ປະຊາຊົນລາວບັນດາເຜົ່າໃນທົ່ວປະເທດເວົ້າລວມ ໂດຍສະເພາະ ປະຊາຊົນ ເມືອງທ່າແຕງ ກໍຄືແຂວງເຊກອງໄດ້ພ້ອມພຽງຮຽງໜ້າ, ໂຮມເປັນກ້ອນກໍາລັງອັນໃຫຍ່ທີ່ປ່ຽມລົ້ນດ້ວຍຄວາມເຂົ້າອົກເຂົ້າໃຈ, ສາມັກຄີຮັກແພງ, ມີນໍ້າໃຈອັນບໍລິສຸດ ແລະມີຄວາມພາກພູມໃຈຕໍ່ອຸດົມການຂອງຕົນເອງຢ່າງໜັກແໜ້ນ ເພື່ອມຸ່ງໜ້າສູ່ການສະເຫຼີມສະຫຼອງປາງບຸນໃຫຍ່ທີ່ມີຄວາມໝາຍຄວາມສໍາຄັນທາງດ້ານປະຫວັດສາດຄື: ວັນທີ 21 ກຸມພາ 2021 ກົງກັບວັນອາທິດ ແມ່ນວັນເລືອກຕັ້ງເອົາສະມາຊິກສະພາແຫ່ງຊາດ (ສສຊ) ຊຸດທີ IX ແລະສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ຊຶ່ງເປັນເຫດການສຳຄັນທາງດ້ານການເມືອງ ເພາະເປັນການສືບຕໍ່ສ້າງ ແລະບູລະນະລັດປະ ຊາທິປະໄຕ ປະຊາຊົນໃຫ້ນັບມື້ເຂັ້ມແຂງ.

ທ່ານ ນາງ ແກ້ວອຸດອນ ດວງມະນີວົງ ຄະນະປະຈໍາພັກເມືອງ, ຫົວໜ້າຄະນະໂຄສະນາອົບຮົມເມືອງທ່າແຕງ ກ່າວວ່າ: ການເລືອກຕັ້ງເອົາສະມາຊິກສະພາທີ່ເປັນຕົວແທນແຫ່ງສິດ ແລະຜົນປະໂຫຍດຂອງປະຊາຊົນຢູ່ໃນສະພາແຫ່ງຊາດ ແລະສະພາປະຊາຊົນຂັ້ນແຂວງ ແມ່ນໜ້າທີ່ ແລະຄວາມຮັບຜິດຊອບຂອງທົ່ວພັກ-ລັດ, ທົ່ວກອງທັບ ແລະທົ່ວປວງຊົນລາວທັງຊາດ ຕ້ອງດໍາເນີນໄປຢ່າງມີປະຊາທິປະໄຕ, ສະເໝີພາບ, ຍຸຕິທໍາ ແລະສອດຄ່ອງກັບກົດໝາຍ. ພ້ອມກັບຢືນຢັນໃຫ້ກາຍເປັນປາງບຸນໃຫຍ່ຂອງທົ່ວປວງຊົນລາວທັງຊາດ, ຕັ້ງໜ້າປຸກລະດົມ ແລະຈັດຕັ້ງນໍາພາຜູ້ມີສິດເລືອກຕັ້ງໄປໃຊ້ສິດຂອງຕົນໃຫ້ໄດ້ຢ່າງຄົບຖ້ວນ ເຊິ່ງໝາຍຄວາມວ່າ: ການເລືອກຕັ້ງຄັ້ງນີ້ ຕ້ອງຮັບປະກັນໃຫ້ຜູ້ມີສິດເລືອກຕັ້ງໄດ້ໃຊ້ສິດປ່ອນບັດຂອງຕົນດ້ວຍຄວາມສະໝັກໃຈ 100%, ຮັບປະກັນການລົງຄະແນນສຽງໃຫ້ຖືກຕ້ອງ 100% ແລະຮັບປະກັນຄວາມສະຫງົບປອດໄພ 100%.

