ວັນທີ 17 ກຸມພາ 2021, ທີ່ຫ້ອງວ່າການແຂວງຈຳປາສັກ, ທ່ານ ມະໄລທອງ ກົມມະສິດ ກຳມະການສຳຮອງ ສູນກາງພັກ ຮອງເລຂາຄະນະບໍລິຫານງານພັກແຂວງ ຜູ້ຊີ້ນຳວຽກພັກ-ພະນັກງານ ໄດ້ຕ້ອນຮັບ ທ່ານ ສຈ ດຣ ພອນເທບ ພົນເສນາ ອາຈານແພດຊຽວຊານອາວຸໂສ, ອະດີດ ປະທານກຳມາທິການ ວັດທະນະທຳ ສັງຄົມ ສະພາແຫ່ງຊາດ ໃນໂອກາດ ເຄື່ອນໄຫວຕິດຕາມຊູກຍູ້ວຽກງານຕ້ານການລະບາດ COVID-19 ຢູ່ ແຂວງຈຳປາສັກ.

ທ່ານ ສຈ ດຣ ພອນເທບ ພົນເສນາ ໄດ້ແຈ້ງໃຫ້ຮູ້ເຖິງການເດີນທາງມາເຄື່ອນໄຫວ ຢູ່ ແຂວງຈຳປາສັກຄັ້ງນີ້ວ່າ: ແມ່ນເພື່ອຕິດຕາມຊຸກຍູ້ ໃຫ້ກຳລັງໃຈ ແລະຄວາມເປັນຫ່ວງເປັນໄຍ ໃນນາມ ອາສາ ເປັນຕົວແທນ ໃຫ້ແກ່ ການນຳກະຊວງສາທາລະນະສຸກ ກໍ່ຄືລັດຖະບານ ແລະບັນດາແພດອາວຸໂສ ຕໍ່ ບັບດາ ເຈົ້າໜ້າທີ່, ແພດໝໍ ທີ່ປະຕິບັດໜ້າທີ່ ປ້ອງກັນ, ຄວບຄຸມ ແລະ ແກ້ໄຂ ການລະບາດ ຂອງພະຍາດ COVID-19 ຢູ່ແຂວງຈຳປາສັກ. ຍ້ອນວ່າ ແຂວງຈຳປາສັກ ປຽບເໝືອນປ້ອມດ່ານໜ້າ ແລະເປັນຈຸດຍຸດທະສາດ ໃນການປ້ອງກັນ ຮັບມືກັບພະຍາດດັ່ງກ່າວ ພ້ອມດຽວກັນກໍ່ຕ້ອງໄດ້ເອົາໃຈໃສ່ ປະຕິບັດ ມາດຕະການປ້ອງກັນການຕິດເຊື້ອຢ່າງຖືກຕ້ອງ ແລະ ເຂັ້ມງວດ ເພື່ອສະກັດກັ້ນ ແລະ ຫລຸດຜ່ອນການລະບາດຂອງພະຍາດດັ່ງກ່າວ ບໍ່ໃຫ້ຂະຫຍາຍອອກເປັນວົງກວ້າງ.

ໂອກາດນີ້, ທ່ານ ມະໄລທອງ ກົມມະສິດ ໄດ້ສະແດງການຕ້ອນຮັບ ແລະກ່າວຄຳຂອບໃຈ ໄປຍັງການນຳກະຊວງສາທາລະນະສຸກ ກໍ່ຄືລັດຖະບານ ແລະບັນດາແພດອາວຸໂສ ທີ່ຍາມໄດ້ກໍ່ເຫັນໄດ້ເຖິງຄວາມຄຳຄັນ, ຄວາມເປັນຫ່ວງ ເປັນໃຍ ຕໍ່ທ້ອງຖິ່ນ; ຈາກນັ້ນ ໄດ້ລາຍງານໃຫ້ຮູ້ເຖິງ ການຈັດຕັ້ງປະຕິບັດ ວຽກງານປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ຢູ່ແຂວງຈຳປາສັກ ແລະ ແຂວງໄດ້ກຳນົດທິດທາງ, ມາດຕະການຜ່ອນຜັນ ເພ່ືອຮັບປະກັນປ້ອງກັນ ແລະ ຄວບຄຸມ ແກ້ໄຂການແຜ່ລະບາດ ໂດຍໄດ້ອອກແຈ້ງການ ແນະນຳ ການຈັດຕັ້ງພິທີທາງການ, ງານປະເພນີຕ່າງໆ, ເອົາໃຈໃສ່ຄຸ້ມຄອງຕິດຕາມການເຂົ້າ-ອອກຜ່ານດ່ານ ແລະ ສະກັດກັ້ນການເຂົ້າມາໃນຈຸດທ່ີບໍ່ຜ່ານດ່ານຂອງບັນດາແຮງງານ ລວມທັງການຄຸ້ມຄອງຜູ້ຂັບລົດ ທີ່ນຳເຂົ້າສິນຄ້າຜ່ານດ່ານ.