ໃນຕອນເຊົ້າວັນທີ17 ກຸມພາ ນີ້, ທີ່ສະໂມສອນສະພາປະຊາຊົນ ແຂວງເຊກອງ ພະນັກງານຫຼັກແຫຼ່ງພະແນກການອ້ອມຂ້າງແຂວງ ແລະອໍານາດການປັກຄອງບ້ານ ພ້ອມດ້ວຍຜູ້ມີສິດປ່ອນບັດ 3 ບ້ານເທສະບານ ເມືອງລະມາມ ຕ້ອນຮັບ ຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດ ສສຊ ຊຸດທີIX ປະຈໍາເຂດເລືອກຕັ້ງທີ16 ແຂວງເຊກອງ ຈໍານວນ 9 ທ່ານ, ຍິງ 3 ທ່ານ, ທີ່ເຄື່ອນໄຫວສະເໜີຊື່ ເປັນຈຸດທໍາອິດຂອງເມືອງລະມາມ, ນໍາໂດຍ ທ່ານເຫຼັກໄຫຼ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆເຊກອງ, ປະທານຄະນະກໍາມະການເລືອກຕັ້ງຂັ້ນແຂວງ ທີ່ໄດ້ເຄື່ອນໄຫວພົບປະຜູ້ມີສິດປ່ອນບັດເລືອກຕັ້ງ ໂດຍການຕ້ອນຮັບຂອງທ່ານ ວົງເດືອນ ຈັນທະບຸດຊຽງ ກຳມະການພັກແຂວງ, ເລຂາພັກເມືອງ, ເຈົ້າເມືອງໆລະມາມ, ປະທານຄະນະກຳມະການເລືອກຕັ້ງຂັ້ນເມືອງເຂົ້າຮ່ວມ.

ຈາກນັ້ນ ໃນຕອນບ່າຍວັນດຽວກັນ, ຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດ ສສຊ ໄດ້ສືບຕໍ່ເຄື່ອນໄຫວພົບປະ ແລະສະເໜີຊື່ ຕໍ່ພະນັກງານຫຼັກແຫຼ່ງຫ້ອງການອ້ອມຂ້າງເມືອງລະມາມ ພ້ອມດ້ວຍຜູ້ມີສິດປ່ອນບັດ 3 ບ້ານເທສະບານເມືອງ ເປັນຈຸດທີ2, ນໍາໂດຍທ່ານ ນາງ ຈັນຫອມ ມະຫາໄຊ, ຮອງເລຂາພັກແຂວງ, ໂດຍການຕ້ອນຮັບຂອງທ່ານ ວົງເດືອນ ຈັນທະບຸດຊຽງ ກຳມະການພັກແຂວງ, ເລຂາພັກເມືອງ, ເຈົ້າເມືອງໆລະມາມ, ປະທານຄະນະກຳມະການເລືອກຕັ້ງຂັ້ນເມືອງ.

ຊຶ່ງທົ່ວເມືອງລະມາມ ມີພົນລະເມືອງທັງໝົດ 42.379 ຄົນ, ຍິງ 20.959 ຄົນ, ຜູ້ມີສິດເລືອກຕັ້ງ ອາຍຸ 18ປີຂຶ້ນໄປ 23.182 ຄົນ, ຍິງ 11.727 ຄົນ, ຜູ້ມີໜ້າປ່ອນບັດໂຕຈິງ 21.650 ຄົນ, ຍິງ 11.043 ຄົນ; ສໍາລັບ 6 ບ້ານເທສະບານ ມີ 6 ໜ່ວຍປ່ອນບັດຄື: ບ້ານໃໝ່ຫົວເມືອງ, ໂນນມີໄຊ, ວັດຫຼວງ, ໂພນຄໍາ, ທ່າຫຼວງ ແລະບ້ານເພຍໃໝ່, ໂດຍໃນນີ້ ພົນລະເມືອງໃນ 6 ບ້ານທັງໝົດມີ 14.424 ຄົນ, ຍິງ 6.863 ຄົນ, ຜູ້ມີສິດເລືອກຕັ້ງ ອາຍຸ 18ປີຂຶ້ນໄປ 7.895 ຄົນ, ຍິງ 4.149 ຄົນ, ຜູ້ມີໜ້າປ່ອນບັດໂຕຈິງ 7.137 ຄົນ, ຍິງ 3.776 ຄົນ.