ໜ່ວຍສະຫະພັນແມ່ຍິງ ໂຮງໝໍ ແຂວງໄຊສົມບູນ ຈັດພິທີເປີດບັ້ນຂະບວນການແຂ່ງຂັນ 3 ດີ ໃນຕອນເຊົ້າຂອງວັນທີ 17 ກຸມພາ ນີ້ ທີ່ຫ້ອງປະຊຸມໂຮງໝໍແຂວງ ໂດຍການເຂົ້າຮ່ວມຂອງ ສະຫາຍ ນາງ ບຸນທະວີ ສິງວິໄລ ຮອງປະທານຄະນະບໍລິຫານງານສະຫະພັນແມ່ຍິງ ແຂວງໄຊສົມບູນ ແລະ ສະຫາຍ ຢາງຮື່ ຊາວາ ເລຂາໜ່ວຍພັກ, ອຳນວຍການໂຮງໝໍແຂວງ, ມີ ສະຫາຍ ນາງ ຢົວຢ່າງ ໄຊຈູ ຮອງເລຂາໜ່ວຍພັກ ປະທານໜ່ວຍສະຫະພັນແມ່ຍິງໂຮງໝໍແຂວງ, ມີແຂກຖືກເຊີນ ພ້ອມດ້ວຍສະມາຊິກແມ່ຍິງພາຍໃນໜ່ວຍ ເຂົ້າຮ່ວມ.

ກ່ອນເຂົ້າພິທີ ໄດ້ຮັບຊົມການສະແດງສິນລະປະວັນນະຄະດີ ຈາກໜ່ວຍສິນລະປະວັນນະຄະດີ ໂຮງໝໍແຂວງ ດ້ວຍຄວາມເບີກບານມ່ວນຊື່ນ ຈາກນັ້ນ ສະຫາຍ ນາງ ຢົວຢ່າງ ໄຊຈູ ໄດ້ຜ່ານບົດສະຫລຸບການຈັດຕັ້ງປະຕິບັດວຽກງານປະຈຳປີ 2020 ແລະ ທິດທາງແຜນການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງໜ່ວຍແມ່ຍິງໂຮງໝໍແຂວງ ປະຈຳປີ 2021 ພາຍໃນໜ່ວຍມີສະມາຊິກແມ່ຍິງທັງໝົດ 50 ສະຫາຍ ຊຶ່ງຕະຫລອດໄລຍະ 1 ປີຜ່ານມາ ໜ່ວຍສະຫະພັນແມ່ຍິງໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ສະມາຊິກເປັນປົກກະຕິ ໄປພ້ອມກັບການປົກປ້ອງສິດຜົນປະ ໂຫຍດຂອງແມ່ຍິງ ແລະ ເດັກນ້ອຍ ເຮັດໃຫ້ເອື້ອຍນ້ອງແມ່ຍິງແຕ່ລະສະຫາຍມີແນວຄິດອຸ່ນອ່ຽນທຸນທ່ຽງ, ມີຄວາມສາມັກຄີຮັກແພງຊ່ວຍເຫລືອເຊິ່ງກັນ ແລະ ກັນ, ມີຄວາມບຸກບືນຫ້າວຫັນ ໃນການຈັດຕັ້ງປະຕິບັດວຽກງານວິຊາສະເພາະ ພ້ອມນີ້ ຍັງໄດ້ຈັດຕັ້ງເຜີຍແຜ່, ເຊື່ອມຊຶມເນື້ອໃນຂໍ້ແຂ່ງຂັນ 3 ດີ ໃຫ້ສະມາຊິກແມ່ຍິງ ໄດ້ຮັບຮູ້ ແລະ ເຊື່ອມຊຶມຢ່າງເລິກເຊິ່ງ ເຊັ່ນ: ພົນລະ ເມືອງດີ, ພັດທະນາດີ ແລະ ສ້າງຄອບຄົວດີ ຕິດພັນກັບການຈັດຕັ້ງປະຕິບັດຂະບວນການແຂ່ງຂັນ ແລະ ພັດທະນາຢ່າງເປັນຂະບວນການກວ້າງຂວາງ ຈາກນັ້ນ ສະມາຊິກແມ່ຍິງພາຍໃນໜ່ວຍ ໄດ້ພ້ອມກັນຂຶ້ນຈັບມືແຂ່ງຂັນ ເພື່ອຮັບຮອງເອົາຂໍ້ແຂ່ງຂັນ 3 ດີ ເພື່ອພ້ອມກັນຈັດຕັ້ງປະຕິບັດໃຫ້ເປັນຂະບວນການຟົດຟື້ນໃນຕໍ່ໜ້າ.

ໃນຕອນທ້າຍຂອງພິທີ ຍັງໄດ້ຮັບຟັງຄຳໂອ້ລົມ ຈາກສະຫາຍ ຢາງຮື່ ຊາວາ ແລະ ສະຫາຍ ນາງ ບຸນທະວີ ສິງວິໄລ ຊຶ່ງທັງສອງສະຫາຍ ຍ້ອງຍໍຊົມເຊີຍຕໍ່ເອື້ອຍນ້ອງແມ່ຍິງພາຍໃນໜ່ວຍ ທີ່ເອົາໃຈໃສ່ຈັດຕັ້ງປະຕິບັດວຽກງານໃນໄລະຍະຜ່ານມາ ພ້ອມນີ້ ຍັງໃຫ້ທິດເຍືອງທາງໃນຕໍ່ໜ້າ ເປັນຕົ້ນໃຫ້ຖືເອົາວຽກງານສຶກສາອົບຮົມການເມືອງແນວຄິດໃຫ້ແກ່ສະມາຊິກເປັນວຽກງານກົກ ເພື່ອໃຫ້ເອື້ອຍນ້ອງແມ່ຍິງມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີຄວາມສາມັກຄີເປັນຈິດໜຶ່ງໃຈດຽວ, ເອົາໃຈໃສ່ພັດທະນາຕົນເອງໃຫ້ເປັນແບບຢ່າງທີ່ດີ ເອົາໃຈໃສ່ໃນການປະຕິບັດວຍກງານວິຊາສະເພາະ ແລະ ຈັດຕັ້ງປະຕິບັດຂໍ້ແຂ່ງຂັນ 3 ດີຂອງສະຫະພັນແມ່ຍິງລາວວາງອອກ ໃຫ້ປະກົດຜົນເປັນຈຶງ.