ວັນທີ 16 ກຸມພາ 2021 ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ພ້ອມດ້ວຍຄະນະ ໄດ້ເຄື່ອນໄຫວຊີ້ນໍາ ແລະກວດກາຄືນວຽກງານການກະກຽມກ່ອນການເລືອກຕັ້ງສະພາແຫ່ງຊາດຊຸດທີ IX ແລະສະພາປະຊາຊົນແຂວງຊຸດທີ II ຢູ່ເມືອງປາກອູ.ໂດຍໃຫ້ການຕ້ອນຮັບຂອງທ່ານ ແກ່ນຄໍາ ຄໍາພັນ ເຈົ້າເມືອງປາກອູ ພ້ອມດ້ວຍຄະນະ ແລະ ກໍາມະການ-ອານຸກໍາມະການເລືອກຕັ້ງຂັ້ນເມືອງ ພ້ອມດ້ວຍພະນັກງານຫຼັກແຫຼ່ງເຂົ້າຮ່ວມ.

ທ່ານ ແກ່ນຄໍາ ຄໍາພັນ ເຈົ້າເມືອງ ກ່າວລາຍງານວ່າ: ເມືອງປາກອູໄດ້ແຕ່ງຕັ້ງຄະນະຮັບຜິດຊອບແຕ່ລະໜ້າວຽກ ແລະ ໄດ້ປະກອບພະນັກງານ 5 ທ່ານ ເຂົ້ົ້າໃນການຊີ້ນໍາໜ່ວຍປ່ອນບັດ ລວມທັງໝົດ 270 ທ່ານ. ຢູ່ພາຍໃນເມືອງປາກອູປະກອບມີໜ່ວຍເລືອກຕັ້ງທັງໝົດ 54 ໜ່ວຍ, ມີຜູ້ມີສິດປ່ອນບັດທັງໝົດ 17.478 ຄົນ, ຍິງ 8.715 ຄົນ, ມີໜ່ວຍເຄື່ອນທີ 2 ໜ່ວຍ, ໄດ້ເຝິກອົບຮົມໃຫ້ແຕ່ລະໜ່ວຍຮັບຜິດຊອບໜ່ວຍຫີບບັດໃນ ຈໍານວນ 303 ສະຫາຍ, ໂຄສະນາໃຫ້ຜູ້ມີສິດປ່ອນບັດ ຢູ່ແຕ່ລະບ້ານ ໃຫ້ເຂົ້າໃຈຕໍ່ການໃຊ້ສິດ, ໃຊ້ສຽງ, ໄດ້ແນະນໍາໃຫ້ແຕ່ລະໜ່ວຍຫີບບັດ ເຝົ້າລະວັງການເຄື່ອນຍ້າຍຢ່າງໃກ້ສິດ, ແນະນໍາໃຫ້ກອງຫຼອນແຕ່ລະບ້ານເຝົ້າລະວັງ, ສະກັດກັ້ນກຸ່ມຄົນບໍ່ດີ ທີ່ຈະພາໃຫ້ເກີດຄວາມບໍ່ສະຫງົບ, ໄດ້ຕ້ອນຮັບ ແລະອໍານວຍຄວາມສະດວກ ໃຫ້ແກ່ຜູ້ລົງສະໝັກເລືອກຕັ້ງ ເປັນສະມາຊິກສະພາແຫ່ງຊາດຊຸດທີ IX ແລະສະພາປະຊາຊົນຂັ້ນແຂວງຊຸດທີ II ຢູ່ຕາມແຕ່ລະຈຸດຕ່າງໆ ແມ່ນໄດ້ເຮັດສໍາເລັດໃນ ວັນທີ 9 ກຸມພາ 2021, ເຊິ່ງເຮັດຢູ່ 2 ຈຸດ ຈຸດສໍານັກເມືອງ ແລະຈຸດບ້ານຫ້ວຍໂລ, ສະເພາະຜູ້ລົງສະໝັກສະມາຊິກສະພາຂັ້ນແຂວງ ຊຸດທີ 2 ໄດ້ສໍາເລັດການໂຄສະນາຫາສຽງ ໃນວັນທີ 12 ກຸມພາ 2021, ເຮັດຢູ່ 2 ຈຸດຄື: ຈຸດບ້ານຫາດຍາ ແລະ ບ້ານຊ່າງໄຫ.

ໂອກາດດັ່ງກ່າວທ່ານ ຄໍາຂັນ ຈັນທະວີສຸກ ເຈົ້າແຂວງ ກໍໄດ້ມີບາງຄໍາເຫັັນຊີ້ນໍາ ເຊິ່ງທ່ານໄດ້ເນັ້ນໃຫ້ຄະນະບໍລິຫານງານພັກເມືອງ ແລະຄະນະຮັບຜິດຊອບການປ່ອນບັດຄັ້ງນີ້ ຈົ່ງເອົາໃຈໃສ່ຕໍ່ວຽກງານການປ້ອງກັນຄວາມສະຫງົບ ໂດຍສະເພາະແມ່ນຢູ່ຈຸດປ່ອນບັດແຕ່ລະຈຸດ, ປຸກລະດົມຂົນຂວາຍປະຊາຊົນ ໃຫ້ມາໃຊ້ສິດຂອງຕົນເພື່ອເລືອກເອົາຜູ້ແທ່ນທີ່ມີຄວາມສາມາດ ເຂົ້ານັ່ງໃນສະພາ ທັງຮັບປະກັນໃຫ້ໄດ້ ສາມຮ້ອຍສ່ວນຮ້ອຍ. ນອກນັ້ນ, ຍັງໄດ້ເນັ້ນໃຫ້ອົງການປົກຄອງເມືອງຜັນຂະຫຍາຍຕາມມະຕິກອງປະຊຸມໃຫຍ່ຂອງພັກໃນແຕ່ລະຂັ້ນ, ເພື່ອພັດທະນາເມືອງ ແລະບ້ານ ເຮັດໃຫ້ຊີວິດການເປັນຢູ່ຂອງປະຊາຊົນຫຼຸດພົ້ນອອກຈາກຄວາມທຸກຍາກ ເທື່ອລະກ້າວ.

ຈາກນັ້ນ, ຄະນະນໍາແຂວງຫຼວງພະບາງໄດ້ລົງຢ້ຽມຍາມຈຸດປ່ອນບັດເລືອກຕັ້ງບ້ານຫ້ວຍໂລເມືອງປາກອູ, ຈຸດປ່ອນບັດເລືອກຕັ້ງ ມະຫາວິທະຍາໄລ ສຸພານຸວົງ ແລະຈຸດປ່ອນບັດເລືອກຕັ້ງວັດຊຽງທອງ ເຊິ່ງທາງຄະນະຮັບຜິດຊອບແຕ່ລະບ່ອນ ແຕ່ລະຈຸດກໍໄດ້ມີການລາຍງານສະພາບລວມຂອງການກະກຽມໃຫ້ແກ່ບັ້ນເລືອກຕັ້ງສະມາຊິກສະພາໃນຄັ້ງນີ້ໃຫ້ເຕັມໄປດ້ວຍຄວາມຟົດຟື້ນ, ມີຄວາມສະຫງົບ ແລະມີປະສິດທິພາບ.