ເພື່ອເຮັດໃຫ້ພໍ່ແມ່ປະຊາຊົນຜູ້ມີສິດເລືອກຕັ້ງຢູ່ພາຍໃນເມືອງວິລະບູລີ ໄດ້ມີຄວາມຮັບຮູ້ ແລະ ເຂົ້າໃຈຢ່າງລະອຽດ ກ່ຽວກັບການປ່ອນບັດເລືອກຕັ້ງເອົາສະມາຊິກສະພາແຫ່ງຊາດ ( ສສຊ )​ ຊຸດທີ IX ແລະ ສະມາຊິກສະພາປະຊາຊົນແຂວງ ( ສສຂ)​ ຊຸດທີ II ທີ່ຈະເຖິງໃນວັນອາທິດ,​ວັນທີ 21 ກຸມພາ ປີ 2021 ນີ້ ຮັບປະກັນໃຫ້ໄດ້ສາມ 100 %, ດັ່ງນັ້ນ,​ມາໃນຕອນເຊົ້າຂອງວັນທີ 16 ກຸມພາ ປີ 2021 ນີ້ບັນດາຜູ້ສະໝັກຮັບເລືອກຕັ້ງເປັນສະມາຊິກສະພາປະຊາຊົນຂັ້ນແຂວງຊຸດທີ II ປະຈໍາເຂດເລືອກຕັ້ງເມືອງວິລະບູລີ ລວມມີຈໍານວນທັງໝົດ 4 ທ່ານ,​ຍິງ 1 ທ່ານ ໃນນີ້ໃຫ້ເລືອກເອົາ 2 ທ່ານ ຂີດອອກ 2 ທ່ານປະກອບມີ ຜູ້ສະໝັກນໍ້າເບີ 1 ທ່ານ ແສງເພັດ ຄໍາສຸວັນ, ຜູ້ສະໝັກນໍ້າເບີ 2 ທ່ານ ສຸລິຍາ ມາຜາງວົງ, ຜູ້ສະໝັກນໍ້າເບີ 3 ທ່ານ ໄພມະນີ ວົງໄຊຄໍາ ແລະ ຜູ້ສະໝັກນໍ້າເບີ 4 ທ່ານນາງ ມົນຄໍາ ຫຼວງພົມມາ ໄດ້ລົງເຄື່ອນໄຫວພົບປະສະເໜີໂຕຕໍ່ກັບຜູ້ມີສິດເລືອກຕັ້ງຢູ່ທີ່ຈຸດສຸມກະແຕບ-ນາຜາດ່າງ ໂດຍການຮ່ວມພາທາງຂອງທ່ານນາງ ບຸນລັບ ທໍາມະຈັກ ຄະນະປະຈໍາພັກເມືອງ ປະທານແນວລາວສ້າງຊາດເມືອງ ວິລະບູລີ,​ ມີບັນດາທ່ານໃນຄະນະຮັບຜິດຊອບໜ່ວຍບັດ,​ອໍານາດການປົກຄອງບ້ານ ພ້ອມດ້ວຍພໍ່ແມ່ປະຊາຊົນໃນເຂດດັ່ງກ່າວ ໄດ້ເຂົ້າຮ່ວມຮັບຟັງ ແລະ ໃຫ້ການຕ້ອນຮັບຢ່າງອົບອຸ່ນ.​

ໃນພິທີກອງເລຂາຄະນະຮັບຜິດຊອບຂັ້ນເມືອງກໍ່ໄດ້ນໍາສະເໜີນໍ້າເບີ ແລະ ລາຍຊື່ຂອງຜູ້ສະໝັກແຕ່ລະທ່ານ ຈາກນັ້ນບັນດາຜູ້ສະໝັກຮັບເລືອກຕັ້ງເປັນສະມາຊິກສະພາປະຊາຊົນຂັ້ນແຂວງຊຸດທີ 2 ປະຈໍາເຂດເລືອກຕັ້ງເມືອງວິລະບູລີ ໃນຈໍານວນ 4 ທ່ານກໍ່ໄດ້ນໍາສະເໜີຊື່ ພ້ອມທັງປະຫວັດຫຍໍ້ຂອງຕົນເອງ ແລະ ໄດ້ຜ່ານເອກະສານກ່ຽວກັບທີ່ຕັ້ງ ແລະ ພາລະບົດບາດຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ,​ ສິດໜ້າທີ່ຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ໃຫ້ຜູ້ມີສິດປ່ອນບັດເລືອກຕັ້ງໄດ້ຮັບຮູ້ ແລະ ເຂົ້າໃຈຢ່າງລະອຽດ ພ້ອມນີ້ກໍ່ຍັງໄດ້ຮຽກຮ້ອງມາຍັງພໍ່ແມ່ປະຊາຊົນຜູ້ມີສິດປ່ອນບັດເລືອກຕັ້ງທີ່ມີອາຍຸແຕ່ 18 ຂື້ນໄປ ຈົ່ງໄດ້ພ້ອມກັນໄປໃຊ້ສິດປະຊາທິປະໄຕຂອງຕົນຢ່າງເຕັມສ່ວນ ໃນການເລືອກຕັ້ງທີ່ຈະເຖິງໃນວັນທີ 21 ກຸມພາ ທີ່ຈະເຖິງນີ້ ເລືອກເອົາຄົນດີ,​ມີມາດຖານຄົບຖ້ວນ,​ເຮັດແທ້ທໍາຈິງ ແລະເຮັດເພື່ອຜົນປະໂຫຍດຂອງປະຊາຊົນຢ່າງແທ້ຈິງ ເພື່ອເປັນຕົວແທນຂອງຕົນເອງເຂົ້າໄປນັ່ງເຮັດໜ້າທີ່ໃນສະພາ.​ ໃນເຂດຈຸດສຸມກະແຕບ-ນາຜາດ່າງມີທັງໝົດ 11 ບ້ານ,​ມີພົນລະເມືອງ 6.864 ຄົນ,​ຍິງ 3.457 ຄົນ,​ ປະກອບມີທັງໝົດ 7 ໜ່ວຍບັດ,​ ມີຜູ້ທີ່ມີອາຍຸແຕ່ 18 ປີຂື້ນໄປຈໍານວນ 3.903 ຄົນ,​ຍິງ 1.​991 ຄົນ,​ ຜູ້ມີິສິດປ່ອນບັດທີ່ມີໜ້າຕົວຈິງ 3.640 ຄົນ,​ຍິງ 1.859 ຄົນ.​ ເຊິ່ງມາຮອດປະຈຸບັນນີ້ໃນເຂດຈຸດສຸມກະແຕບ-ນາຜາດ່າງແມ່ນມີຄວາມພ້ອມໃຫ້ແກ່ບັ້ນເລືອກຕັ້ງແລ້ວ 100 %.​