ວັນທີ 16 ກຸມພາ 2021 ນີ້ທີ່ຫ້ອງປະຊຸມຄະນະໂຄສະນາອົບຮົມແຂວງ, ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງອັດຕະປື ໄດ້ຈັດຊຸດອົບຮົມການຮັກສາຄຸນນະພາບ, ການບໍລິການ ແລະ ການເອົາໃຈໃສ່ລູກຄ້າ ໃຫ້ພະນັກງານຂະແໜງທ່ອງທ່ຽວ ແລະ ຫົວໜ່ວຍຜູ້ປະກອບການໂຮງແຮມ, ບ້ານພັກ, ຮ້ານອາຫານ, ຮ້ານບັນເທີງ ຂອງເມືອງສາມັກຄີໄຊ ແລະ ເມືອງໄຊເສດຖາ, ໂດຍການເປັນປະທານຂອງທ່ານ ນາງ ບຸນທົງ ບຸບຜາສະຫວັນ ຮອງຫົວ ໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງອັດຕະປື, ໂດຍມີພະນັກງານ ແລະ ຜູ້ປະກອບການເຮືອນພັກ, ໂຮງແຮມ,ຮ້ານອາຫານ, ຮ້ານບັນເທິງ ຂອງສອງເມືອງດັ່ງກ່າວເຂົ້າຮ່ວມ .
ທ່ານນາງ ບຸນທົງ ບຸບຜາສະຫວັນ ໄດ້ກ່າວວ່າ: ການຝຶກອົບຮົມໃນຫົວຂໍ້: ການຮັກສາຄຸນນະພາບ, ການບໍລິການ ແລະ ການເອົາໃຈໃສ່ລູກຄ້າ ຄັ້ງນີ້ ເພື່ອຍົກລະດັບຄວາມຮູ້, ທັກສະ ແລະ ຄຸນສົມບັດຂອງພະນັກງານບໍລິການໃນຂະແໜງການທ່ອງທ່ຽວ ກໍ່ຄືບັນດາຜູ້ປະກອບການໂຮງແຮມ, ບ້ານພັກ, ຮ້ານອາຫານ, ຮ້ານບັນເທີງ ຂອງ 2 ເມືອງ ຄື: ເມືອງສາມັກຄີໄຊ ແລະ ເມືອງໄຊເສດຖາ,ເປັນການໃຫ້ຄວາມຮູ້ ໃຫ້ພະນັກງານບໍລິການຜູ້ທີ່ເຮັດວຽກຕົວຈິງ ແນ່ໃສ່ໃຫ້ສາມາດດຳເນີນການບໍລິການໃຫ້ເກີດຄວາມປະທັບໃຈແກ່ນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ມາຢ້ຽມຢາມ ແຂວງອັດຕະປື ພ້ອມດຽວກັນນີ້ກໍ່ເປັນການສົ່ງເສີມກິດຈະກຳການທ່ອງທ່ຽວໃຫ້ເປັນຂະບວນຟົດຟື້ນ .
ຊຸດອົບຮົມຄັ້ງນີ້ຈະໄດ້ດໍາເນີນເປັນເວລາ 3 ວັນ,ໂດຍສໍາມະນາກອນ ຈໍານວນ​ 37 ທ່ານ​ຈະໄດ້ຮຽນຮູ້ບົດຮຽນສໍາຄັນທັງພາກທິດສະດີ ແລະ ພາກປະຕິບັດຕົວຈິງ ເປັນຕົ້ນ: ການເປັນເຈົ້າພາບທີ່ດີ ແລະ ການຕ້ອນຮັບນັກທ່ອງ​ທ່ຽວ​,ການບໍລິການ ແລະ ການເອົາໃຈໃສ່ການບໍລິການແຂກ ໃນໄລຍະການແຜ່ລະບາດຂອງພະຍາດໂຄວິດ-19, ການຕ້ອນຮັບສ່ວນໜ້າ, ການທັກທາຍ,ການຍິ້ມ,​ເຕັກນິກການແກ້ໄຂບັນຫາກ່ຽວກັບແຂກ, ຫຼັກການພື້ນຖານການບໍລິການອາຫານ-ເຄື່ອງດື່ມ ແລະ ບົດຮຽນສໍາຄັນອື່ນໆ.