ຜູ້ສະໝັກຮັບເລືອກຕັ້ງເປັນສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ເຂດເລືອກຕັ້ງ ເມືອງທ່າແຕງ ແຂວງເຊກອງ ຊຶ່ງນໍາພາໂດຍທ່ານ ພອນເພັດ ຄິວລະວົງ ປະທານສະພາປະຊາຊົນແຂວງເຊກອງ, ຮອງປະທານຄະນະກໍາມະການເລືອກຕັ້ງຂັ້ນແຂວງ ແລະທ່ານ ບຸນສວນ ບຸດບຸນມາ ຄະນະປະຈໍາພັກເມືອງ, ຫົວໜ້າຄະນະຈັດຕັ້ງເມືອງທ່າແຕງ ໄດ້ລົງພົບປະປະຊາຊົນ ກໍຄືຜູ້ທີ່ສິດເລືອກຕັ້ງຢູ່ບ້ານຈຸນລາໃນວັນທີ 16 ກຸມພາ 2021.
ໃນການລົງຫາສຽງຄັ້ງນີ້ ກໍເພື່ອແນະນໍາສະເໜີຕົວຂອງຜູ້ສະໝັກຮັບເລືອກຕັ້ງສະມາຊິກສະພາປະຊາຊົນແຂວງເຂດເລືອກຕັ້ງເມືອງທ່າແຕງ ໂດຍຜູ້ສະໝັກຈໍານວນ 7 ທ່ານ ກໍໄດ້ຜັດປ່ຽນກັນຂຶ້ນສະເໜີຕົວ ພ້ອມທັງຜ່ານປະປະຫວັດຫຍໍ້ກ່ຽວກັບການເຄື່ອນໄຫວວຽກງານຂອງຕົນໃນໄລຍະຜ່ານມາ ແລະຄວາມມຸ່ງຫວັງຂອງຕົນໃນການຈະປະຕິບັດໜ້າທີ່ເປັນຕົວແທນແຫ່ງສິດຜົນປະໂຫຍດຂອງປະຊາຊົນໃນຕໍ່ໜ້າ. ພ້ອມນີ້ ຍັງໄດ້ສຶກສາອົບຮົມໃຫ້ຜູ້ມີສິດເລືອກຕັ້ງຮັບຮູ້ ແລະເຂົ້າໃຈແຈ້ງຕື່ມກ່ຽວກັບທາດແທ້ລະບອບການເມືອງຂອງປະເທດເຮົາ ເຊິ່ງເປັນລະບອບປະຊາທິປະໄຕປະຊາຊົນ, ສ້າງໃຫ້ຜູ້ມີສິດເລືອກຕັ້ງມີຄວາມຮັບຮູ້ ແລະເຂົ້າໃຈກ່ຽວກັບຄວາມຮຽກຮ້ອງຕ້ອງການທາງດ້ານໂຄງປະກອບຂອງສະພາແຫ່ງຊາດຊຸດທີ IX ແລະສະພາປະຊາຊົນແຂວງເຊກອງຊຸດທີ II.
ຈາກນັ້ນ, ເພື່ອເຊີດຊູຄວາມຕື່ນຕົວທາງດ້ານການເມືອງຂອງປະຊາຊົນລາວບັນດາເຜົ່າ ໂດຍສະເພາະປະຊາຊົນ 2 ບ້ານ ບັນດາຜູ້ສະໝັກຮັບເລືອກຕັ້ງຍັງໄດ້ເຊີນຊວນຜູ້ມີສິດເລືອກຕັ້ງປະຕິບັດສິດເປັນເຈົ້າຂອງປະເທດຊາດ, ເປັນພົນລະເມືອງທີ່ດີ ໂດຍໄປໃຊ້ສິດປ່ອນບັດເລືອກຕັ້ງເອົາຜູ້ທີ່ມີມາດຖານເງື່ອນໄຂຖືກຕ້ອງ ແລະຄົບຖ້ວນເປັນສະມາຊິກສະພາແຫ່ງຊາດຊຸດທີ IX ຈໍານວນ 6 ທ່ານໃນຈໍານວນຜູ້ສະໝັກທັງໝົດ 9 ທ່ານ ແລະສະມາຊິກສະພາປະຊາຊົນແຂວງເຊກອງຊຸດທີ II ເຂດເລືອກຕັ້ງເມືອງທ່າແຕງຈໍານວນ 5 ທ່ານໃນຈໍານວນຜູ້ສະໝັກທັງໝົດ 7 ທ່ານ ໃຫ້ຖືກຕ້ອງຕາມລະບຽບກົດໝາຍ.
ສ່ວນໃນຕອນບ່າຍຂອງວັນດຽວກັນ ຜູ້ສະໝັກຮັບເລືອກຕັ້ງເປັນສະມາຊິກສະພາປະຊາຊົນແຂວງເຊກອງຊຸດທີ II ເຂດເລືອກຕັ້ງເມືອງທ່າແຕງ ກໍໄດ້ລົງພົບປະຫາສຽງສະໜັບສະໜູນຈາກພໍ່ແມ່ປະຊາຊົນ ກໍຄືຜູ້ມີສິດເລືອກຕັ້ງຢູ່ບ້ານຈະກໍາຕື່ມອີກ.