ວັນທີ 16 ກຸມພາ 2021, ຜູ້ສະໝັກ ຮັບເລືອກຕັ້ງເປັນສະມາຊິກສະພາແຫ່ງຊາດ(ສສຊ) ເຂດເລືອກຕັ້ງທີ 15 ແຂວງຈໍາປາສັກ ຈຸທີ II ຈຳນວນ 10 ທ່ານ. ນໍາໂດຍທ່ານ ສາຍທອງ ໄຊຍະວົງ ຮອງເລຂາພັກແຂວງ​ ແຂວງຈຳປາສັກ ປະທານຄະນະກໍາມະການເສດຖະກິດ, ແຜນການ ແລະ ການເງິນ ສະພາປະຊາຊົນແຂວງ ຜູ້ສະໝັກ ສສຊ ເບີ 2 ພ້ອມດ້ວຍຜູ້ສະໝັກຮັບເລືອກຕັ້ງ ສສຂ ປະຈໍາເຂດເລືອກຕັ້ງເມືອງປະທຸມພອນ 5 ທ່ານ ໄດ້ເຄື່ອນໄຫວ ພົບປະຜູ້ມີສິດປ່ອນບັດເລືອກຕັ້ງ ຢູ່ສະໂມສອນເມືອງປະທຸມພອນ.

ໃຫ້ກຽດຕ້ອນຮັບ ຜູ້ສະໜັກຮັບເລືອກຕັ້ງ ສສຊ ແລະ ສສຂ ຄັ້ງນີ້ ໂດຍ ທ່ານ ວຽງສະໄໝ ສີລິພອນພັນ ກຳມະການພັກແຂວງ ເລຂາພັກເມືອງເຈົ້າເມືອງປະທຸມພອນ ປະທານຄະນະກຳມະການເລືອກຕັ້ງຂັ້ນເມືອງ, ມີຮອງເລຂາພັກເມືອງ, ຄະນະປະຈຳ ແລະ ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການ,ເລຂາຄະນະພັກຮາກຖານກຸ່ມບ້ານພ້ອມດ້ວຍພະນັກງານວິຊາການພາຍໃນເມືອງເຂົ້າຮ່ວມ.

ການເຄື່ອນໄຫວພົບປະຜູ້ມີສິດປ່ອນບັດເລືອກຕັ້ງຂອງຜູ້ສະໝັກຮັບເລືອກຕັ້ງ ສສຊ ແລະ ສສຂ ໃນຄັ້ງນີ້ ກໍເພື່ອເຮັດໃຫ້ຜູ້ມີສິດເລືອກຕັ້ງ ໄດ້ຮູ້ໄດ້ເຫັນຜູ້ສະໝັກຮັບເລືອກຕັ້ງ ແລະ ໄດ້ຮັບຮູ້ຂໍ້ມູນ, ຊີວະປະຫວັດການເຄື່ອນໄຫວວຽກງານຂອງຜູ້ສະໝັກຮັບເລືອກຕັ້ງໃນແຕ່ລະໄລຍະ ເພື່ອເປັນບ່ອນອີງໃຫ້ແກ່ການເລືອກ ເອົາຜູ້ສະໝັກຮັບເລືອກຕັ້ງເປັນ ສສຊ ຊຸດທີ IX ແລະ ສສຂ ຊຸດທີ II. ຂ່າວ: ແຂວງຈຳປາສັກ