ພິທີເປີດການກໍ່ສ້າງເສັ້ນທາງເບຕົງເສີມເຫຼັກຜ່ານບ້ານຜັກຂະຍ່າເມືອງອາດສະພອນແຂວງສະຫວັນນະເຂດໄດ້ຈັດຂຶ້ນໃນຕອນເຊົ້າຂອງວັນທີ 15 ກຸມພາ 2021ໂດຍການໃຫ້ກຽດເຂົ້າຮ່ວມຂອງ ທ່ານນາງ ບຸນທະລັງສີ ຄຳມະນີວົງ ກຳມະການພັກແຂວງ ເລຂາພັກເມືອງ ເຈົ້າເມືອງອາດສະພອນ, ທ່ານ ທອງສະໝຸດ ລືນາມມະຈັກ ຫົວໜ້າບໍລິສັດ ທີ່ປຶກສາດ້ານພະລັງານນໍ້ານະຄອນຫຼວງວຽງຈັນຈຳກັດ ທັງແມ່ນຜູ້ອອກແບບການກໍ່ສ້າງໃນຄັ້ງນີ້, ທ່ານວົງໃຈ ໄຊຍະກຸມມານ ນັກທຸລະກິດ ຜູ້ບໍລິຫານໂຮງແຮມ ທິບດາວສະຫວັນ, ມີບັນທ່ານການນຳຈາກຂະແໜງການຕ່າງໆອ້ອມຂ້າງເມືອງ, ບ້ານອ້ອມຂ້າງ, ອົງການປົກຄອງບ້ານ ແລະປະຊາຊົນຊາວບ້ານຜັກຂະຍ່າເຂົ້້າຮ່ວມ.

ໃນພິທີທ່ານ ທອງສະໝຸດ ລືນາມມະຈັກ ໂດຍຕາງໜ້າແກ່ການຈັດຕັ້ງ ແລະປະຊາຊົນຊາວບ້ານຜັກຂະຍ່າໄດ້ລາຍງານແຜນການກໍ່ສ້າງເສັ້ນທາງເບຕົງເສີມເຫຼັກໂດຍສັງເຂບວ່າ: ເສັ້ນທາງດັ່ງກ່າວແມ່ນເສັ້ນທາງຫຼວງຂອງເມືອງເດີມເປັນທາງປູດ້ວຍດິນແດງຜ່ານໃຈກາງຂອງບ້ານ, ການກໍ່ສ້າງໃນຄັ້ງນີ້ແມ່ນເຫັນໄດ້ຄວາມຈຳເປັນຂອງພໍ່ແມ່ປະຊາຊົນພາຍໃນບ້ານເພື່ອຫຼຸດຜ່ອນທາງດ້ານມູນລະພິດທາງອາກາດ(ລະອອງຂີ້ຝຸ່ນ), ແກ້ໄຂຄວາມຫຍຸ້ງຍາກໃນການນຳໄຊ້ເສັ້ນທາງໃນແຕລະປີທັງເປັນໃບໜ້າອັນໃໝ່ຂອງບ້ານໃນການພັດທະນາ ແລະທັງເປັນການສ້າງຂະບວນການຢ່າງຍິ່ງໃຫຍ່ຂອງບ້ານໃນການຕ້ອນຮັບວັນເລືອກຕັ້ງ ສສຊ ຊຸດທີ9, ສສຂ ຊຸດທີ2ທີ່ຈະມາຮອດໃນໝໍ່ໆໜີ້, ພ້ອມທັງເຮັດໃຫ້ຜູ້ວ່າງງານມີວຽກເຮັດງານທຳຕື່ມອີກ, ສຳລັບການກໍ່ເສັ້ນທາງໃນຄັ້ງແມ່ນໄດ້ກຳນົດເອົາໃນຄວາມຍາວ 630 ແມັດ, ກ້ວາງ 5 ແມັດ, ໜາ 15-18 ຊັງຕີແມັດ, ສາມາດຮັບນຳ້ໜັກໄດ້ 12 ໂຕນ, ຄາດໃຫ້ສຳເລັດກ່ອນລະດູຝົນ, ສ່ວນແຫຼ່ງທຶນການກໍ່ສ້າງຂັ້ນຕົ້ນແມ່ນເງິນລວມຂອງບ້ານຈຳນວນ 300ກວ່າລ້ານກີບ ແລະຈະລະດົມການປະກອບຈາກສັງຄົມ, ລູກຫຼານຊາວບ້ານຜັກຂະຍ່າທີ່ອາໄສຢູ່ທ້ອງຖິ່ນອື່ນມາປະກອບສ່ວນຊ່ວຍພັດທະນາບ້ານຮ່ວມກັນ, ສ່ວນແຮງງານກໍ່ສ້າງແມ່ນປະຊາຊົນຊາວບ້ານສາມັກຄີກັນກໍ່ສ້າງ.

ຈາກນັ້ນທ່ານ ນາງ ບຸນທະລັງສີ ຄຳມະນີວົງ ເຈົ້າເມືອງອາດສະພອນກໍ່ໄດ້ກ່າວຄຳເຫັນໃນພິທີເຊິ່ງທ່ານໄດ້ສະແດງຄຳຍ້ອງຍໍຊົມເຊີຍມາຍັງອົງການຈັດບ້ານ ແລະພໍ່ແມ່ປະຊາຊົນຊາວບ້ານຜັກຂະຍ່າທີ່ມີຄວາມສາມັກຄີກັນຢ່າງເປັນປຶກແຜ່ນສຸມເຫື່ອເທແຮງປະກອບສ່ວນເຂົ້າໃນການສ້າງສາພັດທະນາບ້ານເກີດເມືອງນອນຕົນໃຫ້ມີການພັດທະນາເປັນກ້າວໆໃນຕະຫຼອດມາ, ອັນເປັນແບບຢ່າງໃຫ້ແກ່ຫຼາຍໆບ້ານໃນການພັດທະນາພ້ອມທັງສ້າງໃບໜ້າອັນໃໝ່ໃຫ້ກັບບ້ານ ແລະເມືອງທີ່ບ້ານໄດ້ນຳໃຊ້ເສັ້ນທາງເບຕົງເສີມເຫຼັກ, ໃນຕອນທ້າຍທ່ານເຈົ້າເມືອງຍັງໃຫ້ກຽດຕັດແຖບຜ້າລັ່ນຄ້ອງເກົ້າບາດວາງສີລາເລີກໃນການກໍ່ສ້າງຢ່າງເປັນທາງການ
ຜູ້ສື່ຂ່າວ, ເມືອງອາດສະພອນ