ການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແມ່ນຂະບວນການປະຕິບັດໜ້າທີການເມືອງ ແລະ ສິດປະຊາທິປະໄຕຂອງພົນລະເມືອງລາວໃນການເລືອກເອົາບຸກຄົນທີ່ມີມາດຖານເງື່ອນໄຂຄົບຖ້ວນຕາມທີ່ໄດ້ກຳນົດໄວ້ໃນ ກົດໝາຍວ່າດ້ວຍການເລືອກຕັ້ງ ເພື່ອເປັນຕົວແທນປະຕິບັດສິດອຳນາດຂອງປະຊາຊົນລາວບັນດາເຜົ່າ. ການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ແມ່ນເຫດການດ້ານການເມືອງທີ່ສຳຄັນຫລາຍຂອງປະເທດຊາດ ເປັນການສືບຕໍ່ ປັບປຸງລະບົບກົງຈັກການຈັດຕັ້ງລັດ ໃຫ້ມີຄວາມໜັກແໜ້ນ ນັບມື້ເຂັ້ມແຂງ, ຕິດພັນກັບການພັດທະນາເສດຖະກິດ-ສັງຄົມ ຕາມແນວທາງນະໂຍບາຍຂອງພັກ ກໍ່ຄືການຈັດຕັ້ງປະຕິບັດມະຕິຂອງກອງປະຊຸມໃຫຍ່ຄັ້ງທີ XI ຂອງພັກ ໃຫ້ເຂົ້າສູ່ຊີວິດຕົວຈິງ ໂດຍສະເພາະບັນດາຄາດໝາຍ ແລະ ວິໄສທັດຂອງພັກວາງອອກ.

ໃນໂອກາດທີ່ຄະນະຜູ້ລົງສະໝັກຮັບເລືອກຕັ້ງ ສສຊ ຊຸດທີ່ II ຈຳນວນ 12 ທ່ານ, ຍິງ 02 ທ່ານ ໄດ້ເຄື່ອນໄຫວຢູ່ເມືອງມະຫາໄຊ ແຂວງຄຳມ່ວນ ໃນວັນທີ 16 ກຸມພາ 2021 ໂດຍການເປັນກຽດເຂົ້າຮ່ວມຕິດຕາມຂອງ ທ່ານ ວົງເພັດ ຈິດປັນຍາ ຮອງເລຂາພັັກແຂວງຄຳມ່ວນ ແລະ ໄດ້ຮັບການຕ້ອນຮັບຈາກການນໍາຫລັກແຫລ່ງຂອງເມືອງ ພ້ອມດ້ວຍ ພະນັກງານທະຫານ, ຕຳຫລວດ ແລະ ປະຊາຊົນຊາວເມືອງມະຫາໄຊ.

ໃນການລົງພົບປະບັນດາຜູ້ສະໝັກຮັບເລືອກຕັ້ງໄດ້ຜັດປ່ຽນກັນຂຶ້ນມີຄຳເຫັນ ແລະ ໄດ້ສະເໜີຊື່, ແນະນຳຜົນງານຂອງຕົນ ພ້ອມທັງຍົກໃຫ້ເຫັນເຖິງຄວາມໝາຍຄວາມສຳຄັນ, ບົດບາດຂອງສະພາແຫ່ງຊາດ ແລະ ໄດ້ຮຽກຮ້ອງມາຍັງຜູ້ມີສິດປ່ອນບັດເລືອກຕັ້ງນັບແຕ່ອາຍຸ 18 ປີຂຶ້ນໄປໃຫ້ໄປໃຊ້ສິດ ເລືອກເອົາຜູ້ແທນຂອງຕົນໃຫ້ເຕັມສ່ວນ, ເພາະນີ້ກໍ່ແມ່ນຄວາມຮັບຜິດຊອບ ແລະ ພັນທະຂອງພົນລະເມືອງລາວທຸກຄົນ ໃຫ້ປະຕິບັດຄືປາງບຸນໃຫຍ່ຂອງປະຊາຊົນ ໃຫ້ເປັນຂະບວນຄຶກຄື້ນ ແລະ ຮັບປະກັນໄດ້ໃນບັ້ນເລືອກຕັ້ງທີ່ຈະມາເຖິງນີ້ໃຫ້ໄດ້ຕາມ 03 ຄາດໝາຍໃນມື້ເລືອກຕັ້ງ 21 ກຸມພາ 2021 ອີກບໍ່ພໍທໍ່ໃດວັນນີ້.

ສຳລັບເມືອງ ມະຫາໄຊ ມີ 67 ບ້ານ, ມີ 1 ຈຸດສຸມ, ມີພົນລະເມືອງທັງໝົດ 38.832 ຄົນ, ຍິງ 19.558 ຄົນ, ມີໜ່ວຍປ່ອນບັດ 54 ຈຸດ, ຜູ້ມີສິດປ່ອນບັດ 21.627 ຄົນ, ຍິງ 11.282 ຄົນ, ຜູ້ມີໜ້າປ່ອນບັດຕົວຈິງ 18.931 ຄົນ, ຍິງ 10.088 ຄົນ.