ວັນທີ16 ກຸມພາ 2021 ທີ່ຫ້ອງວ່າການແຂວງສາລະວັນ, ບໍລິສັດເບຍລາວ ມອບເງິນ ຈໍານວນ 100 ລ້ານກີບ ໃຫ້ແຂວງສາລະວັນ ເພື່ອປະກອບສ່ວນເຂົ້າໃນວຽກງານປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ທີ່ກຳລັງຍັງແຜ່ລະບາດໃນຫຼາຍປະເທດຂອງໂລກ, ມອບໂດຍທ່ານ ສູນທອນ ພົມມະຈັກ ປະທານບໍລິສັດເບຍລາວ, ເປັນກຽດຮັບໂດຍ ທ່ານ ໂພໄຊ ໄຊຍະສອນ ເຈົ້າແຂວງໆສາລະວັນ, ພ້ອມດ້ວຍຄະນະຈາກບໍລິສັດເບຍລາວ ແລະ ຄະນະນໍາຂອງແຂວງສາລະວັນເຂົ້າຮ່ວມເປັນສັກຂີພິຍານ.

ທ່ານ ສູນທອນ ພົມມະຈັກ ປະທານບໍລິສັດເບຍລາວ ໄດ້ມີຄໍາເຫັນວ່າ: ການມອບທືນຊ່ວຍເຫຼືອຄັ້ງນີ້ແມ່ນເພື່ອເປັນການປະກອບສ່ວນເຂົ້າໃນວຽກງານປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ 19, ນໍາໃຊ້ເຂົ້າໃນວຽກງານອື່ນໆທີ່ເຫັນວ່າເໝາະສົມ ແນໃສ່ຮັກສາສຸຂະພາບ ແລະ ຊີວິດການເປັນຢູ່ຂອງປະຊາຊົນຊາວແຂວງສາລະວັນໃຫ້ດີຂຶ້ນ, ພ້ອມນັ້ນກໍ່ເພື່ອເປັນການຊົມເຊີຍຜົນສໍາເລັດກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນ ປະຕິວັດລາວ ແລະ ກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງສາລະວັນ, ເຊິ່ງຜ່ານມາທາງບໍລິສັດເບຍລາວ ຍັງໄດ້ປະກອບສ່ວນ ແລະ ໃຫ້ການຊ່ວຍເຫຼືອສັງຄົມໃນທົ່ວປະເທດ ໂດຍສະເພາະແມ່ນ ດ້ານສາທາລະນະສຸກ, ດ້ານການສຶກສາ ແລະ ປະກອບສ່ວນໃນວຽກງານຕ່າງໆຕື່ມອີກ.

ໂອກາດດຽວກັນນັ້ນ ທ່ານ ໂພໄຊ ໄຊຍະສອນ ເຈົ້າແຂວງໆສາລະວັນ ກໍ່ໄດ້ສະແດງຄວາມຂອບໃຈ ແລະຍ້ອງຍໍຊົມເຊີຍ ມາຍັງປະທານບໍລິສັດ, ພ້ອມດ້ວຍຜູ້ອໍານວຍການ ແລະ ທີມງານບໍລິສັດເບຍລາວ ທີ່ເຫັນໄດ້ຄວາມສໍາຄັນຂອງປະຊາຊົນຊາວແຂວງສາລະວັນ, ທ່ານ ເຈົ້າແຂວງຍັງໃດ້ກ່າວຕື່ມອີກວ່າ: ຈະນໍາເອົາເງິນຈໍານວນດັ່ງກ່າວໄປໝູນໃຊ້ເຂົ້າໃນວຽກປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ 19 ໃຫ້ເຂົ້າເຖິງເປົ້າໝາຍຢ່າງມີປະສິດທິພາບ ແລະ ປະສິດທິຜົນສູງ.
ໂດຍ: ທິດລານີ ໂຄດໂຍທາ.