ທ່ານ ສີຫາ ບຸດດາວົງ ຮອງຫົວໜ້າຫ້ອງການຊັບພະຍາກອນທໍາມະຊາດ ແລະສິ່ງແວດລ້ອມເມືອງທ່າແຕງ, ຄະ ນະຮັບຜິດຊອບໜ່ວຍປ່ອນບັດທີ 12 ບ້ານຈຸນລາໄດ້ໃຫ້ທັດສະນະວ່າ: ຕົນເອງມີຄວາມຮູ້ສຶກເອກອ້າງທະນົງໃຈ ແລະດີໃຈຫຼາຍທີ່ຈະໄດ້ໄປຮ່ວມໃຊ້ສິດໃຊ້ສຽງເລືອກເອົາສະມາຊິກສະພາແຫ່ງຊາດ ແລະສະມາ ຊິກສະພາປະຊາຊົນແຂວງ ຊຶ່ງເປັນໂອກາດທີ່ດີເຮັດໃຫ້ຕົນເອງສາມາດຕັດສິນເລືອກເອົາຄົນດີ, ຄົນມີຫົວຄິດປະດິດສ້າງ, ມີວິໃສທັດເບິ່ງກວ້າງເຫັນໄກ, ຮູ້ສຸກທຸກຂອງປະຊາຊົນ ແລະມີຄຸນສົມບັດສິນທໍາປະຕິ. ສະນັ້ນ, ຂໍເຊີນຊວນປະຊາຊົນລາວບັນດາເຜົ່າອອກມາໃຊ້ສິດຂອງຕົນຢ່າງເຕັມສ່ວນໃນວັນທີ 21 ກຸມພານີ້ ແລະບໍ່ຄວນນອນຫຼັບທັບສິດຕົນເອງເພາະພວກເຮົາແມ່ນພົນລະເມືອງລາວ.

ທ່ານ ພູຂາວ ທອງຊົມພູ ເລຂາໜ່ວຍພັກ, ນາຍບ້ານສາມສ້າງຈຸນລາ ກ່າວວ່າ: ການເລືອກຄັ້ງນີ້ ມີຄວາມສົນໃຈຫຼາຍທີ່ສຸດຈາກປະຊາຊົນ ໂດຍສະເພາະຜູ້ທີ່ມີສິດປ່ອນບັດຄັ້ງນີ້ເປັນຄັ້ງທໍາອິດ ເພື່ອຈະໄດ້ເລືອກເອົາຄົນດີ, ມີຄວາມຮູ້ຄວາມສາມາດຊ່ວຍນໍາເອົາຄວາມຄິດຄວາມເຫັນຂອງປະຊາຊົນໄປສະເໜີຢູ່ສະພາ.

ນາງ ດາລາລັດ ໄຊສົມພົງ ອາຍຸ 18 ປີ, ນັກຮຽນຊັ້ນ ມໍ6 ໂຮງຮຽນ ມສ ຈຸນລາ ກ່າວວ່າ: ຕົນເອງມີດີໃຈ, ພາກພູມໃຈ ແລະກໍໄດ້ຕັ້ງໃຈໄວ້ແລ້ວວ່າ ຕ້ອງໄປໃຊ້ສິດປະຊາທິປະໄຕ ເພື່ອເລືອກເອົາສະມາຊິກສະພາແຫ່ງຊາດ ແລະສະມາຊິກສະພາປະຊາຊົນແຂວງຢ່າງແນ່ນອນໃນວັນທີ 21 ກຸມພານີ້ ຊຶ່ງບໍ່ພຽງແຕ່ເລືອກຄົນດີເທົ່ານັ້ນ ແລະສິ່ງສໍາຄັນຕ້ອງມີສຸຂະພາບແຂງແຮງ, ມີຄວາມຮູ້ຄວາມສາມາດ ແລະເຮັດໜ້າທີ່ເປັນຕົວແທນແກ່ປະຊາຊົນສຸດກົກສຸດປາຍເຂົ້າໄປນັ່ງໃນສະພາ.