ໃນວັນທີ 10-12 ກຸມພາ 2021 ທີ່ຜ່ານມາ, ກຳມະບານຮາກຖານທະນາຄານແຫ່ງ ສປປລາວ ພາກກາງແຂວງສະຫວັນນະເຂດ, ກຳມະບານຮາກຖານທະນາຄານພົງສະຫວັນ, ກຳມະບານຮາກຖານເຂດເສດຖະກິດພິເສດສະຫວັນ-ເຊໂນ ແລະ ກຳມະບານຮາກຖານບໍລິສັດນ້ຳຕານມິດລາວ ໄດ້ມີການຈັດພິທີປາຖະກະຖາວັນສ້າງຕັ້ງສະຫະພັນກຳມະບານລາວ ຄົບຮອບ 65 ປີ ( 1 ກຸມພາ 1956 – 1 ກຸມພາ 2021 ) ຂຶ້ນຢ່າງເປັນທາງການທີ່ຫ້ອງປະຊຸມຂອງຕົນ ໂດຍການໃຫ້ກຽດເຂົ້າຮ່ວມ ແລະ ຂຶ້ນປາຖະກະຖາຂອງ ທ່ານ ສົມໃຈ ສີສົມພອນ ປະທານຄະນະບໍລິຫານງານສະຫະພັນກຳມະບານແຂວງ, ທ່ານ ນາງ ພົມມາ ທອງເພັງ ແລະ ທ່ານ ມຸນທາ ໄຊຍະລິດ ຮອງປະທານຄະນະບໍລິຫານງານສະຫະພັນກຳມະບານແຂວງສະຫວັນນະເຂດ ຊຶ່ງມີຄະນະພັກ, ຄະນະອຳນວຍການ, ຄະນະກຳມະບານຮາກຖານ ຕະຫຼອດເຖິງສະມາຊິກກຳມະບານພາຍໃນຂອງຕົນເຂົ້າຮ່ວມ ຈຳນວນ 133 ທ່ານ, ຍິງ 73 ທ່ານ.

ໃນພິທີແມ່ນໄດ້ຮັບຟັງການຫວນຄືນມູນເຊື້ອຕົ້ນກຳເນີດ ຂອງການເຕີບໃຫຍ່ຂະຫຍາຍຕົວ ແລະ ຜົນງານອັນພົ້ນເດັ່ນຂອງການເຄື່ອນໄຫວວຽກງານກຳມະບານໃນການປະກອບສ່ວນພາລະກິດປະຕິວັດ ຕະຫຼອດໄລຍະ 65 ປີທີ່ຜ່ານມາຈົນເຖິງປະຈຸບັນ ໃນການສຶບຕໍ່ເຄື່ອນໄຫວວຽກງານຕາມພາລະບົດບາດຂອງຕົນ ເຂົ້າໃນການສຶກສາອົບຮົມທາງດ້ານການເມືອງ-ແນວຄິດ ແລະ ການປົກປ້ອງສິດຜົນປະໂຫຍດອັນຊອບທຳຂອງສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານທັງໃນ ແລະ ນອກລະບົບ ແຕ່ຂັ້ນສູນກາງລົງຮອດທ້ອງຖິ່ນຮາກຖານ ພ້ອມທັງສຶບຕໍ່ເພີ່ມທະວີການຜັນຂະຫຍາຍວຽກງານ 5 ເປັນເຈົ້າຂອງສະຫະພັນກຳມະບານລາວ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ ໃຫ້ມີຄວາມສອດຄ່ອງກັບສະພາບຄວາມເປັນຈິງ ຕາມແຜນພັດທະນາວຽກງານກຳມະບານລາວ 5 ປີ ຄັ້ງທີ IV (2021-2025) ໃຫ້ປະກົດຜົນເປັນຈິງໃນເທື່ອລະກ້າວ.