ໃນວັນທີ 16 ກຸມພາ ນີ້ ຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ປະຈໍາເຂດເລືອກຕັ້ງທີ16 ແຂວງເຊກອງ ໄດ້ສໍາເລັດການລົງພົບປະ ແລະ ໂຄສະນາຫາສຽງນໍາຜູ້ມີສິດປ່ອນບັດ ຢູ່ໜ່ວຍປ່ອນບັດທີ 15 ບ້ານຈຸງຮຸງເໜືອ, ຊຶ່ງເປັນຈຸດທີ 5 ແລະ ເປັນຈຸດສຸດທ້າຍຂອງເມືອງທ່າແຕງ, ໂດຍການນໍາພາຂອງທ່ານ ສີສຸພັນ ມະຫາວົງ, ກຳມະການພັກແຂວງ, ຫົວໜ້າຫ້ອງວ່າການແຂວງ, ຄະນະກໍາມະການເລືອກຕັ້ງຂັ້ນແຂວງ, ພ້ອມດ້ວຍຄະນະກຳມະການເລືອກຕັ້ງຂັ້ນແຂວງ ແລະ ຂັ້ນເມືອງ.

ຊຶ່ງໃນການລົງພົບປະໂຄສະນາຫາສຽງຄັ້ງນີ້ ບັນດາຜູ້ສະໝັກຮັບເລືອກຕັ້ງ ສສຂ ໄດ້ຜັດປ່ຽນກັນຂຶ້ນສະເໜີໂຕລະດັບການສຶກສາ, ປະຫວັດການເຄື່ອນໄຫວໂດຍຫຍໍ້ ແລະໜ້າທີ່ຮັບຜິດຊອບຂອງຕົນໃນໄລຍະຜ່ານມາ ກໍຄືປະຈຸບັນ ເພື່ອໃຫ້ພໍ່ແມ່ປະຊາຊົນໄດ້ຮັບຊາບ ເພື່ອເປັນຂໍ້ມູນໃຫ້ປະຊາຊົນໄດ້ຄົ້ນຄວ້າ, ພິຈາລານາ ໃນການຕັດສິນໃຈທີ່ຈະເລືອກເອົາຜູ້ທີ່ມີມາດຖານເງື່ອນໄຂຄົບຖ້ວນ ເຂົ້າມາປະຕິບັດໜ້າທີ່ໃນສະພາ ເພື່ອເປັນຕົວແທນຂອງປະຊາຊົນຢ່າງແທ້ຈິງ.

ຊຶ່ງທົ່ວເມືອງທ່າແຕງ ມີພົນລະເມືອງທັງໝົດ 44.097 ຄົນ, ຍິງ 21.637 ຄົນ, ໃນນີ້ ຜູ້ມີສິດປ່ອນບັດໂຕຈິງ 24.216 ຄົນ, ຍິງ 13.305 ຄົນ, ຜູ້ມີສິດປ່ອນບັດຢູ່ທ້ອງຖິ່ນອື່ນ 440 ຄົນ, ຍິງ 163 ຄົນ, ເຮັດວຽກຢູ່ຕ່າງປະເທດ 163 ຄົນ, ຍິງ 130 ຄົນ, ມີສິດປ່ອນບັດມາຈາກທ້ອງຖິ່ນອື່ນ 14 ຄົນ, ຍິງ 5 ຄົນ; ສໍາລັບໜ່ວຍເລືອກຕັ້ງທີ 15 ປະກອບມີ 4 ບ້ານ ຄື: ບ້ານຈຸງຮຸງເໜືອ, ຈຸງຮຸງໃຕ້, ປະຫຼາຍ ແລະບ້ານໂທນໃຫຍ່, ມີພົນລະເມືອງທັງໝົດ 1.790 ຄົນ, ຍິງ 851 ຄົນ, ມີໃດປ່ອນບັດ 888ຄົນ, ຍິງ 442 ຄົນ.