວັດຂອງຜູ້ສະໜັກຮັບເລືອກຕັ້ງສະມາຊິກສະພາແຫ່ງຊາດທັງ 25ທ່ານ ແລະ ຜູ້ສະໝັກສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງຈຳພອນ 5 ທ່ານ ພ້ອມຮັບຟັງການພົບປະໂອ້ລົມຈາກຜູ້ສະໝັກນ້ຳເບີ 18 ທ່ານ ນາງ ໄຊຊົມຊື່ນ ໂພທິສານ ເຊິ່ງທ່ານໄດ້ໃຫ້ຮູ້ເຖິງວຽກງານສິດໜ້າທີ່,ພາລະບົດບາດ , ການຈັດຕັ້ງປະຕິບັດວຽກງານ ຂອງສະມາຊິກສະພາແຫ່ງຊາດ ຕາມທີ່ໄດ້ກຳນົດໄວ້ໃນກົດໝາຍວ່າດ້ວຍສະພາແຫ່ງຊາດ ນຳມາເຜີຍແຜ່ໃຫ້ປະຊາຊົນໄດ້ຮັບຮູ້,ເຂົ້າໃຈ ແລະ ເພື່ອນຳເອົາຄວາມຄິດເຫັນ ນຳສະເໜີຕໍ່ກອງປະຊຸມສະພາແຫ່ງຊາດ ຈາກນັ້ນກໍ່ໄດ້ຮັບຟັງການໂອ້ລົມຈາກທ່ານຜູ້ສະໝັກນ້ຳເບີທີ 13 ທ່ານ ໄຊຍະເດດ ຜຸຍຍະວົງ ເຊິ່ງທ່ານໄດ້ເວົ້າເຖິງວຽກງານພັດທະນາພື້ນຖານໂຄງລ່າງ ວຽກງານພັດທະນາເສດຖະກິດສັງຄົມຂອງເມືອງຈຳພອນ , ຈາກນັ້ນກໍ່ໄດ້ຮັບການໂອ້ລົມຂອງທ່ານ ດວງຈັນ ວຽງວິໄລ ຜູ້ສະໝັກນ້ຳເບີ 2 ສະມາຊິກສະພາປະຊາຊົນແຂວງເຂດເລືອກຕັ້ງເມືອງຈຳພອນຕື່ມອີກ.