ກອງປະຊຸມວິຊາການສົ່ງເສີມການທ່ອງທ່ຽວເຊື່ອມຕໍ່ 6 ແຂວງພາກກາງ ຄັ້ງທີ X ຄື: ແຂວງວຽງຈັນ, ໄຊສົມ ບູນ, ນະຄອນຫລວງວຽງຈັນ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ ໄດ້ຈັດຂຶ້ນໃນວັນທີ 16 ກຸມພາ ນີ້ ທີ່ສະໂມສອນເມືອງອະນຸວົງ ແຂວງໄຊສົມບູນ ໂດຍການເປັນປະທານຂອງທ່ານ ປອ ອາລຸນ ບຸນມີໄຊ ຫົວໜ້າກົມພັດທະ ນາການທ່ອງທ່ຽວ, ມີຫົວໜ້າກົມ-ຮອງກົມ, ຂະແໜງການທີ່ກ່ຽວຂ້ອງຈາກສູນກາງ, ຮອງຫົວໜ້າພະແນກ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍພະແນກການທີ່ກ່ຽວຂ້ອງ 6 ແຂວງພາກກາງ ແລະ ຫ້ອງການ ຖວທ 5 ເມືອງທົ່ວແຂວງໄຊສົມບູນ ເຂົ້າຮ່ວມ.

ໂອກາດນີ້ ທ່ານ ນາງ ຈຳພອນ ສົງຄາມ ຮອງຫົວໜ້າພະແນກວາງແຜນ ແລະ ພັດທະນາການທ່ອງທ່ຽວ ໄດ້ຜ່ານຮ່າງບົດສະຫລຸບ ກິດຈະກຳສົ່ງເສີມການທ່ອງທ່ຽວເຊື່ອມຕໍ່ 6 ແຂວງພາກກາງແຕ່ປີ 2016-2020 ແລະ ແຜນກິດຈະກຳສົ່ງເສີມການທ່ອງທ່ຽວເຊື່ອມຕໍ່ 6 ແຂວງພາກກາງ ປີ 2021-2023 ໃນໄລຍະ 5 ປີຜ່ານມາ ຊຶ່ງຂະແໜງການທ່ອງທ່ຽວຂັ້ນສູນກາງ ແລະ ຂັ້ນແຂວງ 6 ແຂວງພາກກາງ ໄດ້ສຸມໃສ່ຈັດຕັ້ງປະຕິບັດວຽກງານການພັດທະນາແຫລ່ງທ່ອງທ່ຽວ, ໂຄສະນາການທ່ອງທ່ຽວ ແລະ ສ້າງເງື່ອນໄຂດ້ານຕ່າງໆ ເພື່ອດຶ່ງດູດການລົງທຶນໃນຂະແໜງທ່ອງທ່ຽວໃຫ້ຫລາຍຂຶ້ນ ແລະ ທັງເປັນການດຶງດູດນັກທ່ອງທ່ຽວເຂົ້າມາທ່ຽວ ສປປລາວ ນັບມື້ນັບຫລາຍຂຶ້ນ ຊຶ່ງສະແດງອອກໃນຕົວເລກສະຖິຕິແຫລ່ງທ່ອງທ່ຽວ ປີ 2020 ມີຈຳນວນທັງໝົດ 2,199 ແຫ່ງ, ແຫ່ງທ່ອງທ່ຽວທຳມະຊາດມີ 1,314 ແຫ່ງ, ແຫລ່ງທ່ອງທ່ຽວວັດທະນະທຳ 591 ແຫ່ງ, ແຫລ່ງທ່ອງທ່ຽວປະຫວັດສາດ 294 ແຫ່ງ ໃນນີ້ ມີແຫລ່ງທ່ອງທ່ຽວທີ່ເປີດບໍລິການແລ້ວ ຈຳນວນ 809 ແຫ່ງ ໄດ້ຮັບການສຳຫລວດຂັ້ນພື້ນຖານ 1,040 ແຫ່ງ ແລະ ໄດ້ຮັບການພັດທະນາແລ້ວ 587 ແຫ່ງ, ມີນັກທ່ອງທ່ຽວເຂົ້າມາທ່ອງທ່ຽວເຂົ້າມາຢ້ຽມຢາມ 6 ແຂວງ ພາກກາງຈຳນວນ 15 ລ້ານກວ່າຄົນ, ກວມເອົາ 52,58% ຂອງຈຳນວນນັກທ່ອງທ່ຽວທີ່ເຂົ້າມາທ່ອງທ່ຽວທົ່ວປະເທດ. ສ່ວນໃນທ້າຍສະໄໝຍ້ອນມີການແຜ່ລະບາດຂອງພະຍາດໂຄວິດ19 ຈຶ່ງເຮັດໃຫ້ຂະແໜງການທ່ອງທ່ຽວໃນທົ່ວປະເທດ ເວົ້າລວມ ເວົ້າສະເພາະກໍພາຍໃນ 6 ແຂວງ ພາກກາງ ໄດ້ຮັບຜົນກະທົບຢ່າງໜັກໜ່ວງ ເຮັດໃຫ້ຈຳນວນນັກທ່ອງທ່ຽວ ສປປ ລາວ ໃນປີ 2020 ຫລຸດລົງເຖິງ 81% ຖ້າທຍບໃສ່ໃນໄລຍະດຽວກັນຂອງປີ 2019 ນອກນີ້ ກົມພັດທະນາການທ່ອງທ່ຽວ ຍັງໄດ້ສຳເລັດການສຳຫລວດ, ປັກຫລັກໝາຍ ແລະ ຈັດສັນແຫ່ລງທ່ອງທ່ຽວ ຢູ່ 6 ແຂວງ ພາກກາງ ສ່ວນວຽກງານດ້ານອື່ນໆກໍ່ໄດ້ມີການຈັດຕັ້ງປະຕິບັດ ແລະ ມີຜົນສຳເລັດ. ຈາກນັ້ນ ໄດ້ຮັບຟັງການຈັດຕັ້ງປະຕິບັດກິດຈະກຳສົ່ງເສີມວຽກງານຄຸ້ມຄອງການທ່ອງທ່ຽວ, ການສົ່ງເສີມວຽກງານໂຄສະນາການທ່ອງທ່ຽວ, ການສົ່ງເສີມວຽກງານພັດທະນາບຸກຄະລາກອນການທ່ອງທ່ຽວ 6 ແຂວງໃນໄລຍະຜ່ານມາ ແລະ ໄດ້ຮັບຟັງການລາຍງານຜົນກະທົບຂອງພະຍາດໂຄວິດ 19 ຕໍ່ການທ່ອງທ່ຽວ ຈາກ 6 ແຂວງ ພ້ອມທັງຮັບຟັງການປະກອບຄຳເຫັນຈາກພາກສ່ວນຕ່າງໆ ຕື່ມອີກ.